‘डा. केसी भोकै बस्न हुने, हामी किन नबस्ने ?’

सरकारले डा. गोविन्द केसीसित सहमति गर्ने र आफैँ सहमति तोड्ने वा कार्यान्वयन नगर्नेक्रम बाम्बार दोहोर्याउँदा डा. केसीको स्वास्थ्यमा गम्भीर जोखिम देखिएको भन्दै नागरिकसमाजले जीवनरक्षाका लागि सरकारसित अपिल गरेको छ ।

पूर्वसहमति कार्यान्वयनको मागसहित १६औँ सत्याग्रहमा रहेका डा. केसीको अनशन १६औँ दिनमा पुगिसक्दा उनको जीवन जोखिममा परेको अवस्थाप्रति आफ्नो गम्भीर ध्यानाकर्षण भएको बताउँदै नागरिक अगुवाहरूले जीवनरक्षाका हस्ताक्षरसहित सामूहिक आह्वान गरेका छन् ।

पूर्वप्रधानन्यायाधीश सुशीला कार्कीसहितका नागरिक अगुवाहरूले १५औँ सत्याग्रहका क्रममा प्रधानमन्त्री केपी शर्मा ओलीकै पहल र रोहबरमा डा. केसीसित भएको सम्झौताको इमानदारीका साथ कार्यान्वयन गर्न अपिल गरेका छन् । डिल्लीबजार भोजनगृहमा बिहीबार भेला भएका नागरिक अगुवाहरूले सम्झौताको इमानदार कार्यान्वयनमार्फ डा. केसीको जीवनरक्षाका लागि सामूहिक हस्ताक्षरसहित आह्वान गरेका हुन् ।

यसअघि पनि नागरिक अगुवाहरूले डा. केसीसितको सम्झौताबाट सरकार पछि हटेमा राज्यकै विश्वसनीयता गुम्ने भन्दै सरकारलाई संवेदनशील हुन अपिल गरेका थिए ।

‘मेरा कक्षाका विद्यार्थी हुन्थे भने सञ्चारमन्त्रीको कान समात्थेँ’

नागरिक अगुवा दुर्गा सुवेदीले डा. केसी भोक हड्तालमा बसिरहँदा उहाँको समर्थनमा भोक हड्तालमा उत्रिन सबैसँग आग्रह गरे ।
हस्ताक्षर संकलन गरिनुअघि आयोजित छलफलमा बोल्दै सुवेदीले कामविनाको ऐक्यबद्धताले अर्थ नराख्ने भन्दै रिले अनशनका लागि आह्वान गरे । ‘म मृत्युप्रति निर्भय छु,’ उनले भने, ‘कम्तीमा एकदिन भोकै बसेर सरकारलाई दबाब दिअाैँ ।’

सुवेदी सत्यका लागि भोकै बसेर मर्न परे पनि त्यो खुसीकै विषय हुने समेत बताए । कार्यक्रमका अधिकांश वक्ताले सुवेदीको प्रस्तावमा समर्थन जनाएका थिए । सुवेदीले नागरिक तहबाट पनि धर्ना र भोक हड्तालका कार्यक्रम गर्नुपर्ने बताए ।

मानवअधिकारवादी कृष्ण पहाडीले शान्तिसमाजले डा. केसीसँगको विगतको सम्झौता कार्यान्वयन र भ्रष्ट्रचारविरुद्ध देशभर आन्दोलन छेडिसकेको भन्दै सत्याग्रहलाई निस्तेज गर्ने सरकारले षड्यन्त्र गरिरहेको बताए । ‘गल्ती गरेको मान्छे विचलित हुन्छ, सरकार पनि विचलित छ,’ उनले भने ।

प्राध्यापक कपिल श्रेष्ठले अहिलेको सरकारको रवैयाले बुद्धिजीविहरु लज्जित, दुःखित र आक्रोशित भइरहेको भन्दै प्रधानमन्त्रीले दोहोराे चरित्र देखाएको आरोप लगाए । ‘लोकतन्त्रमा विश्वासघात गरेर जग हसाइरहेका छन्,’ श्रेष्ठले भने ।
अहिले सरकार सत्य कुरा छोप्न र झुटोलाई फैलाउने गोयवल्स शैलीमा लागेको भन्दै सञ्चारमन्त्रीको शैलीप्रतिसमेत आपत्ति जनाए । ‘झन् सञ्चारमन्त्रीको तरिका, मेरो कक्षाका विद्यार्थी हुन्थे भने कान समात्थेँ ।’

नेपाल बार एसाेसिएसनका पूर्वमहासचिव सुनील पोखरेलले डा. केसीजस्तो मान्छे गुमाउनुपर्ने अवस्था आउने होकि भन्ने त्रास भइरहेको बताए । अधिवक्ता दिनेश त्रिपाठीले सरकारले डा. केसीलाई गम्भीर धोका दिएको भन्दै संसदीय सर्वोच्चताको नाममा मनपरी गर्न नमिल्ने बताए । ‘संसद् भनेको जनताको वारेसनामाप्राप्त संस्था हो, दुईतिहाइ छ भन्दैमा केपी ओलीलाई श्री ५ घोषणा गर्न नसक्ने’ बताए ।
पत्रकार युवराज घिमिरेले प्रधानमन्त्रीले मैले हस्ताक्षर गरेको त हो तर कार्यान्वयन गर्न बाध्य छैन भन्ने अभिव्यक्ति दिइरहेको भन्दै सहमति पूरा गर्नुपर्ने बाध्यात्मक अवस्थामा पु-याउनुपर्नेमा जाेड दिए ।

