सकियो स्वास्थ्य तथा जनसंख्या वैज्ञानिक सम्मेलन, विभिन्न व्यक्तित्वलाई अनुसन्धान अवार्ड

उपप्रधान एवम् स्वास्थ्य तथा जनसंख्यामन्त्री उपेन्द्र यादवले स्वास्थ्य अनुसन्धानका नतिजा नीति–निर्माणका लागि उपयोगी हुने बताएका छन् । स्वास्थ्य तथा जनसंख्या वैज्ञानिकहरूको तीनदिने पाँचौँ शिखर–सम्मेलनको समापनमा मन्त्री यादवले विकासका लागि स्वास्थ्य र शिक्षा नै आधार भएको बताए ।

नागरिकलाई गुणस्तरीय स्वास्थ्यसेव प्रदान गर्न अनुसन्धानले मार्गनिर्देशन गर्ने मन्त्री यादवको भनाइ थियो । यादवले स्वास्थ्योपचारको गुणस्तर विकासका लागि स्वास्थ्यशिक्षा महत्वपूर्ण हुने र त्यससँगै अनुसन्धान जोडिएर आउने बताए । ‘मुलुक बनाउनका लागि शारीरिक र मानसिक रूपमा स्वस्थ नागरिक तयार गर्न शिक्षा र स्वास्थ्यको संयोजन हुनुपर्छ,’ उनले भने ।

नेपाल स्वास्थ्य अनुसन्धान परिषद्को आयोजनामा ‘संघीयतामा समता र विकासका लागि अनुसन्धान’ मूल नाराका साथ सम्पन्न सम्मेलनले ६ बुँदे घोषणापत्रसमेत जारी गरेको छ । सम्मेलनमा १ हजार ३ सयभन्दा बढी वैज्ञानिक एवम् सरोकारवाला प्रतिनिधिले एकै ठाउँमा भेला भएर १ सय ३७ वटा जनस्वास्थ्यसँग सम्बन्धित विषयमा छलफल गरेका थिए ।
आयोजक संस्था परिषद्का कार्यकारी अध्यक्ष डा. अञ्जनीकुमार झाले मुख्य नारामा आधारित स्वस्थ्यबिमा, नसर्ने रोग, मातृस्वास्थ्य, बालस्वास्थ्य, किशोर–किशोरी स्वास्थ्य मानसिक स्वास्थ्यलगायत थुप्रै विधा र विषयमा महत्वपूर्ण प्रस्तुतीकरण भएको बताए । समापनमा अध्यक्ष झाले अनुसन्धान संस्कृति विकास गरी तथ्यमा आधारित भएर नीति र सेवा विस्तारका लागि परिषद् निरन्तर लागिपरेको बताए ।

कार्यक्रममा ३३ वटा मौखिक प्रस्तुतीकरण, १ सय ४ वटा पोस्टर, १० वटा विशेष प्रस्तुतीकरण भएका थिए । समापन कार्यक्रममा पूर्वस्वास्थ्यराज्यमन्त्री वंशीधर मिश्र, स्वास्थ्य मन्त्रालयका प्रमुख विशेषज्ञ डा. सुशीलनाथ प्याकुरेललगायतले समृद्ध नेपालको स्वास्थ्यप्रणालीको विकास र विस्तारमा स्वास्थ्य–अनुसन्धान सहयोगीसिद्ध हुने धारणा राखे ।

बेस्ट पेपर अवार्ड डा. अनिललाई, हेल्थ रिसर्च लाइफटाइम अवार्ड डा. राईलाई


वैज्ञानिक सम्मेलनका अवसरमा परिषद्को जर्नल जेएएचआरसीमा सन् २०१८ मा प्रकाशित लेखमध्ये वरिष्ठ मुटुरोग विशेषज्ञ डा. ओममूर्ति अनिलको लेखले उत्कृष्ट लेख–रचना अवार्ड प्राप्त गरेको छ । त्यसैगरी, परिषद्ले यस वर्षदेखि सुरु गरेको हेल्थ रिसर्च लाइफटाइम अवार्डबाट प्रा.डा. शिवकुमार राई सम्मानित भएका छन् ।

