कोरोना भाइरसका कारण विश्वव्यापी स्वास्थ्य संकटकाल

विश्वस्वास्थ्य संगठनले चीनबाट सुरु भएर विश्वव्यापी रुपमा फैलिएको नयाँ कोरोनाभाइरसको सङ्क्रमणबाट विश्वव्यापी स्वास्थ्य सङ्कटकालको अवस्था आएको घोषणा गरेको छ । २० देशमा १० हजारभन्दा बढीमा संक्रमण प्रमाणित भएर २ सय १३ भन्दा बढीको ज्यान गएपछि डब्लुएचओले विश्वव्यापी स्वास्थ्य आपतकाल घोषणा गरेको हो ।

संगठनले चीनको एउटा सहरबाट सुरु भएको भाइरस चीनबाहिर पनि फैलिन थालेपछि यस्तो संकटकाल घोषणाको अवस्था आइपरेको जनाएको छ ।
उक्त संक्रमण हालसम्म विश्वका १८ मुलुकमा देखिइसकेको छ । जसमध्ये ९९ प्रतिशतभन्दा बढी चीनमा देखिएको छ । यो भाइरसका कारण चीनबाहिर भने कसैको ज्यान गएको छैन् ।

डब्ल्यूएचओका महानिर्देशक टेड्रोस एड्हानोम गेहब्रेयससले कमजोर स्वास्थ्य प्रणाली भएका मुलुकहरूमा यो भाइरस फैलिन सक्ने त्रास रहेको बताए । उनले संकटकाल घोषणाले निम्न तथा मध्यम आय भएका मुलुकहरूमा सङ्क्रमणको निरीक्षण र नियन्त्रणमा सघाउने विश्वास लिए । डब्लुएचओले सबै देशलाई सङ्क्रमण फैलिन रोक्न कडिकडाउ नियन्त्रणका उपाय अपनाउन आह्वान गरिएको छ ।

  • ताजा समाचार
  • जनप्रिय

हेल्थपोष्ट टुइट्स सबै

कोरोनाभाइरस ‘ग्लोबल हेल्थ इमर्जेन्सी’को अवस्था होइन : डब्लुएचओ, कस्तोमा गरिन्छ घोषणा ?

विश्व स्वास्थ्य संगठन (डब्लुएचओ) ले कोरोनाभाइरसको संक्रमण वैश्विक स्वास्थ्य आपत्काल घोषणाको अवस्थामा नभएको जनाएको छ । अन्तर्राष्ट्रिय स्वास्थ्य आपत्काल समितिको बिहीबारको बैठकमा ‘ग्लोबल हेल्थ इमर्जेन्सी’ घोषणा गर्ने–नगर्ने विषयमा मत बाझिएको थियो । समितिले ठोस निर्णय दिन नसकेपछि डब्लुएचओले चीनबाहेकका देशमा संक्रमितको संख्या नगण्य हुनुका साथै मानिसबाट मानिसमा संक्रमण भएको नपाइएकाले वैश्विक आपत्काल घोषणा गर्नुनपर्ने निष्कर्ष निकालेको हो । यद्यपि, चीनमा भने राष्ट्रिय आपत्कालको आवस्था रहेको डब्लुएचओले जनाएको छ ।

‘यतिवेलासम्म चीनबाहिर मानिसबाट मानिसमा संक्रमण पुष्टि भएको छैन,’ डब्लुएचओका महानिर्देशक डा. टेड्रोस अधानोम घेब्रेयेससले जेनेभामा प्रत्रकारसम्मेलनमा भने, ‘यसको अर्थ हुँदैन भन्नेचाहिँ होइन ।’
अझै पनि कोरोनाभाइरसलाई चीनमै मात्र सीमित गरेर नियन्त्रणमा लिन सकिने जनाउँदै उनले कुनै गल्ती नगर्न आग्रह गरे । ‘कुनै गल्ती नगर्नुहोस्,’ उनले भने, ‘यो चीनमा आपत्काल हो, तर अहिलेसम्म वैश्विक स्वास्थ्य आपत्काल बनिसकेको छैन, अझै पनि त्यहीँ सीमित बन्न सक्छ ।’

