त्रिवि आयुर्वेदमा चुलियो विवाद, आन्दोलनरत स्ववियुको ‘काउन्टर’मा विद्यार्थी उतारिएपछि भिडन्तको अवस्था

त्रिभुवन विश्वविद्यालय आयुर्वेद क्याम्पस स्वतन्त्र विद्यार्थी युनियन (स्ववियु)ले क्याम्पसप्रमुखको राजीनामा मागेको छ । वरिष्ठताका आधारमा क्याम्पसप्रमुख बनाइनुपर्ने भन्दै विद्यार्थीले आन्दोलन गरिरहेका छन् । क्याम्पसका लागि द्रव्यगुण, शल्यविज्ञान, रोग तथा विकृति विज्ञानजस्ता विषयमा शिक्षण सहायक छनोट गर्दा प्रतिस्पर्धा नगराई आफूअनुकूलका व्यक्तिलाई भर्ती गराउन खाजेको भन्दै स्ववियुले ३ सातादेखि कलेज प्रशासनमा तालाबन्दी गरेर आन्दोलन जारी राखेको छ । तर, कलेज प्रशासनले विद्यार्थीको माग सुनुवाइ नगरेपछि स्ववियुले क्याम्पसप्रमुखको राजीनामा मागेको हो । क्याम्पसप्रमुख डा. शिवमंगल प्रसादले आफ्नो मात्र हैकम चलाएर मनपरीतन्त्र चलाउँदै आएको आरोप विद्यार्थीले लगाएका छन् ।

विद्यार्थीले विभिन्न ७ बुँदे माग राख्दै ३ मंसिरमा कलेज प्रशासनमा ताला लगाएका थिए । यसबीचमा ३ चरणसम्म क्याम्पस प्रशासन र आन्दोलनरत स्ववियु पदाधिकारीबीच छलफल भए पनि समस्याको हल निस्किन सकेन । वार्तापछि झन् एकअर्काबीच मनमुटाव बढेको थियो । छलफलका क्रममा क्याम्पसप्रमुखले विद्यार्थीबाट निर्वाचित प्रतिनिधिलाई अपमानजनक शब्दप्रयोगसँगै तुच्छ व्यवहार देखाएका कारण वार्ताको वातावरण धमिलिएको विद्यार्थीको भनाइ छ । ‘छलफल भयो, तर क्याम्पसप्रमुख हाम्रो मागप्रति गम्भीर देखिनुभएन,’ स्ववियुका कार्यवाहक अध्यक्ष सरोजमणि पोखरेलले भने, ‘उल्टै हामीले उहाँबाट तुच्छ व्यवहार खेप्नुपर्यो ।’

स्ववियुको काउन्टरमा खडा गरिए विद्यार्थी, स्ववियु पदाधिकारीलाई क्याम्पस प्रवेशमा रोक, प्रशासननिकटबाट पो पठन–पाठन अवरुद्ध !
स्ववियुको आन्दोलन ३ साता पुग्दासमेत विद्यार्थीको माग सुनुवाइ नगरिरहँदा आन्दोलनको विरुद्धमा विद्यार्थीको एक समूह खडा भएको छ । क्याम्पसप्रमुखले विद्यार्थीको आन्दोलन तुहाएर आफ्ना कर्तुतहरू छिपाउने षड्यन्त्रस्वरूप आफूनिकट (सत्तारूढ दलनिकट) केही विद्यार्थीलाई आफूविरुद्ध प्रयोग गरेको स्ववियुको आरोप छ । आन्दोलनको विरुद्धमा देखिएको विद्यार्थी समूहले स्ववियुका पदाधिकारी तथा आन्दोलनका समर्थक विद्यार्थीलाई कलेज प्रवेशमा समेत रोक लगाएको कावा अध्यक्ष पोखरेलले बताए । स्ववियुले ३ सातादेखि आन्दोलन चलाइरहँदा समेत पठन–पाठन अवरुद्ध नगरी क्याम्पस प्रशासनमा मात्र तालाबन्दी गरेकोमा काउन्टरमा उत्रिएका प्रशासनद्वारा परिचालित विद्यार्थीले पठन–पाठन ठप्प हुने गरी क्याम्पस बन्द गरेको उनले जानकारी दिए ।

क्याम्पसमा स्त्रीरोग, बालरोग, नाक–कान–घाँटीलगायत कुनै पनि फ्याकल्टी पूरा नभएको र पूरा गर्नका लागि पटक–पटक क्याम्पसप्रमुखको ध्यानाकर्षण गराउँदा पनि कुनै चासो नदिएको विद्यार्थीको भनाइ छ । राजनीतिक भागबन्डाका कारण विद्यार्थीले धेरै सास्ती भोग्दै आएको गुनासो विद्यार्थीको छ ।