त्यसैगरी आउटस्ट्यान्डिङ हेल्थ रिसर्च अवार्डबाट डा. शमसुल अन्सारी, मृगेन्द्र सम्झना मेडिकल ट्र«स्ट योङ हेल्थ रिसर्च अवार्डबाट बिहंगम विष्ट, बेस्ट इम्प्लोई अवार्ड अफ एनएचआरसीबाट प्रदीप बेल्बासे, पुराना कर्मचारी रामप्रसाद पोखरेल, बेस्ट ओरल प्रिजेन्टेसन अवार्डबाट डा. निशा झा र बेस्ट पोस्टर प्रिजेन्टेसन अवार्डबाट पुष्करचन्द्र ठकुरी सम्मानित भएका छन् । विभिन्न विधामा अवार्ड जित्न सफल व्यक्तित्वलाई मन्त्री यादवले सम्मान गरेका हुन् ।

 

  • ताजा समाचार
  • जनप्रिय

हेल्थपोष्ट टुइट्स सबै

स्वास्थ्य तथा जनसंख्या वैज्ञानिकको ‘महाकुम्भ’ राजधानीमा सुरु

‘संघीय प्रणालीमा समानता र विकासका लागि अनुसन्धान’ नाराका साथ स्वास्थ्य तथा जनसंख्या वैज्ञानिकको पाँचौँ शिखर सम्मेलन बुधबार राजधानीमा सुरु भएको छ । नेपाल स्वास्थ्य अनुसन्धान परिषद्को आयोजनामा ३ दिनसम्म चल्ने सम्मेलनको दोस्रो दिन बिहीबार उपप्रधान एवम् स्वास्थ्य तथा जनसंख्यामन्त्री उपेन्द्र यादवले औपचारिक उद्घाटन गर्ने कार्यक्रम छ ।

सम्मेलनमा स्वास्थ्य वैज्ञानिक, शोधकर्ता, विश्वविद्यालयका प्रतिनिधि, विद्यार्थी, स्वास्थ्यविज्ञ, मेडिकल चिकित्सकलगायत हजारभन्दा बढीको सहभागिता छ । सम्मेलनमा नेपालसहित अमेरिका, चीन, जर्मनी, भारतका विश्वविख्यात वैज्ञानिकसमेत सहभागी छन् । सम्मेलन शुक्रबारसम्म चल्नेछ । परिषद्ले ५ वर्षदेखि आफ्नो स्थापनाको दिन पारेर स्वास्थ्य तथा जनसंख्यासम्बन्धी वैज्ञानिक सम्मेलन गर्दै आएको छ ।

सम्मेलनमा स्वास्थ्य समता र विकास, सामाजिक स्वास्थ्यबिमा, नसर्ने रोग, मातृस्वास्थ्य, बालस्वास्थ्य र किशोर–किशोरी स्वास्थ्य, मानसिक स्वास्थ्य, सरुवारोग, जैविक स्वास्थ्य र स्वास्थ्य सूचना, स्वास्थ्य प्रणालीजस्ता विषयमा विज्ञहरूको प्रस्तुति जारी छ ।
सम्मेलनको पहिलो सत्रको अध्यक्षता गर्दै स्वास्थ्य तथा जनसंख्यासचिव डा. पुष्पा चौधरीले स्वास्थ्य नीति तथा कार्यक्रम बताउन अनुसन्धान अत्यन्त जरुरी रहेको बताइन् । उनले स्वास्थ्यबिमा कार्यक्रमले जनतामा राम्रो प्रभाव परेको बताउँदै बिमा कार्यक्रमलाई छिटोभन्दा छिटो सबै जिल्लामा विस्तार गर्नुपर्ने कुरामा जोड दिइन् । पछिल्लो समय समायोजनको अन्योलले स्वास्थ्यका कार्यक्रम कार्यान्वयनमा समस्या आएको संकेत गर्दै उनले कर्मचारी समायोजन विवाद सुल्झाउन पहल भइरहेको जानकारी दिइन् । गुणस्तरीय स्वास्थ्यसेवाका लागि कानुन तथा नीति तथा कार्यक्रम राम्रा बनेका उल्लेख गर्दै उनले तिनको कार्यान्वयनमा सीमित स्रोत–साधन नै चुनौतीका रूपमा रहेको बताइन् ।