४ साताअघि चीनको युहान राज्यबाट देखापरेको नयाँ भाइरसले अहिलेसम्म २५ जनाको ज्यान लिइसकेको छ भने फैलिने क्रम जारी छ । चिनियाँ अधिकारीका अनुसार करिब ८ सयमा संक्रमण पुष्टि भएको छ । यद्यपि, चीनले भाइरस संक्रमणको वास्तविक तस्बिर बाहिर नल्याएको आरोप लगाउँदै आएका अन्तर्राष्ट्रिय विज्ञहरू चीनमा करिब २ हजारमा संक्रमण भइसकेको दबी गर्छन् ।

मानिसबाट मानिसमा सर्ने यो भाइरसको संक्रमण फैलिँदै गएपछि चीन सरकारले युवान राज्यलाई बन्द गरेको छ । हुवानबाट छुट्ने विमान, रेल, बस, डुंगामा प्रतिबन्ध लगाइएको छ । सहरवासीलाई अन्यन्त जरुरी नपरी घरबाट ननिस्कन भनिएको छ भने सहर छोड्न रोक लागाइएको छ ।

चीनबाहेक संयुक्तराज्य अमेरिकासहित करिब आधा दर्जन देशमा संक्रमित भेटिएका छन् । ती देशमा पनि युहान गएर आएका व्यक्तिमै संक्रमण पाइएको र अन्य मानिसमा नसरेकाले वैश्विक समस्या नबनिसकेको डब्लुएचओको ठहर छ ।

जम्मा ५ पटक गरियो ‘ग्लोबल हेल्थ इमर्जेन्सी’ घोषणा, कहिले र किन ?
डब्लुएचओले हालसम्म ५ पटक ‘ग्लोबल पब्लिक हेल्थ इमर्जेन्सी’ घोषणा गरेको छ ।
– सन् २००९ मा पहिलोपटक ग्लोबल हेल्थ इमर्जेन्सी घोषणा गरिएको थियो । त्यतिवेला इन्फ्लुएन्जाको महामारी फैलिएको थियो ।
– सन् २०१४ मा दुईपटक ग्लोबल हेल्थ इमर्जेन्सी घोषणा गरियो । त्यतिवेला कैयौँ देशमा पोलियोको पुनरुत्थान भएको थियो । पाकिस्तान, अफगानिस्तान, नाइजेरियालगायत देशमा पोलियो खतराको अवस्थामा देखिएको थियो ।
त्यसै वर्ष पश्चिमी अफ्रिकामा इबोलाको महामारी फैलिएपछि दोस्रोपटक ग्लोबल हेल्थ इमर्जेन्सी घोषणा गरियो ।
– सन् २०१६ मा जिका भाइरसले महामारीको रूप लिएपछि ग्लोबल हेल्थ इमर्जेन्सी घोषणा गरिएको थियो ।
– सन् २०१९ मा डेमोक्रेटिक रिपब्लिक अफ कंगोमा इबोलाले प्रकोपको रूप धारण गरेपछि ग्लोबल हेल्थ इमर्जेन्सी घोषणा गरियो ।

चीनमा रहेका नेपालीलाई सावधानी अपनाउन दूतावासको आग्रह
चीनस्थित नेपाली दूतावासले चीनमा रहेका नेपालीलाई कोरोनाभाइरसको संक्रमणबाट बच्न सावधानी अपनाउन आग्रह गरेको छ । दूतावासले बिहीबार सूचना जारी गर्दै चीनमा रहेका सम्पूर्ण नेपालीलाई सावधानी अपनाउन अपिल गरेको हो ।
दूतावासले भाइरसको संक्रमणबाट बच्ने तरिकासमेत बताएको छ । सावधानीका उपाय अपनाउँदै चीन सरकार स्वास्थ्य मन्त्रालयले अद्यावधिक गर्ने सूचनाहरु लिइरहन भनेको छ । सहयोग आवश्यक परेको खण्डमा दूतावास तथा विभिन्न सहरमा रहेका नेपाली महावाणिज्य दूतावासमा सम्पर्क गर्न दूतावासले आग्रह गरेको छ ।

  • ताजा समाचार
  • जनप्रिय

हेल्थपोष्ट टुइट्स सबै

दक्षिणपूर्वी एसियामा हेपाटाइटिस बी नियन्त्रण गर्ने पहिलो राष्ट्र बन्यो नेपाल, स्वास्थ्यमन्त्रीले थापे डब्लुएचओको प्रशंसापत्र