शिक्षकको छनोटमा प्रतिस्पर्धात्मक प्रक्रिया अपनाई पारदर्शिता कायम गर्नुपर्ने, क्याम्पसका रिक्त सम्पूर्ण विभाग यथाशीघ्र एकमुष्ट रूपमा पूर्ति गरिनुपर्ने, अस्थायी छात्रावासमा सिटसंख्या वृृद्धि गरिनुपर्ने, स्तातकोत्तर अध्ययन–अध्यापनको सुरुवातका लागि तत्काल पहल गर्नुपर्नेलगायत मागसहित स्ववियु आन्दोलनमा छ । यसअघि स्ववियुले रिक्त पदहरूको एकमुष्ट पूर्तिका लागि ३ मंसिरमा दिएको ५ दिने अल्टिमेटमप्रति क्याम्पस प्रशासनले बेवास्ता गरेको तथा विद्यार्थीका जायज मागप्रति गैरजिम्मेवार बनेको भन्दै स्ववियु आन्दोलनमा उत्रिएको हो ।

  • ताजा समाचार
  • जनप्रिय

हेल्थपोष्ट टुइट्स सबै

त्रिवि आयुर्वेद क्याम्पसमा १० दिनदेखि स्ववियुको ताला, २ चरणको वार्ता विफलपछि समस्या झन् पेचिलो

त्रिवि आयुर्वेद क्याम्पस स्वतन्त्र विद्यार्थी युनियन (स्ववियु) ले ७ बुँदे माग राखेर क्याम्पस प्रशासनमा तालाबन्दी गरेको १० दिन बितिसकेको छ । विद्यार्थीको मागलाई लिएर क्याम्पस प्रशासन र स्ववियु पदाधिकारीबीच आइतबार र सोमबार भएको वार्ता विनानिष्कर्ष टुंगिएको छ ।

क्याम्पसका लागि द्रव्यगुण, शल्यतन्त्रजस्ता विषयमा शिक्षण सहायक छनोट गर्दा प्रतिस्पर्धा नगराई आफूअनुकूलका मान्छे भित्र्याउन खोजेको भन्दै विद्यार्थीले सो विज्ञापन खारेजीको माग गरेका छन् । विद्यार्थीले ३ मंसिरदेखि कलेजमा तालाबन्दी गरेर आन्दोलन थालेका हुन् ।

स्ववियुका कार्यवाहक अध्यक्ष डा. सरोजमणि पोख्रेलले वार्ताका क्रममा क्याम्पस प्रशासन आफ्नो मागप्रति गम्भीर नदेखिएको तथा क्याम्पस प्रमुखले अति तुच्छ शब्दसहित आन्दोलनरत विद्यार्थीलाई गालीगलौज गरेकाले वार्ता विफल भएको बताए । ‘विद्यार्थीको समस्या समाधानमा पहलकदमी लिनुपर्ने प्रमुख जिम्मेवार क्याम्पसप्रमुखले नै स्ववियु पदाधिकारीको अपमान गरेकाले वार्ता विनानिष्कर्ष टुंगिएको हो,’ उनले भने, ‘तालाबन्दी र आन्दोलनका अन्य कार्यक्रम यथावत् रहनेछन् ।

क्याम्पस प्रमुखले आफूले देखाएको तुच्छ व्यवहारप्रति आत्मालोचनासहित लिखित माफी नमागेसम्म पुनः वार्तामा नबस्ने विद्यार्थीको अडान छ । क्याम्पसप्रमुखले आत्मालोचना नगरे संघर्षका कार्यक्रम थप चर्काउने चेतावनी स्ववियुले दिएको छ ।

शिक्षकको छनोटमा प्रतिस्पर्धात्मक प्रक्रिया अपनाई पारदर्शिता कायम गर्नुपर्ने, क्याम्पसका रिक्त सम्पूर्ण विभाग यथाशीघ्र एकमुष्ठ रूपमा पूर्ति गरिनुपर्ने, अस्थायी छात्रावासमा सिटसंख्या वृृद्धि गरिनुपर्ने, स्तातकोत्तर अध्ययन–अध्यापनको सुरुवातका लागि तत्काल पहल गर्नुपर्नेलगायत माग विद्यार्थीको छ ।

