प्रसूतिगृहले मनायो ६०औँ वर्षगाँठ, वर्षदिनमा २४,१४७ डेलिभरी, २ लाखलाई ओपिडीसेवा

थापाथलीस्थित परोपकार प्रसूति तथा स्त्रीरोग अस्पतालले स्थापनाको ६ दशक पार गरेको छ । अस्पताले शुक्रबार स्थापनाको ६०औँ वार्षिकोत्सव मनाएको हो । वि.सं. २०१६ मा ४० शैय्याबाट सेवा सुरु गरेको अस्पतालले हाल ४ सय ८९ शैय्यामार्फत बिरामीलाई सेवा दिइरहेको छ ।

वार्षिकोत्सवका अवसरमा आयोजित समारोहमा अस्पताललको प्रगति विवरण पेस गर्दै निर्देशक प्रा.डा. जागेश्वर गौतमले अस्पतालको वार्षिक आम्दानी २० करोड रहेको जानकारी दिए । ‘अस्पतालमा दैनिक औसत ६६ महिला सुत्केरी हुने गरेका छन्,’ ‘डा. गौतमले भने, ‘पछिल्लो समय अस्पतालमा स्वाभाविकभन्दा सिजेरियन सेक्सनबाट बच्चा जन्माउने संख्या वृद्धि भइराखेको छ । तर, हामीले आमा र बच्चालाई जोखिम भएको खण्डमा मात्र शल्यक्रिया गर्दै आएका छौँ ।’ अस्पतालमा करिब २१ प्रतिशत प्रसूतिमा मात्र शल्यक्रियाको प्रयोग हुने गरेको डा. गौतमले बताए ।

गत वर्ष २४,१४७ महिलाले जन्माए प्रसूतगृहमा बच्चा
अस्पतालको तथ्यांकअनुसार गत आर्थिक वर्षमा कुल ३० हजार ६ सय २७ महिला भर्ना भएकामा २४ हजार १ सय ४७ जनाले बच्चा जन्माएका थिए । अस्पतालले सञ्चालन गरेको सुरक्षित गर्भपतन सेवामार्फत गत वर्ष १ हजार २ सय ६६ महिलाले सेवा लिएका छन् । त्यसैगरी ५ वर्षअघि ओपिडीसेवा लिने बिरामीको संख्या १ लाख रहेकोमा हाल २ लाखभन्दा बढीले वार्षिक सेवा लिँदै आएको गौतमले जानकारी दिए ।

वार्षिकोत्सव कार्यक्रमका प्रमुख अतिथि उपप्रधान एवम् स्वास्थ्य तथा जनसंख्यामन्त्री उपेन्द्र यादवले सुत्केरी हुन नसकी अकालमा कुनै आमा तथा नवजात शिशुको मृत्यु हुन नदिने विषय सरकारको उच्च प्राथमिकतामा रहेको दाबी गरे । सुरक्षित मातृत्व तथा प्रजनन स्वास्थ्य ऐन कार्यान्वयन गर्ने नियमावली तयार भएको जानकारी दिँदै मन्त्री यादवले प्रजनन सेवा र शिक्षाको केन्द्रीय अस्पतालका रूपमा रहेको प्रसूति अस्पताललाई थप सहयोग गर्ने आश्वासन दिए ।

 

  • ताजा समाचार
  • जनप्रिय

हेल्थपोष्ट टुइट्स सबै

प्रधानमन्त्रीबाट प्रसूतिगृहको पुनर्निर्मित भवन उद्घाटन, ५४% स्वास्थ्यसंस्थाको पुनर्निर्माण सम्पन्न

प्रधानमन्त्री केपी शर्मा ओलीले थापाथलीस्थित परोपकार प्रसूति तथा स्त्रीरोग अस्पतालको नयाँ भवनको उद्घाटन गरेका छन् । शुक्रबार बिहान अस्पतालमा आयोजित कार्यक्रमका बीच प्रधानमन्त्री ओलीले भवनको उद्घाटन गरेका हुन् ।

जापानी सहयोग नियोग (जाइका)को आर्थिक तथा प्राविधिक सहयोगमा करिब १५ महिना समय लगाएर निर्माण सम्पन्न गरिएको उक्त भवनबाट एक साताअघि नै सेवा सुरु भइसकेको छ । भवनको औपचारिक उद्घाटन भने सेवा सुरु गरेको एक सातापछि मात्र गरिएको हो । भवन निर्माणमा करिब १ अर्ब ३० करोड रुपैयाँ खर्च भएको अस्पतालले जनाएको छ ।

