विराट मेडिकल कलेजमा ‘युरोगाइनोकोलोजी’को अन्तर्राष्ट्रिय सम्मेलन शुक्रबारदेखि

साउथ एसियन फेडरेसन अफ युरोगाइनोकोलोजी (सेफग)को अन्तर्राष्ट्रिय सम्मेलन नेपालमा हुने भएको छ । मोरङस्थित विराट मेडिकल कलेजमा दुईदिने अन्तर्राष्ट्रिय सम्मेलन हुने भएको हो ।

विराट मेडिकल कलेज, साउथ एसियन फेडरेसन युरोगाइनोकोलोजीको पूर्वक्षेत्रीय शाखा र नेपाल प्रसूति तथा स्त्रीरोग विशेषज्ञ समाज (नेसोग)को संयुक्त आयोजना बिहीबारदेखि सुरु हुने सम्मेलनमा महिलाको तल्लो पेट, प्रजनन तथा पिसाबसम्बन्धी अंगहरूको पुनःसंरचनाबारे छलफल हुनेछ ।

आयोजनका अनुसार स्वास्थ्य तथा जनसंख्यामन्त्री भानुभक्त ढकालले उद्घाटन गर्ने सम्मेलनमा प्रदेश १ का मुख्यमन्त्री शेरधन राईलगायत अन्य मन्त्रीको समेत सहभागिता रहनेछ । सम्मेलनको उद्घाटन शुक्रबार बेलुकी साढे ५ बजे हुने आयोजक समितिले जनाएको छ । सम्मेलनको दोस्रो तथा अन्तिम दिन शनिबार प्रतिबद्धतासहितको श्वेतपत्रसमेत जारी गर्ने कार्यक्रम छ ।

को–को हुँदै छन् सहभागी ?
नेपालमा पहिलोपटक हुन लागेको सेफगको अन्तर्राष्ट्रिय सम्मेलनमा सम्बन्धि विधाका १५० भन्दा बढी वरिष्ठ चिकित्सक सहभागी हुँदै छन् । पाकिस्तान, बंगलादेश, श्रीलंका, भारत, अस्ट्रेलिया, बेलायतका प्रसूति तथा स्त्रीरोग विशेषज्ञको सहभागिता रहनेछ ।

सम्मेलनमा विराट मेडिकल कलेजले निःशुल्क शल्यक्रियाको समेत व्यवस्था गरेको छ । हालसम्म प्रदेश १ र प्रदेश २ बाट ४० जनाभन्दा बढीले निःशुल्क शल्यक्रिया सेवा लिन नाम दर्ता गराएको विराट मेडिकल कलेज शिक्षण अस्पतालले जनाएको छ ।

चिकित्सक टोलीले यौनांग नभएका तथा अविकसित भएकामा यौनांग बनाइदिने तथा गम्भीर प्रकृतिका समस्या भएका महिलामा मूत्ररोगलगायतको सामाधानका शल्यक्रियालगायत आवश्यक सेवा दिनेछ । साथै, सम्मेलनमा चिकित्सकबीच ज्ञानको आदान–प्रदान हुनेछ ।

  • ताजा समाचार
  • जनप्रिय

हेल्थपोष्ट टुइट्स सबै

चिसोमा भाइरल प्रकोप र निमोनियाबाट बच्न इन्फ्लुएन्जा खोप

चिसो अझै घटेको छैन । चिसोका कारण धेरै मानिसले अकालमै मृत्युवरण गरिरहेका छन् । दैनिक व्यवहार र आनीबानीसम्बन्धी केही सामान्य कुरामा ध्यान दिन सके चिसोबाट बच्न सकिन्छ ।

नेपाली समाजमा अधिकतर महिलाले घरको दैनिक काम गर्नुहुन्छ । चिसो पानी खेलाउँदा हातमा निलो डाम हुने गर्छ । भाँडा माँझ्दा वा लुगा धुँदा प्रायः महिलामा हात निलो हुने तथा झमझमाउने समस्या निम्तिएको पाइन्छ । तापक्रम घटेको समयमा यो समस्या देखिन्छ । समस्याको न्यूनीकरणका लागि पानी छोएर काम गर्दा पन्जा लगाउनुपर्छ । पानी चलाउँदा पन्जा लगाएको खण्डमा हातमा निलो डाम बस्ने तथा झमझमाउने समस्या हुँदैन ।