स्वतन्त्र विद्यार्थी युनियनले रिक्त पदहरूको एकमुष्ट पूर्तिका लागि ३ मंसिरमा दिएको ५ दिने अल्टिमेटमप्रति क्याम्पस प्रशासनले बेवास्ता गरेको तथा विद्यार्थीका जायज मागप्रति गैरजिम्मेवार बनेकाले बाध्यात्मक रूपमा तालाबन्दी गर्नुपरेको स्ववियुले जनाएको छ ।

  • ताजा समाचार
  • जनप्रिय

हेल्थपोष्ट टुइट्स सबै

काउन्सिलमा युवा चिकित्सक संघको तालाले ६७२ विशेषज्ञ चिकित्सकको शनिबारको लाइसेन्सिङ परीक्षा प्रभावित होला ?

युवा चिकित्सक संघ नेपालले नेपाल मेडिकल काउन्सिलमा गरेको तालाबन्दीका कारण चिकित्सकको शनिबारको विशेषज्ञ लाइसेन्सिङ परीक्षाको तयारीमा समस्या देखिएको छ । संघले कानुनविपरीत चल्ने मेडिकल कलेजहरूको सम्बन्धन खारेज गर्नुपर्नेलगायत माग राख्दै शुक्रबार काउन्सिलमा तालाबन्दी गरेको थियो । यससँगै २३ कात्तिक (शनिबार) का लागि निर्धारित स्पेसलिस्ट लाइसेन्स परीक्षा प्रभावित हुने देखिएको हो ।

आइतबार मात्र काउन्सिलले नयाँ अध्यक्षका रूपमा प्रा.डा. भगवान कोइरालालाई पाएको छ । मन्त्रिपरिषद्ले वरिष्ठ मुटुरोग विशेषज्ञ डा. कोइरालालाई अध्यक्षमा नियुक्त गरेसँगै ५ महिनाको प्रतीक्षापछि काउन्सिलले नयाँ अध्यक्ष पाएको हो । यद्यपि, कार्यकक्षमा संघको तालाबन्दीका कारण उनले कार्यभार सम्हाल्न भने पाएका छैनन् । एक महिनाअघि त्रिभुवन विश्वविद्यालयको उपकुलपतिका लागि एक नम्बरमा सिफारिसमा परेका डा. कोइरालालाई उपकुलपतिमा यसअघिका काउन्सिलका अध्यक्ष प्रा.डा. धर्मकान्त बास्कोटाले उछिनेका छन् । काउन्सिलमा अझै रजिस्ट्रार र ५ सदस्य पद रिक्त छन् ।

अवैध असुल गरिएको अतिरिक्त शुल्क फिर्ता गर्नुपर्नेलगायत माग राखेर देशभरका मेडिकल कलेजका विद्यार्थीले महिनौँदेखि आन्दोलन गरिरहँदा विद्यार्थीको जायज आवाज र सरकारको निर्देशनलाई समेत अटेरी गर्ने मेडिकल कलेहरूलाई कारबाही गर्नतर्फ काउन्सिलले कुनै कदम नचालेको भन्दै संघले तालाबन्दी गरेको हो । संघले विद्यार्थीको समस्या समाधानमा मौन रहेको भन्दै काउन्सिलका अध्यक्ष, उपाध्यक्ष र रजिस्ट्रारसमेतको कार्यकक्षमा तालाबन्दी गरेका छन् । अवैध शुल्क फिर्ता नगर्ने ४ वटा कलेजको सम्बन्धन खारेज गर्नुपर्ने माग संघको छ ।

संघको माग काउन्सिलसँग विलकुलै असम्बन्धित– उपाध्यक्ष डा. थापा
काउन्सिल भने राष्ट्रिय चिकित्साशिक्षा आयोग गठनसँगै मेडिकल कलेजको नियमनसम्बन्धी सम्पूर्ण अधिकार आयोगमा गएकाले कारबाहीमा अफ््नो कुनै भूमिका नहुने बताउँछ । यद्यपि, कलेजका सिटनिर्धारणलगायत काम यो वर्ष पनि आयोगको निर्देशनमा काउन्सिलले नै गर्दै आएको छ । मेडिकल कलेजको नियमन र नियन्त्रणसम्बन्धी सम्पूर्ण अधिकार आयोगमा गइसकेको अवस्थामा संघको मागमा काउन्सिलको कुनै दायित्व नभएको काउन्सिलका उपाध्यक्ष डा. नारायणविक्रम थापा बताउँछन् । गत साउनमा अध्यक्ष पद रिक्त भएदेखि आइतबारसम्म काउन्सिलको जिम्मेवारी डा. थापाले नै सम्हाल्दै आएका थिए ।
‘हामीसँग कुनै सरोकार नभएको विषयलाई लिएर संघले तालाबन्दी गरेको छ,’ उपाध्यक्ष डा. थापा भन्छन्, ‘केही गरी एक्जाम सरेको खण्डमा यसको जवाफदेही संघ नै हुनुपर्छ ।’ २३ गतेका लागि तोकिएको लाइसेन्सिङ परीक्षामा ४८ वटा छुट्टा–छुट्टै विधामा ६ सय ७२ पिजी गरेका चिकित्सक परीक्षार्थी सम्मिलित हुँदै छन् ।

