टेकुमा १ दिन, वीर र कान्तिमा ३ दिन, प्रसूतिगृहमा ४ दिन ओपिडी बन्द, आकस्मिक कक्षमार्फत जुनसुकैवेला सेवा

दसैँ बिदामा नियमित तथा आकस्मिक स्वास्थ्योपचार सेवाको उपलब्धता सबैको चासोको विषय हो । मुलुक दसैँमय बनिसकेको छ । तर, रोगले चाडपर्व भन्दैन । अझ वर्षदिनको प्रतीक्षापछि आएको महान्तम पर्व दसैँ विशेषगरी मिठा–मिठा परिकारसँग प्रत्यक्ष जोडिएकाले असन्तुलित तथा अधिक भोजनका कारण रोगको जोखिम झन् बढी हुन्छ । यस्तोमा चाडपर्वको लामो बिदामा स्वास्थ्योपचार सेवा उपलब्ध स्वास्थ्यसंस्थाबारे खुलदुली हुनु स्वाभाविक छ । त्यसैले यहाँ राजधानीका प्रमुख अस्पतालहरूमा दसैँ बिदामा स्वास्थ्यसेवाप्रवाहको अवस्थाबारे जानकारी प्रस्तुत गर्नु वाञ्छनीय छ ।

वीर अस्पताल
मुलुकै सबैभन्दा पुरानो र ठूलो अस्पताल वीरले दसैँमा ३ दिन ओपिडीसेवा बन्द गर्ने भएको छ । फूलपाती (आज) शनिबार परेकाले यसै पनि ओपिडीसेवा बन्द नै छ । अष्टमी, नवमी र दशमीका दिन अस्पतालमा ओपिडीसेवा बन्द रहने निर्देशक डा. केदार सेन्चुरीले जानकारी दिए । तर, आकिस्मक सेवा भने सधैँ खुला रहनेछ । आकस्मिक कक्षमा सेवाका लागि आउने बिरामीका लागि भने सबैखाले सेवा उपलब्ध गराउने तयारी गरेको उनको भनाइ छ । त्यसका लागि हरक्षण डाक्टर उपलब्ध हुने डा. सेन्चुरीले जानकारी दिए । ‘चाडपर्वका वेला अस्पताल बन्द हुन्छ भन्ने भ्रम कसैलाई नहोस्,’ डा. सेन्चुरी भन्छन्, ‘वीरमा आएका बिरामीले सेवा नपाएर फर्कनुपर्ने छैन ।’

कान्ति बाल अस्पताल
कान्ति बाल अस्पतालले पनि दसैँ बिदामा जम्मा ३ दिन ओपिडीसेवा बन्द गर्ने भएको छ । अस्पतालका निर्देशक डा. आरपी बिच्छाका अनुसार दसैँमा अष्टमीदेखि मंगलबार (टीकाको दिन) सम्म ओपिडीसेवा बन्द रहनेछ । ओपिडी बन्द रहे पनि आकस्मिक सेवा भने २४ घण्टै खुला रहने निर्देशक बिच्छा बताउँछन् । ‘अस्पतालमा आएका बिरामी सबैले सेवा पाऊन्, दसैँका कारण केही पनि सेवाविहीन घर नफर्कियून् भन्ने उद्देश्यका साथ तयारी गरेका छौँ,’ डा. बिच्छाले भने, ‘यसका लागि हामीले थप ३ जना डाक्टर राखेका छौँ, जतिसुकैवेला अस्पताल आउँदा बिरामीले सेवा पाउनेछन् ।’

