डा. केसीको स्वास्थ्यअवस्था नाजुक, सरकारले पठाएको विशेषज्ञ चिकित्सकबाट उपचार गराउन अस्वीकार

१७औँ अनशनको नवौँ दिन आइपुग्दा निकै नाजुक बन्दै गएको प्रा.डा. गोविन्द केसीको स्वास्थ्यअवस्था ‘कन्फ्युजन स्टेज’मा पुगेको छ । दिनप्रतिदिन खस्किँदै गएको डा. केसीको स्वास्थ्य मंगलबार थप नाजुक बनेको डडेल्धुरा अल्पतालले जनाएको छ । यद्यपि, सरकारले डा. केसीसित वार्ताका लागि कुनै पहल थालेको छैन । माग पूरा नभएसम्म डडेल्धुरा नछाड्ने र डडेल्धुरा अस्पतालमा उपलब्ध सेवाका अतिरिक्त उपचारसेवा पनि नलिने अडानमा डा. केसी छन् ।

स्वास्थ्यअवस्था जोखिमपूर्ण बनिरहँदा पनि डा. केसीले सघन उपचारका लागि सुविधासम्पन्न अस्पतालमा रेफर हुन नमानेपछि सरकारले उनको उपचारका लागि भन्दै एकजना फिजिसियनलाई डडेल्धुरा अस्पताल पठाएको थियो । तर, डा. केसीले आफूलाई डडेल्धुरा अस्पतालमा उपलब्ध सेवाभन्दा अतिरिक्त सेवा आवश्यक नभएको भन्दै त्यहीँका चिकित्सकबाट उपचार गराउने अडान लिएका छन् । सरकारको आदेशमा डा. केसीको उपचारका लागि भेरी अस्पतालबाट मंगलबार बिहान डडेल्धुरा अस्पताल पुगेका फिजिसियन डा. राजेश मण्डललाई डा. केसीले फर्कन आग्रह गरेका छन् । सोमबार डा. केसीलाई काठमाडौं लान गएको नेपाली सेनाको हेलिकोप्टरलाई पनि उनले रित्तै फर्काइदिएका थिए ।

‘तपाईं आइहाल्नुभएछ, मेला–सेला घुमेर जानुभए हुन्छ,’ डा. केसीले डा. मण्डलसित भने, ‘डडेल्धुरा अस्पतालमै चिकित्सकहरू हुनुहुन्छ, मेरो उपचार उहाँहरूले नै गर्नुहुन्छ ।’ डडेल्धुरामा मंगलबार सुदूरपश्चिमकै ठूलो उग्रतारा मेला लागिरहेको छ । डा. केसीले डा. मण्डललाई फर्कन आग्रह गरे पनि अस्पतालले भने चिकित्सक अभाव रहेकाले उनलाई सेवा दिन भनेको छ । ‘हामीलाई जनशक्ति अभावले सेवा दिन कठिनाइ भइरहेका वेला सरकारले जिम्मेवारी दिएर पठाएको व्यक्ति बस्नुपर्छ भनेका छौँ,’ अस्पतालका निमित्तमेडिकल सुपरिटेन्डेन्ट डा. जितेन्द्र कँडेलले हेल्थपोस्टसित भने ।

३७ चिकित्सक दरबन्दी तर ३ जना मात्र कार्यरत, यही अवस्था सुधार्न लड्दै छन् डा. केसी
डडेल्धुरा अस्पतालमा १९ जना विशेषज्ञ चिकित्सक तथा १८ जना मेडिकल अफिसरको दरबन्दी छ । तर, अहिले जम्मा २ जना विशेषज्ञ र १ एमबिबिएस चिकित्सक मात्र कार्यरत छन् । यसका अलावा एकजना छात्रवृत्ति करारका विशेषज्ञ ६ महिनाका लागि काम गरिरहेका छन् । सरकारले चिकित्सक खटाउँदा पनि अधिकांश अध्ययन बिदामा भएकालाई पठाउँदा फिल्डमा चिकित्सक अभाव भएको अस्पतालका मेसु डा. कँडेल बताउँछन् । ८–१० जना चिकित्सक अध्ययन बिदामै छन् ।