संघका महासचिव डा. लोहनी भन्छन्– जिम्मेवार व्यक्तिले उत्तरदायित्व वहन गरे परीक्षालाई असर पुर्याउँदैनौँ


सबै निकायमा पटक–पटक हाम्रा माग लिएर जाँदा पनि केही सुनुवाइ नभएकाले संघले सबै सम्बन्धित निकायलाई एकैपटक ज्ञापनपत्र बुझाउँदै काउन्सिलमा तालाबन्दी गरेको युवा चिकित्सक संघ नेपालका महासचिव डा. सुलोचन लोहनी बताउँछन् । ‘आयोग बने पनि मेडिकल काउन्सिलले हालसम्म मेडिकल कलेजको सिट निर्धारणको काम गर्दै आएको छ,’ महासचिव डा. लोहनीले भने, ‘डा. गोविन्द केसीको आन्दोलनका कारण मेडिकल कलेजका केही सिट कटौती भएका थिए, अवैध असुल्ने मेडिकल कलेजको सिटसंख्या घटाए मात्र पनि केही हदसम्म कारबाहीको दायरामा आउँछन् ।’

काउन्सिलका जिम्मेवार व्यक्तिले आफ्नो उत्तरदायित्व वहन गर्न खोजेको खण्डमा संघभित्र छलफल गरी परीक्षामा रोकतोक नगर्ने डा. लोहनी बताउँछन् । ‘चिकित्सकको भविष्यप्रति हामीलाई पनि चिन्ता लाग्छ,’ डा. लोहनी भन्छन्, ‘सम्बन्धित निकायले यस विषयलाई आफ्नो ठाउँबाट सकेजति पहल गरेमा समस्या समधान हुने देखिन्छ ।’

सरकारले सबै मेडिकल कलेजहरूलाई अवैध असुलेको अतिरिक्त शुल्क फिर्ता गर्न निर्देशन दिए पनि कलेजहरूले अटेरी गर्दै आएका छन् । अवैध शुल्क फिर्ता नगरेको भन्दै युनिभर्सल, गण्डकी, चितवन र नेसनल मेडिकल कलेजका विद्यार्थी आन्दोलनमा छन् । सरकार र कानुनलाई अटेरी गर्दै विद्यार्थीको आवाज दबाउनमा उद्यत यी चारवटै मेडिकल कलेजको सम्बन्धन खारेज गर्नुपर्ने माग संघको छ ।

  • ताजा समाचार
  • जनप्रिय

हेल्थपोष्ट टुइट्स सबै

गण्डकी मेडिकल कलेजमा विद्यार्थीको ताला, परीक्षामा समेत खेलबाड गरेको आरोप

गण्डकी मेडिकल कलेजका विद्यार्थीले कलेज प्रशासनमा ताला लगाएका छन् । कलेजका प्राचार्य रवीन्द्रप्रसाद श्रेष्ठले गैरजिम्मेवार बन्दै अमर्यादित अभिव्यक्ति दिएको भन्दै विद्यार्थीले कलेजमा ताला लगाएका हुन् ।

परीक्षाजस्तो संवेदनशील विषयमा समेत कलेज प्रशासनले खेलबाड गरेको विद्यार्थीको आरोप छ । कलेजले गैरजिम्मेवार मात्र नभई गैरकानुनी रवैया देखाएको विद्यार्थीको भनाइ छ । एउटा डिपार्टमेन्टको प्रश्नपत्र अर्को डिपार्टमेन्टले बनाएको, ढाँचा नमिलाई प्रश्नपत्र निर्माण गरेको लगायत आरोप लगाएका विद्यार्थीले कलेजका यस्ता क्रियाकलापले आफूहरू हैरानी खेप्न बाध्य भएको जनाएका छन् ।