टेकु अस्पताल
शुक्रराज ट्रपिकल तथा सरुवारोग अस्पतालमा दसैँको टीकाको दिनबाहेक ओपिडीसेवा सुचारु रहनेछ । डेंगुको महामारी फैलिरहेको तथा अत्यावश्यक रेबिज तथा सर्पदंशको भाक्सिन लगाउनुपर्ने भएको हुँदा अस्पतालमा सेवा बन्द नगरिएको निर्देशक डा. वासुदेव पाण्डे बताउँछन् ।
‘टीकाको दिनबाहेक अन्य दिनमा बिहान ९ बजेदेखि हिउँसो २ बजेसम्म ओपिडी खुला रहनेछ,’ डा. पाण्डे भन्छन्, ‘सेवा अवरुद्ध नहोस् भनेर डाक्टर तथा कर्मचारीको बिदा चाडपर्वअनुसार आलोपालो मिलाएका छौँ ।’

प्रसूतिगृह
थापाथलीस्थित परोपकार प्रसूतिगृहमा आइतबारदेखि बुधबारसम्म ओपिडीसेवा बन्द रहनेछ । आकस्मिक सेवा भने हरेक दिन २४ घण्टै सुचारु रहने अस्पतालले जनाएको छ । दसैँमा अष्टमी, नवमी, दशमी र एकादशी गरी ४ दिन ओपिडी सेवा बन्द रहने निर्देशक डा. जागेश्वर गौतमले जानकारी दिए । उनका अनुसार आकस्मिक कक्षमा युनिट–युनिट गरी ड्युटी मिलाएर सेवा सुचारु गरिनेछ ।

नियमित १० देखि १२ जनाको संख्यामा चिकित्सक अस्पतालमा रहने गौतम बताउँछन् । दसैँ बिदाको हरेक दिन, टीकाको दिनसमेत अस्पतालमा चिकित्सक कार्यरत रहने उनको भनाइ छ । तर, टीकाको दिन भने केही समय ब्रेक गराउन निर्देशन दिएको गौतम बताउँछन् । उनका अनुसार ६ घण्टा ड्युटीमा रहँदा टीकासमेत लगाउन नपाउने अवस्था आउने भएकाले ब्रेक गराउन भनिएको हो । दसैँ, टीका तथा अन्य कुनै पनि कुराले डेलिभरी नरोकिने भएकाले निरन्तर सेवा दिइने गौतम बताउँछन् ।

‘दसैँका वेला झन् धेरै जोखिमका केस आउने गरेका छन् । जति बिरामी आउँछन्, जोखिमकै बढी हुन्छन्,’ डा. गौतम अनुभव सुनाउँछन्, ‘त्यसकारण चाडपर्वका वेला चिकित्सकहरू अन्य समयभन्दा झनै व्यस्त हुन्छन् ।’

  • ताजा समाचार
  • जनप्रिय

हेल्थपोष्ट टुइट्स सबै

प्रसूतिगृहको ‘टेस्टट्युब बेबी केन्द्र’ अब कुपन्डोलमा

परोपकार प्रसूतिगृहले थापाथलीस्थित अस्पताल भवनमा चल्दै आएको टेस्टट्युब बेबी केन्द्रलाई कुपन्डोलमा सार्ने भएको छ । कुपन्डोलमा ३५ रोपनी जग्गामा निर्मित प्रसूतिगृहको नयाँ भवनमा टेस्टट्युब बेबी केन्द्र सार्न लागेको निर्देशक डा.जागेश्वर गौतमले बताए ।डा.गौतमका अनुसार हाल केन्द्र सञ्चालनमा रहेको भवन साँघुरो भएको तथा भूकम्पका कारण भवनमा आंशिक क्षति पुगेका कारण कुपन्डोलमा सार्न लागिएको हो । हाल केन्द्रमार्फत मासिक एकपटक मात्र सेवा दिँदै आएकोमा कुपन्डोलमा सारेपश्चात् दैनिक सेवाप्रवाह गर्ने निर्देशक गौतमको दाबी छ ।