डडेल्धुरा अस्पताल संघ सरकारमातहतको टर्सेरी अस्पताल हो । संघीयताअघि १० बेडको उपक्षेत्रीय अस्पतालका रूपमा सञ्चालित यो अस्पताल संघीयता कार्यान्वयनका क्रममा प्रदेश सरकारमातहत गएको थियो । पछि केन्द्र सरकारले प्रदेशअन्तर्गतका ५ वटा अस्पताललाई केन्द्र सरकारमातहत ल्याउनेक्रममा यो अस्पताल पनि संघअन्तर्गत आएको थियो ।

दूरदराजका जनसामान्यको समेत स्वास्थ्य र शिक्षामा सुलभ पहुँचका लागि जीवन समर्पित गरेका डा. केसीले डडेल्धुरामा अनशन बसेर औँलामा गन्न सकिने मुलुकका संघीय अस्पतालको वास्तविक अवस्थालाई उजागर गरिदिएका छन् । दुर्गमका अस्पतालमा पनि दरबन्दीअनुसार चिकित्सक व्यवस्था गरी जनतालाई गुणस्तरीय स्वास्थ्यसेवा पुर्याउनुपर्छ भन्ने सन्देशका लागि नै डा. केसीले सरकारले पठाएका विशेषज्ञ चिकित्सकबाट उपचार गराउन अस्वीकार गरेका हुन् । डडेल्धुरा अस्पतालको दरबन्दी र सेवामा खटिने चिकित्सकको अवस्थाले नै डा. केसीको सत्याग्रहको सार्थकता पुष्टि गर्छ ।

अस्पतालले केही दिनअघिदेखि नै डा. केसीको थप उपचारका लागि आफ्नो सामर्थ्य नभएकाले सुविधासम्पन्न अस्पतालमा रेफरका लागि पहल गर्न विभिन्न निकायमा अनुरोध गर्दै आएको छ । अनशनको आठौँ दिन डा. केसीलाई काठमाडौं ल्याउन डडेल्धुरा पुगेको नेपाली सेनाको हेलिकोप्टर डा. केसीले आउन नमानेपछि रित्तै फर्किएको थियो । डा. केसीको अभियानका समर्थक स्थानीयले सत्याग्रहीको इच्छाविपरीत जबर्जस्ती लैजान नपाइने भन्दै विरोध जनाएपछि हेलिकोप्टर रित्तै फर्किएको थियो ।

स्वास्थ्यअवस्था नाजुक, सुगर ज्यादा घटेका कारण कन्फ्युजन स्टेजमा डा. केसी
अनशनको नवौँ दिन डा. केसीको स्वास्थ्यअवस्था निकै नाजुक रहेको अस्पतालले जनाएको छ । मेसु डा. कँडेलका अनुसार डा. केसीको सुगर जम्मा ४० को रेन्जमा छ । डा. केसी कन्फ्युजन स्टेजमा रहेको उपचारमा संलग्न चिकित्सकको भनाइ छ । सुगर अत्यधिक घटेकै कारण त्यस्तो भएको हुन सक्ने अनुमान गरिएको छ ।
डा. केसीको रक्तचाप घट्नुका साथै अनियमित बनिरहेको छ । मेसु डा. कँडेलका अनुसार उनको रक्तचाप ९०÷४० को हाराहारीमा छ । मुटुको चाल अनियमित छ । शरीरमा अक्सिजनको मात्रा निकै घटेको छ भने श्वासप्रश्वासमा समेत समस्या भइरहेको छ । लामो समयको खाना अभावमा कमजोरीस्तर जोखिमयुक्त बनिरहेको छ ।