विशेषतः वृद्धवृद्धा तथा बालबालिकालाई चिसो मौसममा छाला सुक्खा भएको अनुभव हुन्छ । चिसो महिनामा घाम कम लागेको र हुसु लागेको समयमा छाला फुट्छ । यस्तो समस्या भएको अवस्थामा सामान्य लोसनको प्रयोगले छालालाई सुरक्षित राख्न सकिन्छ । लोसनको प्रयोगले छालामा डाबर आउने, चिलाउनेजस्ता समस्याबाट जोगाउन मद्दत पुग्छ ।

त्यसैगरी, चिसो मौसममा पानी कम पिउने चलन छ । पानी कम पिउँदा डिहाइड्रेसन हुने सम्भावना हुन्छ । मनतातो पानी भए पनि समय–समयमा पिइरहनुपर्छ ।
चिसो महिनामा सामान्य मानिसलाई पनि रुघाखोकीले सताउने गर्छ । आफूलाई यस्तो समस्याबाट जोगाउन प्रशस्त मात्रामा पानी पिउने, झोलपदार्थ खाने तथा सिजनअनुसारका फलफूल खाने गर्नुपर्छ ।

प्रत्येक वर्ष एकपटक इन्फ्लुएन्जा खोप लगाएमा निमोनियालाई धेरै हदसम्म कम गर्न सकिन्छ । एक खोपबराबर १ हजार ५ सय पर्छ, तर यसले लाखौँको प्रतिफल दिन्छ । यसले रुघाखोकी, निमोनियाजस्ता जाडो मौसममा देखिने समस्या कम गर्न मद्दत गर्छ ।

चिसोबाट बच्न शरीरलाई न्यायो बनाएर राख्नुपर्छ । शरीरलाई चिसोबाट जोगाउन टोपी, पन्जा र शरीर पूरै ढाक्ने कपडा लगाउनुपर्छ । निमोनियाको जोखिम रहेका व्यक्तिले विशेष सावधानी अपनाउनुपर्छ । स्वास्थ्यमा कुनै समस्या नभएका व्यक्तिलाई पनि चिसोमा रुघाखोकी लागिरहने डर हुन्छ ।

जाडो महिनामै भाइरल प्रकोप सुरु हुने गरेका छन् । अहिले विश्वको ध्यान कोरोनाभाइरसमा केन्द्रित छ । यसका कारण हजारौँ मानिस अस्पताल भर्ना भएर बस्नुपरेको छ भने झन्डै दुई दर्जनले ज्यानै गुमाइसकेको अवस्था छ । यस्ता भाइरस रुघाखोकीबाटै सर्ने हुन् । माक्सको प्रयोग गर्ने, भिडभाडमा जान कम गर्ने, हात राम्रोसँग धोएर मात्र खाना खाने गरेमा रुघाखोकीबाट बच्च सकिन्छ ।

रुघाखोकीको जोखिमबाट बच्न इन्फ्लुएन्जाको खोप लगाउन सकिन्छ । यसले भाइरसबाट बच्न मद्दत गर्छ । जाडो महिना सुरु हुनु एक महिनाअघिबाटै खोप लगाउँदा निमोनिया हुन पाउँदैन । निमोनियाको बढी जोखिम हुने लामो समयदेखि दम, मुटु तथा मिर्गौलाको समस्या, सुगर भएका बिरामीले खोप लगाउँदा राम्रो हुन्छ ।

साधारण उपाय अपनाएर चिसोको संक्रमणबाट हुने रोगबाट सुरक्षित रहन सकिन्छ । स्वास्थ वातावरण र शैलीमा जीवनयापन गर्न सकियो भने निमोनियाबाट बच्न सकिन्छ । निमोनिया भइहाल्यो भने उपचार त सजिलै पाइन्छ, तर जोगाउन सकिन्छ वा सकिँदैन भन्ने शरीरको प्रतिरक्षात्मक क्षमतामा भर पर्छ । खोपबारे जनचेतना जगाउन सके ३ वर्षमै निमोनियाको दर घटाउन सकिन्छ ।