विद्यार्थीले कलेज प्रशासनलाई कारबाही गर्न चिकित्साशास्त्र अध्ययन संस्थान (आइओएम) डिन कार्यालय र जिल्ला प्रशासन कार्यालयलाई आग्रह गरेका छन् । कलेजका अमर्यादित गतिविधि र कर्तुतहरूको निष्पक्ष छानबिन गरी कारबाही प्रक्रिया अघि बढाउन विद्यार्थीले नियामक निकायसमक्ष माग गरेका हुन् ।

तालाबन्दीसँगै जारी गरेको विज्ञप्तिमा विद्यार्थीले अन्यायपूर्ण गतिविधि र विद्यार्थीको न्यायिक संघर्षलाई खलल पुर्याउनेखालका कुनै पनि गतिविधि पुनः दोहोर्याउने कुराको परिणाम कलेज प्रशासनले भोग्नुपर्ने चेतावनी दिएका छन् । यसअघि पनि विद्यार्थीले कलेजले अवैध असुलेको शुल्क फिर्ता गर्नुपर्नेलगायत माग राख्दै लामो समयसम्म पठन–पाठन ठप्प हुने गरी संघर्ष गरेका थिए ।

  • ताजा समाचार
  • जनप्रिय

हेल्थपोष्ट टुइट्स सबै

प्रवेश परीक्षा रोक्ने मनसायले आइओएममा ताला

चिकित्साशिक्षा संघर्ष समितिले त्रिभुवन विश्वविद्यालय चिकित्साशास्त्र अध्ययन संस्थान (आइओएम)को डिन कार्यालय र परीक्षा नियन्त्रण शाखामा तालाबन्दी गरेको छ । परीक्षा शाखामा तालाबन्दीसँगै आइओएमले अर्को साताका लागि तय गरेको प्रवेश परीक्षा प्रभावित हुन सक्ने देखिएको छ । आइओएमले २१-२३ भदौका लागि एमबिबिएसलगायतको प्रवेश परीक्षाको मिति तोकिसकेको छ ।

विभिन्न ८ बुँदे माग राखेर आन्दोलनमा उत्रिएको संघर्ष समितिले माग पूरा गर्न १२ गते ७२ घण्टाको अल्टिमेटम दिएको थियो । तर, माग सुनुवाइ गर्ने कुनै लक्षण नपाएपछि बाध्य भएर तालाबन्दी गर्नुपरेको गण्डकी मेडिकल कलेजका विद्यार्थी अनित सिन्हाले बताए ।

चिकित्साशिक्षा ऐनले व्यवस्था गरेको ७५ प्रतिशत छात्रवृत्तिको प्रावधान लागू हुनुपर्ने, मेडिकल कलेजले विभिन्न शीर्षकमा लिँदै आएका मनोमानी शुल्क फिर्ता हुनुपर्ने तथा त्यस्तो शुल्क लिने कलेजलाई कारबाही हुनपर्ने, समयानुकूल पाठ्यक्रम परिमार्जन गरी गुणस्तरीय र प्रविधिमैत्री पाठ्यक्रम बनाउनुपर्नेजस्ता ८ बुँदे माग संषर्ष समितिले अघि सारेको छ ।

‘समितिले दिएको समयसीमा बितिसक्दा पनि सम्बन्धित कुनै निकायले पनि चासो देखाएको पाइएन, जसका कारण बाध्य भएर तालाबन्दी गर्ने अवस्थामा पुग्यौँ,’ सिन्हा भन्छन्, ‘जबसम्म हाम्रो माग सुनुवाइ हुँदैन, तबसम्म तालाबन्दी तथा आन्दोलन गर्न छोड्दैनौँ ।’

संघर्ष समितिले आइतबार ११ बजे धर्ना तथा आन्दोलनका कार्यक्रम गरेसँगै दिउँसो १ बजे तालाबन्दी गरेको हो । आफूले उठाएका माग पूरा नगरे सबै मेडिकल कलेजका शैक्षिक तथा प्रशासनिक कार्य ठप्प पार्ने र राजधानीमा विशाल स्वास्थ्य प्रदर्शन गर्नेसमेत समितिले चेतावनी दिएको छ ।

गत साता मात्र चिकित्साशिक्षा अध्ययनरत विद्यार्थीहरूले संघर्ष समिति गठन गरी चिकित्साशिक्षा सुधारका लागि आन्दोलन गर्ने जानकारी दिएको थियो । १० भदौमा सरोकारवालासित छलफल आयोजना गरेरै समितिले आफ्ना कार्यक्रम सार्वजनिक गरेको थियो ।

  • ताजा समाचार
  • जनप्रिय

हेल्थपोष्ट टुइट्स सबै