सत्याग्रहमा ऐक्यबद्धता जनाउँदै हस्ताक्षर अभियान सुरु
डा. केसीको सत्याग्रहमा ऐक्यबद्धता जनाउँदै चिकित्साशिक्षा सुधारको अभियानमा सामेल हुनेको संख्या दिनप्रतिदिन बढ्दै छ । स्थानीय वैयक्तिक तथा संस्थागत रूपमा सत्याग्रह जोडिन उत्साहित देखिएका छन् । डा. केसीको सत्याग्रहमा ऐक्यबद्धता जनाउँदै मंगलबार जिल्लामा हस्ताक्षर संकलन अभियान सुरु गरिएको छ । नागरिक आन्दोलन संघर्ष समितिको अगुवाइमा डा. केसीको माग पूरा गराउन हस्ताक्षर अभियान सुरु गरिएको हो । मंगलबार सुदूरपश्चिमकै ठूलो उग्रतारा मेला परेकाले अन्य आन्दोलनका कार्यक्रम भने स्थगित गरिएका छन् । यद्यपि, जिल्लामा सरकारी गाडी सञ्चालनमा लगाइएको रोक भने कायमै छ ।

डा. केसीको समर्थनमा नेपाल चिकित्सक संघ, ठूला ३ प्रतिष्ठान (न्याम्स, बिपी, पाटन) का आवासीय चिकित्सक, काठमाडौं विश्वविद्यालय प्रध्यापक संघ, मेडिकल विद्यार्थीलगायतले ऐक्यबद्धता जनाइसकेका छन् । देशभरका मेडिकल विद्यार्थीले डा. केसीको मागमा ऐक्यबद्धता जनाउँदै डा. केसी बचाऊ अभियानसहित प्रदर्शन गरिरहेका छन् । त्रिवि शिक्षण अस्पतालका डाक्टर विद्यार्थीले डा. केसीको समर्थनमा आन्दोलनको घोषणा नै गरिसकेका छन् ।

अघिल्लो साताको सोमबार (१८ कात्तिक) देखि डडेल्धुरा सदरमुकामको एक निजी घरबाट अनशन थालेका डा. केसीको स्वास्थ्यअवस्था बिग्रिएपछि अनशनको पाँचौँ दिन शुक्रबार उनलाई डडेल्धुरा अस्पताल सारिएको थियो । तर, अस्पतालमा आइसियूलगायत सेवा तथा जनशक्ति उपलब्ध नभएका कारण उनको आवश्यक उपचार हुन सकिरहेको छैन । उनलाई तत्कालै सुविधासम्पन्न अस्पतालमा भर्ना गरी सघन उपचारको अवाश्यक भएको चिकित्सकहरू बताउँदै आएका छन् । तर, आफ्नो माग पूरा नभएसम्म आफूले डडेल्धुरा नछोड्ने बरु सत्याग्रहकै क्रममा मृत्युवरण गर्ने अडानमा डा. केसी छन् । विगतमा आफैँले गरेको सहमतिबाट पछि हटेर समस्या निम्त्याएको सरकार भने वार्ता गर्नुको साटो झन् वतावरण बिगार्ने अभिव्यक्ति सार्वजनिक गरिहेको छ ।

  • ताजा समाचार
  • जनप्रिय

हेल्थपोष्ट टुइट्स सबै

डा.केसीको मागप्रति आवासीय चिकित्सकको ऐक्यबद्धता, संघर्षमा उत्रिए चिकित्साशिक्षा विद्यार्थी

चिकित्साशिक्षा सुधारसम्बन्धी माग राखेर ९ दिनदेखि आमरण अनशनमा रहेको अभियान्ता डा. गोविन्द केसीका मागप्रति सरकारका तीन ठूला प्रतिष्ठानका आवासीय चिकित्सकहरुले ऐक्यवद्धता जनाएका छन् । बीपी कोइराला स्वास्थ्य विज्ञान प्रतिष्ठान धरान, रेजिडेन्ट डक्टर्स एशोसिएसन अफ न्याम्स, वीर अस्पताल र राष्ट्रिय आवासीय चिकित्सक संघले संयुक्त रुपमा विज्ञाप्ति जारी गरि डा. केसीको माग पूरा गर्न सरकारले देखाएको उदासिनताप्रति आक्रोश व्यक्त गरिएको छ ।