विश्व स्वास्थ्य संगठन (डब्लुएचओ)ले नेपाललाई सार्वजनिक स्वास्थ्यमा उपलब्धि हासिल गरेबापत प्रशंसापत्रबाट सम्मान गरेको छ । हेपाटाइटिस बीको नियन्त्रणमा सफलता हासिल गरेबापत डब्लुएचओले नेपाललाई सधन्यवाद सम्मान गरेको हो । डब्लुएचओको दक्षिणपूर्वी एसिया क्षेत्रीय कमिटीको ७२औँ सेसनमा उपप्रधान एवम् स्वास्थ्य तथा जनसंख्यामन्त्री उपेन्द्र यादवले प्रशंसापत्र ग्रहण गरे । यससँगै नेपाल दक्षिणपूर्वी एसिया क्षेत्रमा हेपाटाइटिस बीमाथि नियन्त्रण प्राप्त गर्ने पहिलो मुलुक बनेको छ । नेपालसहित यस क्षेत्रका अन्य ३ मुलुक पनि हेपाटाइटिस बी नियन्त्रणमा पहिलो बनेका छन् ।

नेपालसहित हेपाटाइटिस बीको नियन्त्रणमा सफलता हात पार्ने दक्षिणपूर्वी एसिया क्षेत्रका ४ देश मंगलबार भारतको नयाँदिल्लीमा डब्लुएचओबाट सम्मानित भएका हुन् । नयाँदिल्लीस्थित डब्लुएचओको दक्षिणपूर्वी एसिया हेर्ने एसइएआर कार्यालयमा बसेको क्षेत्रीय बैठकले नेपाल, भुटान, थाइल्यान्ड र बंगलादेशलाई हेपाटाइटिस बीको नियन्त्रणमा सफलता हासिल गरेबापत प्रशंसापत्र प्रदान गरेको हो । यी चारै देश दक्षिणपूर्वी एसियामा हेपाटाइटिस बी नियन्त्रण गर्ने पहिलो देश बन्न सफल भएको डब्लुएचओले जनाएको छ । उल्लेखित देशले ५ वर्षभित्रका बालबालिकामा हेपाटाइटिस बीको संक्रमण १ प्रतिशतभन्दा कममा झारेको र त्यसमार्फत क्रोनिक इन्फेक्सन र लिभर क्यान्सरका कारणहरुलाई न्यूनीकरण गरेको डब्लुएचओले जनाएको छ ।

डब्लुएचओको क्षेत्रीय बैठकले आमाबाट बच्चामा सर्ने एचआइभी र सिफिलिस उन्मूलन गरेबापत माल्दिभ्सलाई प्रशंसापत्रद्वारा सम्मान गरेको छ । त्यसैगरी, डब्लुएचओले दादुरा उन्मूलन गरेबापत श्रीलंकालाई पनि सम्मान गरेको छ । डब्लुएचओले आफ्ना सदस्य राष्ट्रहरुलाई स्वास्थ्यका विभिन्न क्षेत्रमा गरेको प्रगतिबापत यसरी सम्मानित गर्न थालेको यो चौथो वर्ष हो ।

नेपालले हेपाटाइटिस बीमाथि नियन्त्रण पाउनुमा सरकारले चलाएको यसविरुद्धको खोप कार्यक्रमको सफलतालाई नै मुख्य रुपमा लिइएको छ । नेपालले यसअघि पनि डब्लुएचओबाट विभिन्न रोगमाथि पाएको नियन्त्रण तथा उन्मूलनका लागि प्रशंसा तथा सम्मान पाइसकेको छ । पोलियो उन्मूलन, मातृशिशु मृत्युदर न्यूनीकरण, रुबेला नियन्त्रण, धनुष्टंकार उन्मूलनलगायतमा पाएका सफलताका लागि डब्लुएचओले नेपाललाई धन्यवादसहित प्रमाणपत्र दिइसकेको छ ।

  • ताजा समाचार
  • जनप्रिय

हेल्थपोष्ट टुइट्स सबै

तिलगंगाले २५औँ वर्षगाँठमा पायो डब्लुएचओको मान्यता, ४ लाख शल्यक्रियासहित ६० लाख आँखारोगीको उपचार

नेपालको मात्र नभएर छिमेकी मुलुकहरूका बिरामीमाझसमेत आँखा उपचारको केन्द्रका रूपमा ख्याति आर्जन गर्न सफल तिलगंगा आँखा अस्पतालले विश्व स्वास्थ्य संगठन (डब्लुएचओ)को मान्यता पाएको छ । अस्पतालले आँखा उपचारको क्षेत्रमा पुर्याएको गुणस्तरीय सेवाको कदर गर्दै डब्लुएचओले तिलगंगालाई आफ्नो समन्वय केन्द्रका रूपमा सोमबार मान्यता दिएको हो ।