स्वास्थ्य मन्त्रालयका सह–सचिव डा. विकास देवकोटाले यसै चालू आर्थिक वर्षमा १ हजार २ सय वडामा स्वास्थ्यचौकी भवन, ६ सय ४० स्थानीय तहमा १५ शय्याको अस्पताल निर्माण कार्य अघि बढाएको बताए । पछिल्लो २० वर्षमा नेपालले आमा तथा नवजात शिशु, सरुवारोग नियन्त्रण तथा स्वास्थ्यमा भौतिक पूर्वाधार निर्माणमा सुधार गरेको उनले बताए ।

सम्मेलनका आयोजक संस्था नेपाल स्वास्थ्य अनुसन्धान परिषद्का वरिष्ठ अनुसन्धान अधिकृत डा. मेघनाथ धिमालले पछिल्लो समय नेपालमा नसर्ने रोगबाट धेरै मानिसको मुत्यु भएको जानकारी दिए । उनले भने, ‘कुल मृत्युमध्ये नसर्ने रोगबाट हुने मुत्यु ६६ प्रतिशत छ । ९ प्रतिशत चोटकपटकबाट र २५ प्रतिशत सरुवारोगका कारण मृत्यु हुने गरेको छ ।’ उनका अनुसार नसर्ने रोगको चुनौती थपिनुका मुख्य कारकमा समयअगावै हुने जन्म, उच्च रक्तचाप, धूमपान, रगतमा चिनीको अधिक मात्रा रहेका छन् ।

सम्मेलनको पहिलो सत्रमा संघीय संरचनामा स्वास्थ्य, नेपालमा रोगको भार, स्वास्थ्यका सूचक, स्वास्थ्यबिमालगायता विषयमा छलफल केन्द्रित थियो ।
बुधबारको दोस्रो सत्र सामाजिक स्वास्थ्यबिमा कार्यक्रममा केन्द्रित थियो । एसोसिएट प्राध्यापक डा. सतिस डिओले ‘नेपालमा स्वास्थ्यबिमा ः वर्तमान अवस्था, चुनौती र आगामी बाटो’ विषयमा कार्यपत्र प्रस्तुत गरेका थिए । त्यसैगरी, प्रा. डा. शिवराज अधिकारीले ‘नेपालमा स्वास्थ्यबिमा ः समालोचनात्मक अवलोकन’ विषयक प्रस्तुति दिएका थिए । कार्यपत्रमाथिको छलफलमा सहभागीहरूले ४४ जिल्लामा विस्तार भएको स्वास्थ्यबिमा कार्यक्रमको वर्तमान अवस्था, समस्या, चुनौती, आगामी सम्भावना र सुधारका बाटाहरूबारे धारणा राखेका थिए । छलफलमा सहभागी हुँदै प्रदेश १ का स्वास्थ्य निर्देशक डा. सागर दाहालले स्वास्थ्यबिमा सुरु गर्दा नै उद्देश्य र रणनीतिमै कमजोरी भएकाले परिवर्तन आवश्यक रहेको बताए । उनले मन्त्रालय र बिमा बोर्डको सम्बन्धबारे प्रश्न गर्दै कार्यक्रममाथि सूूक्ष्म विश्लेषणको आवश्यकता औँल्याए ।

  • ताजा समाचार
  • जनप्रिय

हेल्थपोष्ट टुइट्स सबै

स्वास्थ्य अनुसन्धान परिषद्को पाँचौँ राष्ट्रिय सम्मेलन बुधबारदेखि

स्वास्थ्य तथा जनसंख्या वैज्ञानिकको पाँचौँ शिखर सम्मेलन अगामी बुधबारदेखि सुरु हुन लागेको छ । सम्मेलनको मुख्य आयोजक स्वास्थ्य अनुसन्धान परिषद्ले सोमबार पत्रकारसम्मेलन गरी सम्मेलनबारे जानकारी दिएको हो ।
तीन दिनसम्म चल्ने सम्मेलन २७ देखि २९ चैतसम्म काठमाडौंको बबरमहलस्थित कार्की ब्यांक्विटमा हुनेछ । सम्मेलनमा १ हजारभन्दा बढी व्यक्तिको सहभागिता रहने आयोजकले जानकारी दिएको छ ।