आवासीय चिकित्सकहरुका तीनै संस्थाका अध्यक्षले संयुक्त हस्ताक्षर गरेको विज्ञाप्तिमा निस्वार्थ सत्याग्रहमा सम्पूर्ण आवासीय चिकित्सको साथ समर्थन र ऐक्यवद्धता यसपटक पनि रहने उल्लेख छ । उनीहरुले डा. मागलाई यथाशीघ्र संवोधन गरेर जीवन रक्षाको पहल गर्न जोडदार मागसमेत गरेका छन् । त्यसैगरी कलेजका मनपरीविरुद्ध संघर्षका लागि गठित चिकित्साशिक्षा संघर्ष समिति समर्थित विद्यार्थीहरुले चितवन, बीरगञ्ज, पोखरालगायतका स्थानमा दैनिकजसो प्रदर्शन जारी राखेका छन् ।

डा. केसीले केहीअघि मात्रै अवकास पाएको त्रिवि अन्तर्गतको चिकित्सा क्याम्पसका विद्यार्थीले मंगलबारदेखि सम्पूर्ण टिचिङ अस्पताल सदैव डा. केसीको साथमा भन्ने मुल नाराका साथ वृहत र्यालीसहित बालुवाटार जाने कार्यक्रम तय गरेका छन् । विद्यार्थीहरुले महारजगञ्ज क्याम्सपको शैक्षिक कार्यक्रम बहिष्कार गरेर आन्दोलनलाई चर्काएका छन् ।

चिकित्सक र विद्यार्थीबाहेक डा. केसीको आन्दोलनमा अनशन सुरु गरेको दोस्रो दिनदेखि नै सडक प्रदर्शन र सरकारी गाडी चल्न नदिने कार्यक्रम जारी राखेका छन् । १६औ अनशन पूर्वी नेपालको इलामबाट सुरु गरेका डा. केसीले १७औ अनशन सुदूरपश्चिमको डढेल्धुरामा जारी राखेका छन् । डा. केसीले योपटक इलामका स्थानीयले जस्तै सुरुरपश्चिमका नागरिकले साथ र ऐक्यवद्धता जनाएका छन् ।

यद्यपि सरकारले डा. केसीका माग सुरुवाईका लागि वार्ता प्रक्रियासमेत थालनी गरेको छैन् । बार्ताको विकल्पमा शिक्षामन्त्री स्वयम् अनुत्तदारी रुपमा डा. केसीमा माग पूरा हुननसक्ने धारणा राख्दै आएका छन् ।

  • ताजा समाचार
  • जनप्रिय

हेल्थपोष्ट टुइट्स सबै

पिसाबमा प्रोटिनले डा. केसीको मिर्गौलामा असर पुगेको आशंका, अस्पतालले रेफरको गुहार लगाउँदा भएन सुनुवाइ

१७औँ अनशनको सातौँ दिन डा. गोविन्द केसीको स्वास्थ्यअवस्था निकै गम्भीर बनेको छ । अनशनको पाँचौँ दिन स्वास्थ्यमा समस्या देखिएपछि शुक्रबार डडेल्धुरा अस्पताल सारिएका डा. केसीको पिसाबको परीक्षणमा प्रोटिन गएको देखिएको छ । यससँगै उनको मिर्गौलामा खराबी आएको आशंका उपचारमा संलग्न चिकित्सकले गरेका छन् । अस्पतालले डा. केसीलाई थप उपचार दिन अस्पतालको सामर्थ्यले नधान्ने भन्दै यथाशीघ्र सुविधासम्पन्न अस्पतालमा रेफर गर्न सम्बन्धित सबै निकायसित अनुरोध गरिसकेको छ । तर, कुनै पनि जिम्मेवार निकायबाट कुनै पहल भएको छैन ।

‘आइतबारको परीक्षणमा पिसाबमा ‘एल्बुमिन ट्रेस’ देखिएको छ । यसले सरको किड्नीमा खराबी आएको आशंका जन्माएको छ,’ अस्पतालका निमित्तमेडिकल सुपरिटेन्डेन्ट डा. जितेन्द्र कँडेलले हेल्थपोस्टसित भने, ‘मैले उहाँको स्वास्थ्यअवस्था र थप उपचारबारे स्वास्थ्य मन्त्रालय, जिल्ला प्रशासन कार्यालयलगायत निकायलाई लिखित रुपमै जानकारी पठाएको छु, तर रेफरको वातावरण मिल्न सकिरहेको छैन ।’ मन्त्रालय वा अन्य सरकारी निकायबाट भने हालसम्म डा. केसीको स्वास्थ्यअवस्थाबारे कुनै सोधनीसमेत नभएको उनले बताए ।