स्थापनाको २५औँ वर्ष प्रवेशका अवसरमा अस्पतालले सोमबार काठमाडौंमा आयोजना गरेको वार्षिकोत्सव समारोहका बीच प्रधानमन्त्री केपी शर्मा ओलीको उपस्थितिमा डब्लुएचओले तिलगंगालाई आफ्नो समन्वय केन्द्रको मान्यता दिएको घोषणा गर्यो । डब्लुएओका अनुसार अस्पतालले आँखा स्वास्थ्यसेवा, लेन्सको उत्पादन र अनुसन्धानको क्षेत्रमा पुर्याएको उल्लेख्य योगदानको कदरस्वरूप समन्वय केन्द्रको मान्यता दिइएको हो ।

वार्षिकोत्सव तथा डब्लुएचओ मान्यता घोषणा समारोहमा प्रधानमन्त्री ओलीले अस्पतालले आँखा उपचारको क्षेत्रमा असाधारण काम गरेको बताए । अस्पतालले मुलुकको समृद्धिको अभियानमा समेत महत्त्वपूर्ण योगदान पुर्याएको जनाउँदै प्रधानमन्त्री ओलीले अस्पतालका कार्यकारी निर्देशक डा. सन्दुक रुइतसहितको टिमले आँखा उपचारको क्षेत्रमा पुर्याएको योगदानको मुक्तकण्ठले प्रशंसा गरे । अस्पतालको विकासका लागि आवश्यक जस्तोसुकै सहयोग गर्न सरकार सदैव तयार रहेको प्रधानमन्त्री ओलीको भनाइ थियो ।

कार्यक्रममा उपप्रधान एवम् स्वास्थ्य तथा जनसंख्यामन्त्री उपेन्द्र यादवले आँखा स्वास्थ्यसेवालाई अनुगमन गर्न मन्त्रालयमा छुट्टै आँखा एकाइको व्यवस्था गर्ने घोषणा गरे । आँखा स्वास्थ्यसेवालाई अन्य सेवासँगै जोडेर अघि बढाउने गरी सरकारले स्वास्थ्य नीति ल्याएको मन्त्री यादवको भनाइ थियो ।

कार्यक्रममा अस्पतालका कार्यकारी निर्देशक डा. रुइतले अस्पतालले हालसम्म ६० लाख आँखारोगीको उपचार गरेको गरिसकेको जानकारी दिए । अस्पतालले २५ वर्षदेखि आँखा उपचारको क्षेत्रमा पुर्याएको योगदानको स्मरण गर्दै डा. रुइतले अस्पतालको कार्यप्रगति विवरण प्रस्तुत गरे । उनका अनुसार अस्पतालले हालसम्म ४ लाखभन्दा बढी आँखाको शल्यक्रिया गरिसकेको छ ।

तिलगंगाले उत्पादन गरेको लेन्स नेपालमा मात्र नभएर विश्वका ७० भन्दा बढी मुलुकमा निर्यात हुँदै आएको छ । ३५ लाखभन्दा बढी नेपालीले स्वदेशमै उत्पादित कृत्रिम लेन्सबाट उज्यालो देख्न पाएका छन् । तिलगंगामा उत्पादित लेन्स विश्वमै सस्तो र गुणस्तरीय भएका कारण यसको माग दिनप्रतिदिन बढ्दो छ । लेन्स उत्पादनको नेतृत्वकर्ता वर्तमान निर्देशक डा. रुइत आँखा उपचारको क्षेत्रमा पुर्याएको अमूल्य योगदानबापत सुप्रसिद्ध म्यागासिसी पुरस्कारबाट सम्मानित समेत भएका छन् ।

  • ताजा समाचार
  • जनप्रिय

हेल्थपोष्ट टुइट्स सबै

खाद्यजन्य रोगबाट बर्सेनि ६० करोड मानिस प्रभावित

पछिल्लो समय नेपालका लागि मात्र नभएर विश्वभर नै खाद्य सुरक्षा चुनौतीपूर्ण बन्दै गएको छ । शुक्रबार (७ जुन) विश्वभर पहिलो विश्व खाद्य सुरक्षा दिवस मनाइयो । ‘खाद्य सुरक्षा सबैको जिम्मेवारी’ मूल नाराका साथ यस वर्ष खाद्य सुरक्षा दिवस मनाउन सुरु गरिएको हो ।