परिषद्ले ५ वर्षदेखि आफ्नो स्थापनाको दिन पारेर स्वास्थ्य तथा जनसंख्यासम्बन्धी वैज्ञानिक सम्मेलन गर्दै आएको छ । यसपटकको सम्मेलनको नारा ‘संघीय प्रणालीमा समता र विकासका लागि अनुसन्धान’ रहेको छ ।

सम्मेलनमा वैज्ञानिक, शोधकर्ता, विश्वविद्यालयहरू, विद्यार्थी, बाह्य विकास साझेदारहरू, स्वास्थ्य विज्ञ, मेडिकल चिकित्सकलगायतको सहभागिता रहनेछ । सम्मेलनमा अमेरिका, चीन, जर्मन तथा भारतका विश्वप्रख्यात वैज्ञानिकहरूको समेत सहभागिता रहने परिषद्का कार्यकारी अध्यक्ष अञ्जनीकुमार झाले बताए ।

सम्मेलनमा लागि जनस्वास्थ्यसँग सम्बन्धित २ सय ७७ वटा अनुसन्धानसम्बन्धी एब्स्ट्र्याक्ट परेका थिए । कुल २ सय ७७ वटा एब्स्ट्र्याक्ट परेकोमा साइन्टिफिक कमिटीले १ सय ३७ वटा मात्र छनोट गरेको छ । सम्मेलनमा ३३ वटा मौखिक र १ सय ४ वटा पोस्टर प्रस्तुति हुने अध्यक्ष डा. झाले भने ।

परिषद्ले ५ वर्षदेखि आफ्नो स्थापनाको दिन पारेर स्वास्थ्य तथा जनसंख्यासम्बन्धी वैज्ञानिक सम्मेलन गर्दै आएको छ । यसपटकको सम्मेलनको नारा ‘संघीय प्रणालीमा समता र विकासका लागि अनुसन्धान’ रहेको छ ।

यसपटकको सम्मेलनमा स्वास्थ्य समता र विकास, सामाजिक स्वास्थ्य बिमा, नसर्ने रोग, मातृस्वास्थ्य, बालस्वास्थ्य र किशोर–किशोरी स्वास्थ्य, मानसिक स्वास्थ्य, सरुवा रोग, जैविक स्वास्थ्य र स्वास्थ्य सूचना, स्वास्थ्य प्रणाली, हेल्थ इकोनोमिक्स तथा फाइनान्सिङ र स्वास्थ्य संवर्धन, प्रविधि र आवश्यक मेडिकल उत्पादनजस्ता विषयमा प्रस्तुति हुनेछन् । सम्मेलनमा १० वटा आमन्त्रित प्रस्तुतीकरणसमेत हुनेछन् ।

सम्मेलनको अन्तिम दिन जर्नल अफ नेपाल हेल्थ रिसर्च काउन्सिल उत्कृष्ट कृति पुरस्कार २०१८, उत्कृष्ट स्वास्थ्य अनुसन्धानकर्ता पुरस्कार २०१८, मृगेन्द्र सम्झना मेडिकल ट्रस्ट युवा स्वास्थ्य अनुसन्धानकर्ता पुरस्कार (चिकित्सकलाई मात्र), मृगेन्द्र सम्झना मेडिकल ट्रस्ट युवा स्वास्थ्य अनुसन्धानकर्ता पुरस्कार, स्वास्थ्य अनुसन्धान लाइफटाइम एचिभमेन्ट पुरस्कार, उत्कृष्ट मौखिक प्रस्तुति पुरस्कार र उत्कृष्ट पोस्टर प्रस्तुति पुरस्कार सातजनालाई दिइनेछ ।

‘सम्मेलनको मुख्य उद्देश्य स्वास्थ्यक्षेत्रमा हाल के भइरहेको छ र अब के गर्ने भन्ने विषयमा सार्वजनिक छलफल गर्नु हो,’ डा. झाले भने, ‘यसका लागि एउटै थलोमा बसेर अनुसन्धानकर्ता, नीति–निर्माता, विकास साझेदार विभिन्न संस्थाहरूबीच छलफल हुनेछ ।’

  • ताजा समाचार
  • जनप्रिय

हेल्थपोष्ट टुइट्स सबै