मेसु कँडेलका अनुसार डा. केसीको रक्तचाप र मुटुको धडकन अनियमित छ । अस्पतालमा आइसियू, जनशक्ति, उपकरणलगायत कुनै पनि सुविधा उपलब्ध नभएकाले डा. केसीको स्वास्थ्यसित अस्पतालले थप जोखिम लिन सक्ने अवस्था नरहेको उनको भनाइ छ । प्रदेश सरकारमागहतको डडेल्धुरा अस्पतालमा ओपिडी, एक्सरे, भिडियो एक्सरे, समान्य शल्यक्रियालगायत सेवा मात्र उपलब्ध छन् ।

‘उहाँलाई सुविधासम्पन्न अस्पतालमा राखेर उपचार गर्नु आवश्यक छ,’ डा. कँडेलले भने, ‘तर, त्यसका लागि पहल कसले गर्ने भन्ने समस्या छ ।’ एम्बुलेन्समा लामो बाटो हिँडाउन सक्ने अवस्था नरहेको र हवाईमार्गबाट पठाउन सम्बन्धित निकायले पहलकदमी नलिएको उनको भनाइ छ । यद्यपि, यसबारे आइतबार नै प्रमुख जिल्ला अधिकारीसित कुरा भएको उनले बताएका छन् । आफूले रेफर गर्दा नजिकको सेती प्रादेशिक अस्पतालमा रेफर गर्नुपर्ने तर डा. केसीलाई काठमाडौं नै लानु आवश्यक देखिएको मेसु कँडेलले बताए ।

विगतका सत्याग्रहका क्रममा सरकारले आफूसित गरेका सम्झौता कार्यान्वयन गर्नुपर्ने, सम्झौताअनुसार राष्ट्रिय चिकित्साशिक्षा ऐनमा संशोधन गरिनुपर्ने, दुर्गम क्षेत्रहरुमा सरकारी मेडिकल कलेज खोलिनुपर्ने, विद्यार्थीबाट अवैध शुल्क असुलेर ठगी गर्ने मेडिकल कलेजहरुलाई कारबाही गर्नुपर्नेलगायत विभिन्न सातबुँदे माग राखेर डा. केसीले गत सोमबार १७औँ सत्याग्रह सुरु गरेका थिए । आइओएमको २६ वर्षे चिकित्सकीय तथा प्राध्यापन सेवाबाट अवकाश भएपछिको पहिलो अनशनका लागि उनले सुदूरपश्चिमको डडेल्धुरा रोजेका थिए । सुदूरपश्चिममा सरकारी मेडिकल कलेजको माग उनले पहिलेदेखि नै उठाउँदै आएका छन् ।

  • ताजा समाचार
  • जनप्रिय

हेल्थपोष्ट टुइट्स सबै

डा.केसीको समर्थन चितवनमा विद्यार्थीको प्रदर्शन, स्वास्थ्य जोखिमपूर्ण

चिकित्साशिक्षा विद्यार्थीले चितवनमा शनिबार साँझ गरेको मैनवत्ती बाल्ने कार्यक्रम

६ दिनदेखि आमरण अनशनरत डा. गोविन्द केसीको समर्थनमा देशभर प्र्रदर्शनको लहर चलेको छ । पछिल्लोपटक चितवनका चिकित्सा विद्यार्थीले शनिबार साँझ मैनवती बालेर प्रदर्शन गरेका छन् । चितवन, भैरहवा, धरानलगायतका ठाउँमा विद्यार्थीहरुले निरन्तर प्रदर्शन गरिरहेका छन् ।