उद्घाटनपछि प्रधानमन्त्री ओलीले जापान सरकारलाई धन्यवाद दिँदै प्रसूतिगृहको नयाँ भवन निर्माण सम्पन्न भएको प्रति खुसी व्यक्त गरे । १२ वैशाख ०७२ को महाविनाशकारी भूकम्पले क्षति पुर्याएका संरचनाको पुननिर्माणसँगै नयाँ–नयाँ काम गरेर अगाडि बढ्नुपर्ने बताउँदै प्रधानमन्त्री ओलीले भने, ‘प्रसूतिगृहको भवन निर्माण भूकम्पपछिको पुनर्निर्माणको एक उदाहरणीय काम हो ।’

भवन मात्रै नयाँ नभएर अस्पतालले अत्याधुनिक सेवा पनि प्रदान गर्नेमा आफू विश्वस्त रहेको प्रधानमन्त्री ओलीको भनाइ थियो । उनले अस्पतालको पार्किङको स्तरोन्नति तथा अस्पतालको पारिपट्टि रहेको जग्गाका विषयमा पनि सरकारको ध्यानाकर्षण भएको बताए ।

वीरको नवनिर्मित भवनको पनि शुक्रबार नै उद्घाटन
यसैबीच, शुक्रबार नै वीर अस्पतालको नवनिर्मित भवनको पनि उद्घाटन गरिएको छ । जाइकाकै आर्थिक तथा प्राविधिक सहयोगमा निर्माण सम्पन्न भएको वीरको नयाँ भवनको उपप्रधान तथा स्वास्थ्य तथा जनसंख्यामन्त्री उपेन्द्र यादवले शुक्रबार दिउँसो उद्घाटन गरेका हुन् ।

काठमाडौंबाहिर पनि प्रसूति अस्पताल आवश्यक : स्वास्थ्यमन्त्री यादव
प्रसूतिगृहको भवन उद्घाटन कार्यक्रममा उपप्रधानमन्त्री एवम् स्वास्थ्य तथा जनसंख्यामन्त्री उपेन्द्र यादवले काठमाडौंबाहिर पनि अत्याधुनिक सेवायुक्त प्रसूति अस्पताल आवश्यक रहेको बताए । उनले नयाँ भवन निर्माणसँगै प्रसूतिगृह मुलुककै एक सुविधासम्पन्न अस्पताल बनेको बताए । स्वास्थ्यमन्त्री यादवले यस्तो अत्याधुनिक प्रविधिसम्पन्न अस्पताल काठमाडौंबाहिर पनि आवश्यक रहेको बताए ।

प्रसूतिगृहको भवन उद्घाटन कार्यक्रमलगत्तै मन्त्री यादव वीरको नवनिर्मित भवनको उद्घाटन गर्न पुगेका थिए ।

विश्वमा सबैभन्दा बढी डेलिभरी गराउने अस्पतालमा प्रसूतिगृह, यस वर्ष २७ हजार डेलिभरी

उद्घाटन कार्यक्रममा अस्पतालका निर्देशक डा. जागेश्वर गौतमले प्रसूतिगृहमा एक पैसा पनि खर्च गर्न नसक्ने बिरामीले पनि उपचार सेवा नपाएर फर्किनुनपर्ने बताए । निर्देशक गौतमले विश्वमा सबैभन्दा बढी डेलिभरी गराउने अस्पतालमा प्रसूतिगृह पनि पर्ने जानकारी गराए ।

‘विश्वमा सबैभन्दा बढी डेलिभरी गराउने अस्पतालमध्ये प्रसूतिगृह पनि एक हो,’ उनले भने, ‘यस वर्ष मात्रै अस्पतालले २७ हजारको प्रसूति गरायो ।’ प्रसूतिगृहमा सबै डेलिभरी निःशुल्क हुने बताउँदै निर्देशक गौतमले भने, ‘यहाँ कसैले पनि उपचार गर्न नसकेर फर्किनुपर्ने अवस्था छैन ।’ ४ सय शय्याको अस्पताल भूकम्पपछि ३ सय ५० शैय्यामा झरेपछि निम्तिएका समस्याका बाबजुद पनि प्रसूतिगृहले उत्कृष्ट सेवा दिइरहेको निर्देशक गौतमले दाबी गरे ।

नयाँ भवनमा यस्ता छन् सेवा–सुविधा
अस्पतालको नवनिर्मित भवनमा नयाँ भवनमा २४ शय्याको आकस्मिककक्ष, चिकित्सकको निगरानीमा हुने डेलिभरी रुम, नर्सको निगरानीमा हुने बर्थिङ सेन्टर, दुईवटा शल्यक्रियाकक्ष, पोस्टअपरेटिभ वार्ड, १२ शय्याको आमाका लागि आइसियू, ४० शय्याको बच्चाका लागि आइसियूलगायत सेवा सञ्चालनमा छन् ।