प्रसूतिगृहले टेस्टट्युब बेबी केन्द्रका लागि आवश्यक जनशक्ति परिपूर्तिका लागि छात्रवृत्तिमा एक चिकित्सकलाई विदेश पढ्न पठाएको छ । अध्ययन सकेर आएपश्चात् ती चिकित्सकले टेस्टट्युब बेबी केन्द्रमा योगदान गर्ने गौतम बताउँछन् । नीजि क्षेत्रमा लामो समयदेखि यो सेवा सुरु भएपनि सामान्य मानिसको पहुँचमा हुनेगरी प्रसुति गृहको सेवा निकै सुलभ छ । प्रसूतिगृहमा २०७० पुस ९ मा पहिलोपटक प्रसुति गृहमा टेस्टट्युब प्रविधिबाट बच्चा जन्मिएको थियो । यो प्रविधिमा पुरुषको शुक्रकीट र महिलाको डिम्बलाई कृत्रिम तरिकाले निकालेर प्रयोगशालामा मिलाएर भ्रूण विकास गराएपछि गर्भाधान गराएर पाठेघरमा प्रत्यारोपण गरिन्छ ।

सुरुमा अस्पतालमा पहिलोपटक ९ जना महिलामा टेस्ट्युबबेबी प्रविधि प्रयोग गरिएकोमा एउटा पनि सफल नभएपछि लामो समयसम्म सेवा नै रोकिएको थियो । सफलतापछि पनि समयसमयमा सेवा अवरुद्ध हुने गरेको छ ।

टेस्ट्युबबेबीसँगै अस्पतालले थुपै सेवा र सेन्टर थप्दै गएको छ । बिरामीको अत्यधिक चापका कारण दिनानुदिन सेवा अपुग हुन थालेपछि सेवाविस्तारका क्रममा अस्पतालले आफ्नै केन्द्रका रूपमा ललितपुरको भैँसेपाटीमा ओपिडी सेवाको थालनी गरिसकेको छ । त्यहाँबाट स्त्रीरोग तथा प्रसूति ओपिडी, बालरोग ओपिडी, अल्ट्रासाउन्ड, ल्याबसहितको ओपिडी सेवा उपलब्ध गराइँदै आएको छ । हाललाई ओपिडीबाट सेवा सुरु गरिए पनि बिरामीको चाप बढ्दै जाँदा शल्यक्रिया सेवासमेत त्यहीँ प्रदान गरिने निर्देशक गौतम बताउँछन् ।

त्यसैगरी, प्रसूतिगृहले थानकोट र मध्यपुर ठिमीमा आफ्ना प्रारम्भिक शाखा विस्तार गर्न सकिने अध्ययनसहित स्वास्थ्य मन्त्रालयलाई अनुरोधसहितको पत्र पठाइसकेको छ । अस्पतालको क्षमताभन्दा बिरामीको चाप अत्यधिक भएका कारण सेवाको गुणस्तर कायम गर्नसमेत गाह्रो भएका कारण शाखा विस्तारको नीति अगाडि बढाइएको हो ।

  • ताजा समाचार
  • जनप्रिय

हेल्थपोष्ट टुइट्स सबै

अब थानकोट र मध्यपुर ठिमीमा पनि प्रसूतिगृहका शाखा


परोपकार प्रसूतिगृहले आफ्नोको शाखा विस्तारका लागि स्वास्थ्य मन्त्रालयलाई अनुरोध गरेको छ । थानकोट र मध्यपुर ठिमीमा प्रारम्भिक रूपमा शाखा विस्तार गर्न सकिने अध्ययनसहित मन्त्रालयलाई लेखेर पठाएको प्रसूतिगृहका निर्देशक जागेश्वर गौतम बताउँछन् । गौतमका अनुसार कति बेडको शाखा विस्तार गर्ने भन्नेबारे अहिलेसम्म यकिन भइसकेको छैन । नेपाल सरकारको समन्वयमा कति बेडको शाखा विस्तार गर्ने भन्ने निधो हुने उनको भनाइ छ । जर्मन इन्टरनेसनलको अप्रेसन एजेन्सीले उक्त शाखा विस्तारको काम गर्न लागेको हो ।