 

  • ताजा समाचार
  • जनप्रिय

हेल्थपोष्ट टुइट्स सबै

पूर्वप्रधानन्यायाधीशसहित नागरिक अगुवाले गरे डा. केसीको जीवनरक्षाको अपिल

पूर्वसभामुख, पूर्वप्रधानन्यायाधीशसहित नागरिकसमाजका अगुवा, बुद्धिजीवी तथा विभिन्न प्रतिष्ठित व्यक्तिहरूले ७ दिनदेखि आमरण अनशनरत डा. गोविन्द केसीसित सरकारले गरेको सम्झौताको कार्यान्वयन गर्दै डा. केसीको जीवनरक्षा गर्न सरकार तथा जनप्रतिनिधिसमक्ष अपिल गरेका छन् । डा. केसीको १५औँ अनशनका क्रममा प्रधानमन्त्री केपी शर्मा ओलीकै पहलमा सम्झौता भएको स्मरण गराउँदै उनीहरूले त्यसको कार्यान्वयनको जिम्मेवारी सरकार, जनप्रतिनिधिसहित प्रधानमन्त्रीको व्यक्तिगतसमेत रहेको जनाएका छन् ।

राज्यको इमान र विश्वसनीयता समाजका लागि संवेदनशील हुने भन्दै उनीहरूले डा. केसीसितको सम्झौताअनुसार नै संसदीय प्रक्रियामा रहेको चिकित्साशिक्षा विधेयक पारित गर्न अपिल गरेका हुन् । सत्तारूढ पार्टीको संसदीय दलको नेतासमेत प्रधानमन्त्री स्वयम् भएका नाताले यसअघि आफ्नै निर्देशनबमोजिम डा. केसीसँग भएका सहमति र सम्झौताका पक्षमा आवश्यक संसदीय सहमति निर्माणमा पनि प्रधानमन्त्री स्वयम्ले पहल गर्नुपर्ने उनीहरूको जोड छ ।

सम्भौताअनुरूप विधेयक पास गरेर डा. केसीको जीवनरक्षाका लागि अपिल गर्नेमा पूर्वसभामुख, पूर्वप्रधानन्यायाधीश, पूर्वराजदूत, पूर्वउपकुलपति, प्राध्यापक, पूर्वप्राज्ञ, लेखकलगायत बुद्धिजीवी तथा नागरिक अगुवा छन् ।

 

नागरिकसमाजको अपिल जस्ताको तस्तै

सरकार र जनप्रतिनिधिलाई नागरिकसमाजको अपिल

१. नागरिक अभियन्ता डा. गोविन्द केसी हाल सत्याग्रहमा रहनुभएको अवस्थाप्रति हाम्रो ध्यानाकर्षण भएको छ । राज्यको इमान र विश्वसनीयता समाजका लागि संवेदनशील र महत्वपूर्ण कुरा हो । नेपाल सरकारले यसअघि डा. केसीसँग गरेका सम्झौता कार्यान्वयन गर्नु सरकार तथा संसद्मा प्रतिनिधित्व गर्ने दलहरूको जिम्मेवारी हो ।

२. पछिल्लो सम्झौता प्रधानमन्त्री केपी शर्मा ओलीजीको पहल र संलग्नतामा उहाँकै निवासमा भएका वार्तापछि सम्भव भएको हो । त्यसैले, यो सम्झौताप्रति प्रधानमन्त्रीजीको व्यक्तिगत जिम्मेवारी पनि जोडिएको हामी स्मरण गराउन चाहन्छौँ ।

३. हाल संसदीय प्रक्रियामा रहेको चिकित्साशिक्षा विधेयकलाई डा. केसीसँगको पछिल्लो सम्झौताबमोजिम पारित गर्न र डा. केसीको जीवनरक्षा गर्न सरकार तथा संसद्मा प्रतिनिधित्व गर्ने सबै दलहरूलाई अपिल गर्दर्छौं ।

४. सत्तारूढ दलको संसदीय नेतासमेत भएको नाताले प्रधानमन्त्रीज्यूले यसअघि आफ्नो निर्देशनबमोजिम डा. केसीसँग भएका सहमति र सम्झौताका पक्षमा आवश्यक संसदीय सहमति निर्माणमा पनि विशेष ध्यान दिनुहुनेछ भन्ने विश्वास लिएका छौँ ।

हस्ताक्षरकर्ता :

१. सुशीला कार्की

२. दमननाथ ढुंगाना

३. भैरव रिसाल

४. केदारभक्त माथेमा

५. प्रा.डा. ध्रुवचन्द्र गौतम

६. प्रा.डा. अभि सुवेदी

७. राजेन्द्र दाहाल

८. प्रा.डा. जयराज आचार्य

९. प्रा.डा. दिल्लीदेवी शाक्य

१०. प्रा.डा.मदन उपाध्याय

११. प्रा.डा. रमेशकान्त अधिकारी

१२. प्रा.डा. शेखर गुरुङ

१३. प्रा.डा. वीरेन्द्र मिश्र

१४. प्रा. डा नोबेलकिशोर राई

१५. रामदयाल राकेस

१६. प्रा. डा सरोज धिताल

१७. डा. मधु घिमिरे

१८. डा. द्वारिका ढुंगेल

१९. गीता केसरी

२०. खेमराज रेग्मी

  • ताजा समाचार
  • जनप्रिय

हेल्थपोष्ट टुइट्स सबै