एकजना स्टाफमा कोरोना संक्रमण पुष्टि भएपछि ललितपुरको निदान अस्पताल र आरोग्य परीक्षण केन्द्र सिल गरिएको छ। परीक्षणका क्रममा कोरोना भेटिएपछि बिहानैदेखि सिल गरिएको प्रहरीले जनाएको छ।

अस्पताल स्रोतका अनुसार भित्रका स्टाफ भित्रै र बाहिरका स्टाफलाई बाहिरै राखेर परीक्षणको तयारी भइरहेको छ। कर्मचारी र पछि नर्समा पनि कोरोना लक्षणको आशंका गरिएको प्रहरी जनाएको छ। महानगरीय प्रहरी परिसर ललितपुरका एसएसपी टेकबहादुर राईका अनुसार त्यहाँ कार्यरत भक्तपुर निवासी स्टाफमा संक्रमण देखिएपछि अस्पताल सिल गरिएको हो।

अस्पतालका केही कर्मचारीले भने अस्पतालकाे लेखा विभागमा कार्यरत उदयपुर भुल्के घर गएर फर्किएका स्टाफमा संक्रमण देखिएपछि सिल गरिएको जनाएका छन्। उनलाई केही दिनअघि नै आशंका गरेर अस्पतालकै एम्बुलेन्समा परीक्षण गर्न लगिएको थियो।

संक्रमण आशंका हुँदा नै धेरै कुरा लुकाएको आशंकामा अस्पतालका कर्मचारी त्रासमा छन्। अहिले अस्पतालमा स्वास्थ्यकर्मीको टोलीसमेत खटिएर थप अनुसन्धान गरिरहेको छ। मंगलबारमात्रै काठमाडौंमा एक र भक्त्तपुरमा दुईजनामा संक्रमण पुष्टि भएको थियो।

सुरुमा प्रकाशित समाचारमा पछि प्राप्त जानकारीका आधारमा अद्यावधिक गरिएको  जानकारी गराउँछौं : सं‌.

ललितपुर जिल्ला अदालतले मिर्गौला तस्करीको अभियोगमा मुद्दा खेपिरहेका निदान अस्पतालका प्रमुख कार्यकारी अधिकृत (सिइओ) सहित ५ जनालाई पुर्पक्षका लागि जेलचलान गरेको छ । अदालतले किर्ते कागजपत्र बनाई गैरकानुनी रूपमा मिर्गौला प्रत्यारोपण गराएको कसुरमा उनीहरूलाई पुर्पक्षका लागि जेलचलान गरेको हो ।
अभियुक्तहरूमाथि किर्ते कागजमार्फत नाता नपर्ने व्यक्तिलाई भान्जा बनाएर मिर्गौला लिई बिरामीमा प्रत्यारोपण गराएको प्रहरी अनुसन्धानको दाबी छ । प्रत्यारोपणका लागि तोकिएको नाताभित्रका व्यक्तिले मात्र मिर्गौला दिन पाउने कानुनी प्रावधान छ । तर, निदानले मोटो रकम लिएर किर्ते गरी कानुनविपरीत प्रत्यारोपण गराएको प्रहरी अनुसन्धानले देखाएको छ ।

जेलचलान हुनेमा अस्पतालका सिइओ विपेन्द्र प्रधान, डा. राजेश पन्त, कानुनी सल्लाहकार कुमुद भट्टराई, घटनाका बखत ललितपुर जिल्ला प्रशासन कार्यालयमा कार्यरत अधिकृत रामचन्द्र आले र मिर्गौला लिने व्यक्ति शंकरलाल लामा छन् । २९ असोजमा पक्राउ परेका उनीहरूमाथि छानबिनपछि प्रहरीले अदालतमा मुद्दा दायर गरेको थियो ।

रामेछाप दोरम्बा–३ का शंकर लामा योन्जनको शरीरमा निदानमा मिर्गौला प्रत्यारोपण गरिएको थियो । योन्जनका साखै भान्जा सञ्जीव घिसिङले मामालाई मिर्गौला दिने भन्दै २० असारमा दोरम्बा गाउँपालिकाबाट नाताप्रमाणित गरिएको थियो । तर, प्रत्यारोपणका बखत घिसिङको नभएर कभ्रेका ३६ वर्षीय एक युवकको मिर्गौला झिकिएको थियो ।

नाताप्रमाणितको कागजमा भान्जा घिसिङको फोटो उप्काएर ती युवकको फोटो टाँसी अस्पतालको प्रत्यक्ष संलग्नतामा किर्ते गरिएको थियो । किर्ते गर्नमा अस्पतालका कानुनी सल्लाहकार भट्टराईले भूमिका खेलेका थिए । मिर्गौला दिएबापत काभ्रेका युवकलाई ३ लाख रूपैयाँ दिइएको तर अस्पतालले प्रत्यारोपण गरिएका बिरामीसित ११ लाख रूपैयाँ लिएको प्रहरीको अनुसन्धानमा खुलेको थियो । अनुसन्धानका क्रममा तस्करी प्रकरणमा संलग्न पाइएका विरुद्ध प्रहरीले मानव अंग बेचबिखन मुद्दा दायर गरेको हो ।