प्रत्येक वर्ष एकपटक इन्फ्लुएन्जा खोप लगाएमा निमोनियालाई धेरै हदसम्म कम गर्न सकिन्छ । एक खोपबराबर १ हजार ५ सय पर्छ, तर यसले लाखौँको प्रतिफल दिन्छ । यसले रुघाखोकी, निमोनियाजस्ता जाडो मौसममा देखिने समस्या कम गर्न मद्दत गर्छ । तर, निमोनिया नै नहुने खोप भने पाइँदैन । भइहालेको खण्डमा रगतमा हुने कीटाणु फैलिने गर्छ, जुन खोपले धेरै हदसम्म घटाउँछ । खासगरी ६५ वर्ष नाघेका मानिसले वर्षमा एकपटक खोप लगाउनुपर्छ ।

निमोनियाको लक्षण खोकीबाट सुरु हुन्छ । यसले ज्वरो उत्पन्न भई श्वासप्रश्वासमा समस्या ल्याउँछ । यो समस्या जसलाई पनि हुन्छ । निमोनिया हुँदा फोक्सोमा घाउ हुने तथा खकार निस्किने गर्छ । खकार अन्य कारणले पनि निस्किन्छ, जस्तो कि क्षयरोग । निमोनियाको उपचार आइसियूमै राखेर गर्नुपर्ने हुन्छ । श्वासप्रश्वासको मात्रा तलमाथि भएमा भेन्टिलेटरमै राख्नुपर्ने हुन्छ । यसमा रगतका कीटाणु फोक्सोबाट फैलिएर श्वासप्रश्वासमा समस्या निम्त्याई अक्सिजनको मात्रा धेरै घट्ने लक्षणसमेत हुन्छ ।

साधारण उपाय अपनाएर चिसोको संक्रमणबाट हुने रोगबाट सुरक्षित रहन सकिन्छ । स्वास्थ वातावरण र शैलीमा जीवनयापन गर्न सकियो भने निमोनियाबाट बच्न सकिन्छ । निमोनिया भइहाल्यो भने उपचार त सजिलै पाइन्छ, तर जोगाउन सकिन्छ वा सकिँदैन भन्ने शरीरको प्रतिरक्षात्मक क्षमतामा भर पर्छ । खोपबारे जनचेतना जगाउन सके ३ वर्षमै निमोनियाको दर घटाउन सकिन्छ ।

अस्पताल, क्लिनिकमा चिसो मौमसमा बिरामीको अवस्था हेर्दा ५० प्रतिशत निमोनियाको समस्या लिएर आउँछन् । यसको बचाउ समयमै नहुँदा धेरै समस्यामा पर्ने गरेका छन् । कुनै व्यक्तिलाई केही दिनदेखि लगातार खोकी लागिरहेको छ, श्वासप्रश्वासमा समस्या छ, होस हराउँदै गएको छ भने निमोनिया भएको हुन सक्छ । यस्तो समस्या देखिएमा समयमै अस्पताल पुगेको खण्डमा उपचार सम्भव छ ।

(हेल्थपोस्टकर्मी पुष्पराज चौलागाईंसितको कुराकानीमा आधारित)

  • ताजा समाचार
  • जनप्रिय

हेल्थपोष्ट टुइट्स सबै

विराट मेडिकल कलेजमा हिप ज्वाइन्टको सफल प्रत्यारोपण

विराट मेडिकल कलेज टिचिङ हस्पिटलले हिप ज्वाइन्ट (नितम्बको जोर्नी) प्रत्यारोपणमा सफलता हात पारेको छ । गत साताको सोमबार (९ मंसिरमा) हस्पिटलमा हिप ज्वाइन्टको पहिलो सफल प्रत्यारोपण गरिएको हो । हाडजोर्नी रोग विशेषज्ञ डा. अजय महतोको नेतृत्वमा हस्पिटलले सो सफलता हासिल गरेको हो । निकै जटिल मानिने जोर्नी प्रत्यारोपण सर्जरी नेपालको पूर्वाञ्चलमा त्यति विकसित नभइसकेका कारण धेरैजसो बिरामी उपचारका लागि भारतलगायत अन्य देशमा जान बाध्य छन् । तर, विराट मेडिकल कलेजमै गुणस्तरीय सेवा उपलब्ध भएपछि बिरामीलाई ठूलो राहत पुग्ने भएको छ ।