‘खाद्य सुरक्षा सबैको जिम्मेवारी’को मूल मर्म खाद्यान्न उत्पादन हुने जमिनदेखि लिएर हाम्रो थालसम्म आइपुग्ने सबै चिजबिज सुरक्षित होऊन्, जसले हाम्रो स्वास्थ्यमा नोक्सानी नपुर्याऊन् भन्ने नै हो । यस अभियानको सुरुवात संयुक्त राष्ट्रसंघले गरेको हो । संयुक्त राष्ट्रसंघको विश्वास छ कि, विभिन्न स्तरमा व्यक्ति तथा संगठनहरू यो मुद्दासँग लड्न सशक्त ढंगले सामेल हुनेछन् ।

संयुक्त राष्ट्रसंघले प्रत्येक वर्ष ७ जुनलाई विश्व खाद्य सुरक्षा दिवसका रूपमा मनाउने निर्णय गरेको छ । शुक्रबार विश्वभर पहिलो खाद्य सुरक्षा दिवस मनाइयो । यस वर्षको विश्व खाद्य सुरक्षा दिवसको मूल सार ‘खाद्य सुरक्षा सबैको जिम्मेवारी’ थियो ।

किन जरुरी छ खाद्य सुरक्षा ?
वास्तवमा खाद्यजन्य रोगहरूका कारण प्रतिवर्ष ६० करोड मानिस प्रभावित हुने गरेका छन्, जससँग लड्नु अत्यावश्यक भइसकेको छ । किनकि, यो स्वास्थ्यसमस्याको मात्र विषय होइन, यो दिगो विकासको लक्ष्यसित पनि जोडिएको विषय हो । यो विश्वव्यापी खाद्य सुरक्षालाई बढावा दिन पनि उत्तिकै आवश्यक छ । खाद्यजन्य रोगहरू जीवाणु, विषाणु, परजीवी वा रासायनिक पदार्थहरूले दूषित भोजन वा पानीको माध्यमबाट शरीरमा प्रवेश गरेका कारण लाग्ने गर्छन् । एक तथ्यांकका अनुसार प्रतिवर्ष करिब ४ लाख २० हजार मानिसको मृत्यु दूषित खानाका कारण हुने गरेको छ ।

‘दूषित खानाका कारण हुने यी सबै मृत्युलाई पूर्ण रूपले रोक्न सकिन्छ,’ विश्व स्वास्थ्य संगठन (डब्लुएचओ)का महानिर्देशक डा. टेड्रस अधानम घेब्रेयेसस भन्छन्, ‘असुरक्षित भोजन हाम्रो स्वास्थ्य र अर्थव्यवस्था दुवैका लागि खतरापूर्ण छ ।’

विश्व खाद्य सुरक्षा दिवसको माध्यमबाट डब्लुएचओले दूषित खानाका कारण लाग्ने रोगको बोझ घटाउने लक्ष्य लिएको छ । जबसम्म यस विश्वका सरकारहरू, संघ–संस्थाहरू र आममानिस यस अभियानमा जोडिँदैनन्, तबसम्म खाद्य सुरक्षा अभियान पूरा हुन नसक्ने मान्यता डब्लुएचओको छ ।

  • ताजा समाचार
  • जनप्रिय

हेल्थपोष्ट टुइट्स सबै

डब्लुएचओका १० चाखलाग्दा तथ्य, शौचालयमा पहुँच नहुनेहरू मोबाइलमा अभ्यस्त

डब्लुएचओले प्रत्येक देशलाई ‘सबैका लागि स्वास्थ्य’ नारालाई आत्मसात् गर्न आग्रह गरेको करिब ७ दशक भइसक्यो । बर्सेनि स्वास्थ्य क्षेत्रमा अर्बौं खर्च गरिन्छ । लाखौँ प्रतिबद्धताका बाबजुद पनि हरेक वर्ष स्वास्थ्य क्षेत्रमा नमिठा सत्य दोहोरिरहन्छन्, जुन अकाट्य छन् । डब्लुएचओले सन् २०१८ मा गरेको अध्ययनका आधारमा सार्वजनिक गरेका केही तथ्य निकै चाखलाग्दा छन्–