बिरामीको अत्यधिक चापका कारण चिकित्सकहरूले उचित सेवासमेत दिन नसक्ने अवस्था आउन सक्ने भएकाले शाखा विस्तारका लागि पहल गरिएको गौतम बताउँछन् । उनका अनुसार प्रसूतिगृहमा सेवाको गुणस्तरकै कारण बिरामीको चाप अत्यधिक बढेको हो । तर, क्षमताभन्दा बिरामीको चाप अत्यधिक भएका कारण सेवाको गुणस्तर कायम गर्न समस्या हुने गरेको छ ।

थापाथलीस्थित प्रसूतिगृहले वार्षिक करिब २१ हजार महिलाको डेलिभरी गराउँदै अएको छ । यसरी एकै ठाउँमा यति ठूलो मात्रामा डेलिभरी गराउनु निकै चुनौतीपूर्ण छ । बिरामीको अत्यधिक चापका कारण चिकित्सकहरूले उचित सेवासमेत दिन नसक्ने अवस्था आउन सक्ने भएकाले शाखा विस्तारका लागि पहल गरिएको गौतम बताउँछन् । उनका अनुसार प्रसूतिगृहमा सेवाको गुणस्तरकै कारण बिरामीको चाप अत्यधिक बढेको हो । तर, क्षमताभन्दा बिरामीको चाप अत्यधिक भएका कारण सेवाको गुणस्तर कायम गर्न समस्या हुने गरेको छ । बिरामीको अत्यधिक चापले समयमै उपचार गराउन नसकिने तथा बिरामीको अवस्थाअनुसार उचित बेडसमेत उपलब्ध गराउन नसक्ने अवस्था छ ।

प्रसूतिगृहले आफ्नै केन्द्रका रूपमा ललितपुरको भैँसेपाटीमा ओपिडी सेवा सुरु गरिसकेको छ । त्यहाँ स्त्रीरोग तथा प्रसूतिको ओपिडी, बालरोगको ओपिडी, अल्ट्रासाउन्ड, ल्याबसहितको ओपिडी सेवा उपलब्ध छन् । हाललाई ओपिडी सेवा मात्र सञ्चालनमा भए पनि बिरामीको चाप बढ्दै जाँदा त्यहीँ डेलिभरी सेवासमेत विस्तार गरिने निर्देशक गौतम बताउँछन् । उनका अनुसार शल्यक्रियाको सेवा दिन बिरामीको चाप पुग्नुपर्ने हुन्छ । हाल भैँसेपाटीबाट ओपिडी सेवा लिइरहेका बिरामीलाई डेलिभरीका लागि थापाथली रेफर गर्ने गरिएको छ ।

  • ताजा समाचार
  • जनप्रिय

हेल्थपोष्ट टुइट्स सबै

प्रसूतिगृहको नयाँ भवन कुपन्डोलमा

परोपकार प्रसूतिगृह थापाथलीले कुपन्डोलमा २ सय शय्याको भवन बनाउने भएको छ । अस्पतालका निर्देशक जागेश्वर गौतमका अनुसार बिरामीको बढ्दो चाप तथा सेवाको गुणस्तरलाई ध्यान दिई २ सय शय्याको भवन थप गर्न लागिएको हो । हाल अस्पतालले ४ सय १५ शय्यामार्फत बिरामीलाई सेवा दिँदै आएको छ ।

अस्पतालले कुपन्डोलमा ३ करोड लगानीमा भवन निर्माण सुरु गर्न लागेको हो । त्रिवर्षीय योजनाअनुसार नयाँ भवनको निर्माण कार्य सम्पन्न हुने गौतम बताउँछन् । भवन निर्माण पूर्णतः सरकारी लगानीमा हुन लागेको हो । भवन निर्माण सम्पन्न भएपश्चात् अस्पतालले दिँदै आएको सेवामा विस्तार र गुणस्तरमा वृद्धि आउने गौतम बताउँछन् । यसका साथै भवन निर्माणपश्चात् अस्पतालले सुपर स्पेसालिटी सेवा, गाइनो अल्कोली, मिमल्ली इन्भेसी सर्भे, थिनो मेटरनललगायत सेवासमेत विस्तार गर्ने उनको भनाइ छ ।