अनशनरत स्थान डढेल्धुरामा अनशन सुरु गरेकै दिनदेखि नागरिक प्रदर्शन जारी छ । शनिबार माइतीघरमा पनि डा. गोविन्द केसी सोलिडाइरिटी अलायन्सको आह्वानमा प्रदर्शन भएको थियो ।
देशभर समर्थन बढिरहेपनि डा. केसीको स्वास्थ्य भने जोखिमपूर्ण बनेको छ । चिकित्सकहरुले स्वास्थ्य प्रतिकूल भएका कारण तत्काल आइसियू चाहिने अवस्था देखिएको भन्दै तत्काल रेफर गर्नपर्ने बताएका छन् ।

  • ताजा समाचार
  • जनप्रिय

हेल्थपोष्ट टुइट्स सबै

माइतीघरको नारा: ‘अर्ब ठग्ने अन्सारी, संरक्षण सरकारी’

छ दिनदेखि डढेल्धुरामा अनशनरत डा. गोविन्द केसीको समर्थनमा माइतीघरमा प्रदर्शन भएको छ । सोलिडारिटी फर डा. गोविन्द केसी अलायन्सको आह्वानमा माइतीघरमा भएको पैदर्शनमा चिकित्सक, विद्यार्थी, नागरिक अगुवा र सर्वसाधारणको बाक्लो उपस्थिति थियो ।

उनीहरुले नीजि कलेजका सञ्चालकलाई संरक्षण गर्ने सरकारले जनमुखी र विद्यार्थीमुखी काम गर्न चुकेको आरोप लगाए । उनीहरुले अर्व ठग्ने अन्सारी, संरक्षण सरकारी, मेडिकल माफिया मुर्दावाद, डा. केसीको अनशन माफियालाई टेन्सनलगायतका नारा लगाएका थिए ।

चिकित्साशिक्षा सुधारका विभिन्न माग राखेर कार्तिक १८ गतेदेखि डा. केसीले डढेल्धुराको एक निजी घरबाट १७औँ अनशन सुरु गरेका थिए । डा. केसीको स्वास्थ्य जटिल बनेपछि शुक्रबारै उनलाई डढेल्धुराको सरकारी अस्पतालमा सारिएको छ ।

  • ताजा समाचार
  • जनप्रिय

हेल्थपोष्ट टुइट्स सबै

डा. केसीको स्वास्थ्य अवस्था गम्भीर, अस्पताल सारियो

डढेल्धुराको एक निजी घरमा पाँच दिनदेखि आमरण अनशनरत डा. गोविन्द केसीको स्वास्थ्य अवस्था गम्भीर भएपछि शुक्रबार साँझ अस्पतालमा सारिएको छ । परीक्षणका क्रममा रक्तचाप न्युन हुनुकासाथै छातिको अत्यधिक दुःखाई र मुटुको चालमा समेत गढबडी देखिएपछि उनलाई अस्पताल सारिएको हो ।
साँझ ८ः१५ बजे प्रदेश सासंद कर्णबहादुर मल्लसहित आफन्त र नागरिक अगुवाको रोहभरमा डा. केसीलाई अस्पताल सारिएको हो । उनलाई अस्पताल सार्नुअघि मल्लसहित भाई किशोर केसी, नागरिक समाज संयोजक रमेशप्रसाद जोशीलगायतले हस्ताक्षर गरेर स्वास्थ्य अवस्था प्रतिकुल भएको र अस्पताल सार्नुपर्ने देखिएको भन्दै सार्ने निर्णय गरेका थिए ।

चिकित्साशिक्षा सुधारसम्बन्धी ७ बुँदे माग राखेर उनी कार्तिक १७ गतेदेखि डढेल्धुराको एक फार्मेसी रहेको घरको चिसो कोठामा अनसन सुरु गरेका थिए । चिकित्साशिक्षासम्बन्धी ऐन संसोधन, मेडिकल विद्यार्थीसँग लिएको अतिरिक्त शुल्क फिर्तासहितका माग राखेर अनशन थालेका थिए । डा. केसीले सुरुमा नेपाल चिकित्सक संघको भवनमा अनशन थाल्ने योजना बनाएपनि संघ नेतृत्वले सहयोग नगरेपछि उनीले अनशनका लागि डढेल्धुरा गएका थिए ।

  • ताजा समाचार
  • जनप्रिय

हेल्थपोष्ट टुइट्स सबै