अस्पतालले हिप ज्वाइन्टको प्रत्यारोपणसँगै घुँडाको प्रत्यारोपण र दूरवीनद्वारा गरिने शल्यक्रिया सेवासमेत दिने भएको छ । भारतको दिल्लीस्थित बहुप्रतिष्ठित एम्स हस्पिटलबाट विशेषज्ञता र फेलोसिप गरेका डा. अजय महतोले विराटमा सेवा सुरु गरेका हुन् । सप्तरी निवासी ७० वर्षीय उमेशप्रसाद साहको दुवै हिप ज्वाइन्ट एभिएन रोगले बिग्रिँएको थियो ।

उनले दाहिने हिपको प्रत्यारोपण दुई वर्षअघि धरानमा गराएका थिए, तर राम्ररी हिँड्न सकेका थिएनन् । देब्रे हिप पूर्ण रूपले बिग्रिएको र ज्वाइन्टमा खाल्डोसमेत भएकाले उनी वाकर र ह्विल चेयरको सहारामा हिँडडुल गर्न बाध्य थिए । तर, विराटमा देब्रे हिप ज्वाइन्टको सफल प्रत्यारोपणपछि उनी विनासहारा हिँड्न सक्ने अवस्था सिर्जना भएको छ । अब उनी विनादुखाइ जहाँ पनि हिँडडुल गर्न सक्ने भएका छन् ।

साहको जटिल शल्यक्रियामा डा. अजय महतोको नेतृत्वमा डा. मिथलेश गुप्ता, एनेस्थेसिया विशेषज्ञ डा. कनकलगायतको सहभागिता थियो । सफलतासँगै अस्पतालले शल्यक्रियामा संलग्न सम्पूर्ण टिमलाई बधाई तथा धन्यवाद दिएको छ । ‘यस्तो रोगको उपचारका लागि विराट मेडिकल कलेज टिचिङ हस्पिटल सधैँ तत्पर छ,’ अस्पतालले जनाएको छ । डा. महतोका अनुसार बुढेसकालमा हुने आस्टिआर्थिट्रिक वा कुनै रोग जस्तै, टिबी, गाठिया, बाथरोग, एभिएनका कारण घुँडा र हिप ज्वाइन्ट बिग्रिन्छ । यो पूर्ण रूपले बिग्रिँदा बिरामीलाई हिँड्दा दुख्ने, दुखाइको डरले घरबाट बाहिर निस्कन मन नलाग्ने, आफूले गर्ने नियमित काम गर्न नसक्ने हुन्छ । ‘यस्तो बिरामीलाई घुँडा वा हिप ज्वाइन्टको प्रत्यारोपण गरी कृत्रिम जोडको आवश्यकता हुन्छ,’ डा. महतो भन्छन् ।

  • ताजा समाचार
  • जनप्रिय

हेल्थपोष्ट टुइट्स सबै

स्वास्थ्यबिमा लागू भएसँगै विराट मेडिकल कलेज टिचिङ हस्पिटलबाट लाभान्वित हुनेक्रम बढ्दो

‘स्वास्थ्यबिमा सम्बन्धमा व्यवस्था गर्न बनेको ऐन–२०७४’ लागू भएसँगै विभिन्न निकायले यसलाई कार्यान्वयनमा ल्याउन थालेका छन् । सरकारी स्तरमा मात्रै नभएर निजी अस्पतालहरूले पनि स्वास्थ्यबिमालाई प्राथमिकतामा राखेको पाइन्छ ।

पूर्वको विराट मेडिकल कलेज टिचिङ हस्पिटलमा पनि बिमा योजना प्रभावकारी बन्दै गएको कलेजका अध्यक्ष डा. ज्ञानेन्द्र कार्कीले जानकारी दिए । उनका अनुसार स्वास्थ्यबिमा गराउनेको संख्या दैनिक बढ्दो छ । उनी भन्छन्, ‘समयमै स्वास्थ्यबिमा गराइराख्यो भने आपत्कालीन अवस्थामा पैसाका लागि छटपटिनुपर्दैन ।’

बुढीगंगा गाउँपालिका–२, टंकीसिनवरीस्थित विराट मेडिकल कलेज टिचिङ हस्पिटलमा पनि ‘स्वास्थ्यबिमा सेवा’को सुरुवात भएपछि यो सेवा लिने स्थानीयको संख्या बढ्न थालेको छ । स्वास्थ्यबिमा लागू भएपछि स्थानीय सबैभन्दा बढी लाभान्वित भएको अस्पतालले जानकारी दिएको छ ।