अन्तर्राष्ट्रिय दातृनिकायको सहयोगमा ६४३ स्वास्थ्यसंस्थाको पुनर्निर्माण, ५४% को पुनर्निर्माण सम्पन्न
०७२ को महाभूकम्पका कारण स्वास्थ्यसंस्थाहरूको भवन नराम्ररी क्षतिग्रस्त भएका थिए । कुल १ हजार १ सय ९७ स्वास्थ्यसंस्थाका भौतिक संरचनामा क्षति पुगेकोमा अन्तार्राष्ट्रिय दातृनिकाय तथा दातृराष्ट्रको सहयोगमा ६ सय ४३ स्वास्थ्यसंस्थाको पुनर्निर्माण सम्पन्न भइसकेको राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले जानकारी दिए ।

हालसम्म लगभग ५४ प्रतिशत स्वास्थ्यसंस्थाको पुननिर्माण सम्पन्न भइसकेको बताउँदै उनले सबै स्वास्थ्यसंस्थाको पुनर्निर्माणको काम समयमै सम्पन्न गर्ने प्रतिबद्धता जनाए । उनले प्रसूतिगृहको भवन निर्माण पनि एउटा उपलब्धिमूलक काम भएको बताए । साथै, प्रसूतिगृहको नयाँ भवनमा आधुनिक उपकरण पनि जडान गरिएको समेत ज्ञवालीले जानकारी दिए ।

‘भूकम्पले क्षति पुर्याउनुअघिको भन्दा पनि राम्रो र बलियो ढंगबाट स्वास्थ्यसंस्थाहरूको पुनर्निर्माण गरिनेछ,’ उनले भने । १० वटा स्वास्थ्यसंस्थाको पुनर्निर्माण कार्य भने अब अघि बढाउने तयारी भइरहेको उनको भनाइ छ ।

  • ताजा समाचार
  • जनप्रिय

हेल्थपोष्ट टुइट्स सबै

प्रसूतिगृहले उपचारमा लापरबाही गरेको सर्वोच्चको ठहर, घटनाको १३ वर्षपछि पीडितलाई ५ लाख क्षतिपूर्ति

थापाथलीस्थित परोपकार प्रसूति तथा स्त्रीरोग अस्पतालले उपचारमा लापरबाही गरेको ठहर गर्दै सर्वोच्च अदालतले पीडित पक्षलाई ५ लाख रूपैयाँ क्षतिपूर्ति दिन आदेश दिएको छ । न्यायाधीश पुरुषोत्तम भण्डारी र टंकबहादुर मोक्तानको संयुक्त इजलासले बुधबार यस्तो आदेश जारी गरेको हो ।

१३ वर्षअघिको घटनामा त्यति नै वेला न्यायालयमा प्रवेश गरेको मुद्दाको अन्तिम किनारा लगाउँदै सर्वोच्चले ढिलै भए पनि पीडितको पक्षमा फैसला दिएको हो । २ चैत ०६३ मा सुत्केरी गराउनेक्रममा अस्पतालले भ्याकुमको सहायताले बच्चा निकालेको थियो । तर, भ्याकुमको असरले नवजात शिशुको टाउको पछाडि फर्केको, अनुहारभित्र पसेको, बायाँ गोडा बांगो भएको अवस्थामा बच्चा निकालिएकाले उपचारमा लापरबाही भएको भन्दै सुत्केरीका आफन्तले सुरुमा जिल्ला प्रशासन कार्यालय, काठमाडौंमा उजुरी दर्ता गराएका थिए ।

उजुरीमा आफन्तले ८२ लाख रूपैयाँ क्षतिपूर्ति मागदाबी गरेका थिए । तर, उजुरीमाथिको कारबाहीमा प्रशासनले अस्पतालले १० लाख रूपैयाँ तिनुपर्ने फैसला गरेको थियो । तर, आफन्तले प्रशासनको सो निर्णय अस्वीकार गर्दै उपचारमा संलग्न चिकित्सक तथा अस्पतालविरुद्ध तत्कालीन पुनरावेदन अदालतमा रिटनिवेदन दर्ता गराएका थिए । पुनरावेदन अदालतले पनि जिल्ला प्रशासनको निर्णयलाई सदर गरेको थियो ।

पुनरावेदनको आदेश पनि चित्त नबुझेपछि सुत्केरीका आफन्त पूर्ण न्यायका लागि सर्वोच्च अदालत पुगेका थिए । सर्वोच्चले उक्त मुद्दामा बुधबार प्रसूतिगृहले सुत्केरी गराउनेक्रममा आमा र बच्चालाई क्षति पुर्याएको ठहर गर्दै पीडितलाई ५ लाख क्षतिपूर्ति भराउने अन्तिम फैसला सुनाएको हो ।

  • ताजा समाचार
  • जनप्रिय

हेल्थपोष्ट टुइट्स सबै