१. विश्वमा स्वास्थ्य सेवा आवश्यक पर्ने कम्तीमा आधाजसो जनसंख्या स्वास्थ्यसेवाबाट वञ्चित छन् ।
डब्लुएचओले गुणस्तरीय र आधारभूत स्वास्थ्यसेवालाई मानवको मौलिक अधिकारका रूपमा परिभाषित गरेको छ । अधिकांश राज्यले यसलाई अंगीकार पनि गरेका छन् । तर पनि करिब आधा जनसंख्या आर्थिक अभावलगायत कारणले आवश्यक स्वास्थ्यसेवाको पहुँचबाहिर छन् ।

सन् २०१७ को तथ्यांकअनुसार झन्डै ८ अर्बभन्दा बढी मानिसले उनीहरूको आम्दानीको १० प्रतिशत स्वास्थ्योपचारमा खर्च गरेका थिए । करिब १ अर्ब मानिस, जो पहिले गरिब थिएनन्, उपचार खर्चका कारण गरिब हुन बाध्य भएका थिए ।

२. करिब १० करोड मानिस स्वास्थ्योपचार खर्चकै कारण गरिब बनिरहेका छन् ।
सन् २०१७ को तथ्यांकअनुसार झन्डै ८० करोडभन्दा बढी मानिसले उनीहरूको आम्दानीको १० प्रतिशत स्वास्थ्योपचारमा खर्च गरेका थिए । करिब १० करोड मानिस, जो पहिले गरिब थिएनन्, उपचार खर्चका कारण गरिब हुन बाध्य भएका थिए ।

३. ट्वाइलेटमा पहुँच नभएका मानिसको पनि मोबाइलमा पहुँच छ ।
अझै पनि ठूलो संख्यामा मानिसलाई लाग्ने गर्छ कि, खाद्यान्न, लत्ताकपडा, आवास प्रमुख आवश्यकता हुन्, न कि ट्वाइलेट । वर्तमानमा जति मानिस मोबाइल प्रयोग गर्छन्, त्योभन्दा कमले ट्वाइलेट प्रयोग गर्छन् ।’

स्वास्थ्यक्षेत्रमा विश्वव्यापी रूपमा पुरुषको वर्चस्व छ । डब्लुएचओमा समेत अधिकृत स्तरमा करिब एकचौथाइ मात्र महिला कार्यरत छन्, जहाँ केवल २८ प्रतिशत स्वास्थ्य अधिकारी महिला छन् ।

४. कमजोर स्वास्थ्यसेवा प्रणालीका कारण प्रत्येक वर्ष ६ दशमलव ६ मिलियन बालबालिका मृत्युवरण गर्न पुग्छन् ।

५. गर्भवती अवस्था तथा प्रसूतिका क्रममा आउने विभिन्न स्वास्थ्यसम्बन्धी जटिलताका कारण हरेक दिन ८ सय महिलाले ज्यान गुमाउँछन् ।

६. अमेरिकनले प्रत्येक वर्ष ‘हलुइन’मा जति खर्च गर्छन्, त्यति विश्वभरि मलेरियारोगविरुद्ध खर्च गरिँदैन ।

७. झाडापखाला र निमोनियाले बसेनि लाखौँ मानिसको ज्यान लिने गर्छ, जुन एड्स, मलेरिया र क्षयरोगका कारण मर्नेको संख्याभन्दा बढी हो ।
विभिन्न संघ–संगठनले एड्स र क्षयरोग नियन्त्रणका लागि पैसाको खोलो बगाएका छन् । तर, अझै पनि झाडापखाला र निमोनियाजस्ता बेवास्ता गरिएका रोगका कारण ती रोगले भन्दा बढी मानिस मरिरहेका छन् ।

८. विश्व स्वास्थ्य पुरुषको संसारजस्तो देखिएको छ ।
स्वास्थ्यक्षेत्रमा विश्वव्यापी रूपमा पुरुषको वर्चस्व छ । डब्लुएचओमा समेत अधिकृत स्तरमा करिब एकचौथाइ मात्र महिला कार्यरत छन्, जहाँ केवल २८ प्रतिशत स्वास्थ्य अधिकारी महिला छन् ।

९. विश्वमा महिलाहिंसा बढ्दो छ ।
डब्लुएचओको रिपोर्टअनुसार प्रत्येक वर्ष ३५ दशमलव ६ प्रतिशत महिला कुनै न कुनैखाले शारीरिक तथा मानसिक हिंसा खप्न बाध्य छन् ।

१०. स्वास्थ्यसम्बन्धी गरिएका अधिकांश अनुमान वा प्रक्षेपण मुस्किलले पूरा हुन्छन् ।

  • ताजा समाचार
  • जनप्रिय

हेल्थपोष्ट टुइट्स सबै