७० वर्षमाथिका ज्येष्ठनागरिकलाई पनि सरकारले थप सेवा दिन थालेको छ । उनीहरूले बर्सेनि एक लाख रूपैयाँबराबरको निःशुल्क उपचार सुविधा पाउन थालेका छन् । मन्त्रिपरिषद् बैठकले ‘स्वास्थ्यबिमा नियमावली २०७५’ले ज्येष्ठनागरिकको बिमाशुल्क सरकारले तिर्ने व्यवस्था गरेको छ । स्वास्थ्यबिमा बोर्डको आकलनअनुसार मुलुकमा ७० वर्षमाथिको जनसंख्या करिब १० लाख छ ।

नियमावलीअनुसार राष्ट्रिय स्वास्थ्यबिमा कार्यक्रमअन्तर्गत परिवारका ५ जनासम्म सदस्यले ३ हजार ५ सय रूपैयाँ तिरेर एक वर्षका लागि बिमाअन्तर्गत उपचारसेवा लिन सक्छन् । यसअघि वार्षिक २ हजार ५ सय रूपैयाँ प्रिमियम तिरेर ५ जनाको परिवारले स्वास्थ्यबिमाअन्तर्गत वार्षिक ५० हजार रूपैयाँबराबरको स्वास्थ्योपचार सेवा पाउने प्रावधान थियो । एक हजार प्रिमियर बढाउँदा उपचारसेवामा ५० हजार थप गरी एक लाखबराबरको उपाचारसेवा पाउने प्रावधान ल्याइएको छ । ५ जनासम्मको परिवारका हकमा प्रतिसदस्य १० हजारबाट बढाएर २० हजारबराबरको उपचारसेवा पाउने व्यवस्था गरिएको हो ।

नयाँ नियमअनुसार एउटा परिवारमा ५ जनाभन्दा बढी सदस्य भए प्रत्येक सदस्यबापत थप ७ सय रूपैयाँ तिर्नुपर्छ । सदस्यसंख्या थपिँदा एउटा परिवारले अधिकतम २ लाख रूपैयाँसम्मको बिमा गराउन पाउँछन् । बिमांक रकम धेरै नहुने भए पनि स्वास्थ्यबिमा साक्षरतामा सरकारले ध्यान दिन भने सकेको पाइँदैन ।

बिमासेवा प्रायः सबैखाले रोगको उपचारमा प्रयोग हुन्छ । सरकारले पहिले नै निःशुल्क गरेको रोगको उपचारसेवा भने यथावत् रहन्छन् । बिमित र स्वास्थ्यसंस्थाबीचको दूरी राम्रो बन्न सक्यो भने यो सेवा अझै प्रभावकारी बन्ने देखिन्छ । स्वास्थ्यबिमा बोर्डले पनि यसलाई प्रभावकारी ढंगले लैजानुपर्ने सुझाब सरोकारवालाको छ ।

पहिलोपटक गरेको बिमाको अवधि एक वर्ष हुन्छ । अर्को वर्ष सेवा लिन तोकिएको प्रिमियम बुझाएर बिमा नवीकरण गराउनुपर्छ । जनतालाई आधारभूत स्वास्थ्यसेवा उपलब्ध गराउन २५ चैत ०७२ देखि सरकारले कैलालीबाट स्वास्थ्यबिमा कार्यक्रम सुरु गरेको हो ।

बिमितले आफूलाई पायक पर्ने तोकिएका सरकारी वा निजी स्वास्थ्यसंस्थामा गई बिमा फर्म भरेर उपचार सुविधा लिन सक्छन् । त्यहाँ उपचार हुन नसकेमा रेफरल प्रणालीमार्फत जिल्ला, अञ्चल, क्षेत्र वा केन्द्रीय अस्पतालमा उपचार गराउन पाइन्छ । गाउँका स्वास्थ्यसंस्थामा उपचार र औषधि दुवै नहुँदा एकैपटक केन्द्रीय अस्पताल आउन चाहनेलाई बिमा झन्झटिलो लाग्न सक्छ ।

स्वास्थ्यबिमाले विलासिता तथा स्वसिर्जित घटनामा उपचारसेवालाई बन्देज गरेको छ । जस्तै, प्लास्टिक सर्जरी, महँगा चस्मा, कान सुन्ने मेसिन र कुटपिट वा रक्सी खाएर झगडा गरी घाइते भएकाले उपचारमा बिमामार्फत सेवा नपाउने व्यवस्था छ ।

