मुलुकी अपराध संहिता ऐन २०७४ संसोधनको माग गर्दै नेपाल चिकित्सक संघको आह्वानमा आइतबारदेखि देशभर विरोधका कार्यक्रम हुने भएको छ । संघ आइतबार एक दिनका लागि सांकेतिक हड्ताल आह्वान गर्दै देशभरका आकस्मिकबाहेका स्वास्थ्य सेवा ठप्प पार्ने घोषणा गरेको छ ।
त्यसैगरी सेवा छाडेर चिकित्सकहरुलाई १० बजे माइतीघरमा भेला भएर विरोध प्रदर्शन गर्ने कार्यक्रम तय भएको महासचिव डा.लोचन कार्कीले बताए । उनले १२ बजे माइतीघरमा प्रदर्शन राखिएको भएपनि विशेष कारणवशः १० बजे माइतीघरमा भेला हुने कार्यक्रम तय भएको जानकारी दिए । माइतीघरको विरोध प्रदर्शनपछि १२ बजे नेपाल मेडिकल काउन्सिल पुगेर ५ हजारभन्दा बढि चिकित्सकले आफ्ना प्रमाणपत्र फिर्ता गर्ने कार्यक्रम रहेको कार्कीले जानकारी दिए । अहिले कानूनका कारण चिकित्सकहरुले सेवा दिन नसक्ने भन्दै प्रमाणपत्र फिर्ता गर्ने कार्यक्रम तय भएको हो । देशभर रहेका संघका शाखाहरुबाट अप्रोन र प्रमाणपत्र सरकारलाई फिर्ता गर्न संकलन भइरहेको संघले जनाएको छ
नेपाल अर्थोपेडिक्स संघको ऐक्यवद्धता
नेपाल चिकित्सक संघले आह्वान गरेको विरोधका कार्यक्रमप्रति नेपाल अर्थोपेडिक्स संघले ऐक्यवद्धता जनाएको छ । चिकित्सक संघले आह्वान गरेको सम्पूर्ण कार्यक्रममा सहयोग र साथ दिन संघले सदस्यहरुलाई आह्वान गरेको छ । संघका अध्यक्ष ड.बुलन्द थापा र महासचिव डा.विमलकुमार पाण्डेले संयुक्त रुपमा विज्ञाप्ति जारी गरी मुलुकी ऐनविरुद्ध चिकित्सक संले गरेको पहल सराहनीय भएको भन्दै धन्यवादसमेत दिएको छ ।