स्थापनाकालमा ४० शय्याबाट सुरु भएको प्रसूतिगृहमा अहिले ४ सय १५ शय्या सञ्चालनमा छन् । ०७२ को भूकम्पले अस्पतालको मुख्य भवन क्षतिग्रस्त भएपश्चात् अस्पताल ३ सय ५० शय्यामा खुम्चिएको थियो । बिरामीको चाप अत्यधिक बढेका कारण कतिपय अवस्थामा अस्पताल भर्ना हुन आउने बिरामीले विनाबेड उपचार गराउनुपर्ने बाध्यता भएका कारण शय्या बढाउन आवश्यक भएको गौतमको भनाइ छ ।

अस्पतालले आर्थिक वर्ष ०७३/७४ देखि नवजात शिशु निःशुल्क उपचार सेवासमेत विस्तार गरेको छ । शय्या अभावका कारण बिरामीलाई नफर्काउने तथा रेफर नगर्ने अस्पतालको स्थापनाकालदेखिकै नीतिअनुसार आवश्यक पर्दा अस्थायी शय्याको समेत व्यवस्था गरी सेवा दिने गरेको गौतम बताउँछन् । सरकारले उच्च मातृमृत्युदर कम गर्न लागू गरेको ‘आमा सुरक्षा कार्यक्रम’लाई सफल कार्यान्वयन गराउन प्रसूतिगृहले अहम् भूमिका खेलेको गौतमको दाबी छ ।

प्रसूतिगृहले आर्थिक वर्ष ०७४/७५ मा २८ हजार ५ सय ३ बिरामी अस्पताल भर्ना हुन आएकामा डेलिभरी केसका २० हजार ६ सय ८० को सफल डेलिभरी गराएको तथ्यांकसमेत सार्वजनिक गरेको छ । अस्पतालले औसतमा दैनिक ५७ महिलाको डेलिभरी गराउने गरेको छ ।
परोपकार प्रसूतिगृह राष्ट्रिय स्वास्थ्य अनुसन्धान परिषद्बाट आइआरसी मान्यता पाई स्वतन्त्र रुपमा अनुमति दिन योग्य संस्था भइसकेको गौतम बताउँछन् । राष्ट्रिय स्वास्थ्य बिमा कार्यक्रममा अस्पतालले उल्लेख्य योगदान पुर्याएको उनको दाबी छ ।

अस्पतालमा हरेक प्रकारका अस्पतालजन्य फोहोरमैला व्यवस्थापनका लागि विस्तृत अध्ययन गरी बायोग्यास प्लान्ट निर्माण गरिएको छ । जसमा अस्पतालबाट दैनिक निस्कने सालनाल तथा सड्ने फोहोरसमेत प्रयोगमा ल्याइएको छ । अन्य किसिमका फोहोरलाई विश्व स्वास्थ्य संगठनको मापदण्डअनुसार छुट्याई बिक्री–वितरणमार्फत आयआर्जनसमेत गर्ने गरिएको छ ।

विभिन्न सरकारी तथा गैरसरकारी नर्सिङ कलेजहरुको विशेषगरी प्रसूति नर्सिङ (मिडवाइफरी) शिक्षाका लागि प्रसूतिगृह केन्द्र बनेको छ । ०७३ देखि अस्पतालले आफैँ परोपकार नर्सिङ क्याम्पस सञ्चालन गर्दै आएको र निकट भविष्यमा देशको आवश्यकताअनुसार मिडवाइफरी नर्सिङ अध्यापन कार्यक्रमसमेत सञ्चालन गर्ने लक्ष्य लिएको अस्पतालले जनाएको छ ।

  • ताजा समाचार
  • जनप्रिय

हेल्थपोष्ट टुइट्स सबै