  • ताजा समाचार
  • जनप्रिय

हेल्थपोष्ट टुइट्स सबै

विराट मेडिकल कलेज टिचिङ हस्पिटलमा स्वास्थ्यबिमा कार्यक्रम

मोरङको बूढीगंगा गाउँपालिका–२, टंकीसिनवरीमा अवस्थित विराट मेडिकल कलेज टिचिङ हस्पिटलमा आजकल स्वास्थ्यबिमा गरेका बिरामीको भिड लाग्ने गरेको छ । अस्पतालबाट सरकारी स्वास्थ्यबिमा कार्यक्रमअन्तर्गत सेवाप्रवाह हुन थालेपछि आसपास क्षेत्रका बिमितहरू स्वास्थ्योपचारका लागि अस्पताल आउन थालेका हुन् । हाल करिब ४४ जिल्लामा चलिरहेको स्वास्थ्यबिमा कार्यक्रम चालू आर्थिक वर्षभित्र ७७ वटै जिल्लामा विस्तार गरिसक्ने घोषणा सरकारले गरिसकेको छ । यससँगै बिमाअन्तर्गतको उपचार सेवाप्रदायक स्वास्थ्यसंस्था पनि बढिरहेका छन् ।

स्वास्थ्यसेवाको खर्चलाई परिवारले धान्न सक्ने स्थितिमा ल्याउन, स्वास्थ्य समस्याका कारण हुन सक्ने जोखिमलाई न्यूनीकरण गर्न ल्याइएको कार्यक्रम नै स्वास्थ्यबिमा हो । केही वर्षयता स्वास्थ्यबिमासम्बन्धी योजना बजेटमा परे तापनि कार्यान्वयन भने अझै सोचेजस्तो प्रभावकारी हुन सकिरहेको छैन । सरकारले सामाजिक सुरक्षाअन्तर्गत स्वास्थ्यबिमा कार्यक्रम ल्याएको हो । कार्यक्रममा आबद्ध ५ जनासम्मको परिवारले वार्षिक ३ हजार ५ सय रुपैयाँ प्रिमियम बुझाएपछि वार्षिक १ लाखसम्मको उपचारसेवा तोकिएका स्वास्थ्यसंस्थाबाट पाउने व्यवस्था छ । ५ भन्दा बढी सदस्यको हकमा प्रतिसदस्य ७ सयका दरले प्रिमियम थप गरी प्रतिसदस्य थप २० हजार गरी अधिकतम २ लाखसम्मको उपचारसेवा पाउने व्यवस्था छ ।

सरकारले स्वास्थ्यबिमाको अवधारणा अघि सारेपछि बिमा कम्पनीहरूले समेत स्वास्थ्यबिमा योजनालाई सरल बनाउन थालेका छन् । स्वास्थ्यबिमा गरेपछि बिरामी पर्दा वा चोटपटक लाग्दा उपचार खर्च बिमाबापत पाइन्छ । वार्षिक रुपमा निश्चित रकम तिरेपछि निश्चित रकमसम्मको उपचार खर्च बिमा कम्पनीमार्फत पाइन्छ ।

प्रदेश १ का विभिन्न जिल्लामा पनि यो स्वास्थ्यबिमा लागू भएयता जिल्लाका सर्वसाधारण तथा विपन्न वर्गलाई पनि स्वास्थ्योपचार गराउन सजिलो भएको छ । विराट मेडिकल कलेज टिचिङ हस्पिटलले स्वास्थ्यबिमाका बिरामीलाई छुट्टै काउन्टरको व्यवस्था गरी छिटो र सरल सेवा दिने प्रयास गरेको छ । पछिल्ला दिनहरूमा अस्पतालआसपासका क्षेत्रबाट आउने बिमित बिरामीको संख्या वृद्धि हुँदै गएको अस्पतालले जनाएको छ । अस्पतालले गुणस्तरीय सेवा प्रवाह गर्दै आएकाले पनि बिमित बिरामीको रोजाइमा अस्पताल परेको अस्पतालको दाबी छ ।

  • ताजा समाचार
  • जनप्रिय

हेल्थपोष्ट टुइट्स सबै