‘सांसद विकास कोष’ नीति नै खारेज गर, कोभिड सामना गर्न लगानी बढाउ!

कांग्रेस बैठक। फाइल तस्बिर

नेपाली कांग्रेसले कोरोना जोखिम सामना गर्न मुलुकलाई जरुरी पर्ने ठूलो रकमका लागि स्थानीय पूर्वाधार विकास साझेदारी कार्यक्रम ‘सांसद विकास कोष’ मा विनियोजन गरिँदै आएको नीति खारेज गर्नुपर्ने निष्कर्ष निकालेको छ।

कांग्रेस केन्द्रीय कार्यसमितिको बैठकले सांसद विकास कोषमा विनियोजित रकम कोरोनाविरुद्धको सचेतना, सामग्री, राहत र उपचारमा  पर्याप्त रकम प्रबन्ध गर्न सरकारसँग माग गरेको हो।

कांग्रेसले कोरोनाको विश्वव्यापी महामारीबाट नेपाली समुदाय पनि विश्वव्यापी रूपमै प्रताडित भएको निष्कर्ष निकाल्दै कोरोना जोखिमका कारण कष्टकर स्थितिमा रहेका सबै नेपालीलाई उच्च संयम र सतर्कताका लागि अपिल गरेको छ।

‘पिपिईलगायत अत्यावश्यक स्वास्थ्य सामग्री अभावबीच उच्च मानवीय भावना साथ फ्रन्टलाइनमा रहेर कार्य गरिरहनुभएका देशभरिका सबै स्वास्थ्यकर्मी, प्रतिकूल स्थितिमा पनि अहोरात्र समन्वय भूमिका निर्वाह गरिरहेका सुरक्षाकर्मी, सरसफाइकर्मी एवं सूचना सम्प्रेषणमा दिनरात काम गरिरहेका सञ्चारकर्मीप्रति यो बैठक उच्च सम्मान प्रकट गर्दछ,’ कांग्रेस बैठकको निर्णयमा उल्लेख छ।

लकडाउनका कारण आर्थिक, सामाजिक समस्या झेलिरहेका आमनागरिकलाई राहत सहयोग पुर्‍याउन पार्टीका केन्द्रदेखि स्थानीय तहसम्मका निकाय, भ्रातृ एवं शुभेच्छुक संस्था, नेपाली कांग्रेसका तर्फबाट स्थानीय तथा विभिन्न तहमा निर्वाचित जनप्रतिनिधिको क्रियाशीलता आगामी दिनमा पनि अप्ठ्यारोमा परेका नागरिकको सहयोगमा निरन्तर जुट्न सम्पूर्ण सम्बन्धित सबैलाई कांग्रेसको अपिल छ।

सरकारको अलोकतान्त्रिक निर्णयविरुद्ध सहकार्य

कांग्रेसले वर्तमान केपी ओली सरकार लकडाउनको अवस्थाको समेत दुरुपयोग गरी यसले विगतमा शृङ्खलावद्ध रूपमा गर्दै आएका लोकतान्त्रिक मूल्य र मान्यता, संविधानको मर्म र भावनाविपरीत निर्णय तथा राज्य संवेदनशील संरचनालाई कब्जा गर्ने क्रियाकलापलाई झन् तीव्रता दिएकाे आरोप लगाएको छ।

कांग्रेसको अगुवाईमा विपक्षी दल र आमजनताको विरोधका कारण अध्यादेश फिर्ता लिए पनि सरकारको प्रवृत्तिमा कुनै परिवर्तन नआएको बैठकको निष्कर्ष छ।

‘अतः यस्तो प्रवृत्तिविरुद्ध सबै दल र नागरिक समाजसँग सहकार्य गरी आवश्यकताअनुसार संघर्षसाथ अगाडि बढ्ने यो बैठक निर्णय गर्दछ,’ पार्टीका मुख्यसचिव कृष्णप्रसाद पौडेलले जारी गरेको विज्ञप्तिमा छ।

अपहरणमा संलग्नलाई कारबाही माग

सरकारले लोकतान्त्रिक मूल्य र मान्यता तहसनहस गर्ने मनसायसाथ सरकारको समेत संलग्नतामा भएकाे सांसद डा. सुरेन्द्र यादव अपहरण घटनालाई कांग्रेसले गम्भीर एवं अक्षम्य घटनाका रूपमा लिएको जनाएको छ।

यस्ता अपराधिक कार्यको भर्त्सना गर्दै अपराधमा संलग्न व्यक्तिलाई तत्काल कानुनी कारबाही अगाडि बढाउन कांग्रेसले माग गरेको छ।

सरकार भ्रष्टाचारको पर्याय बनेको आरोप कांग्रेसकाे छ। कोभिड-१९ संक्रमणको स्थितिमा समेत सरकारमा बस्नेले यसलाई भ्रष्टाचार गर्ने अवसरका रूपमा लिनु अत्यन्त खेदजनक रहेको टिप्पणी कांग्रेसकाे छ।

‘स्वास्थ्य सामग्री भ्रष्टाचार प्रकरणमा संलग्न सबैलाई तत्काल कानुनी कारबाही अगाडि बढाउन सम्बन्धित निकायसँग माग गर्दछ,’ विज्ञप्तिमा छ।

ओली सरकारले राजनीतिक र नैतिक आधार गुमायो

वर्तमान सरकार लोकतान्त्रिक मूल्य र मान्यता कमजोर गर्ने, संविधानका मूलभूत भावना भत्काउने कार्यमा निरन्तर लागि परेको निष्कर्ष कांग्रेसले निकालेको छ। मुलुक कोभिड-१९ को गम्भीर जोखिममा रहेका बेला मेडिकल सामग्री खरिदमा समेत भ्रष्टाचार हुनु दुर्भाग्यपूर्ण विषय रहेको कांग्रेसले जनाएको छ।

‘पछिल्लो समय विवादाष्पद दुई अध्यादेश जारी गर्नु, राजनीतिक दल विभाजन गर्ने कार्यमा सरकार स्वयं संलग्न भई सांसदलाई अपहरण गर्ने जस्तो कुकृत्य गर्नु, त्यस्ता कार्यको छानबिन र अनुसन्धान गर्न माग गर्दा जाहेरीसम्म दर्ता गर्न इन्कार गर्नु, सरकारको बदनियत पुष्टि गर्ने घटना हुन्,’ विज्ञप्तिमा छ।

सामाजिक सन्जालमा सरकार वा सरकारी पदाधिकारीको आलोचना गरेका आधारमा मानिसलाई पक्राउ गर्ने, मुद्दा चलाउने, सञ्चारमाध्यममा बोलेको, अन्तर्वार्ता लिएका कारण स्पष्टीकरण सोध्ने, कारबाही चलाउनेजस्ता घटनाले वर्तमान सरकार संविधानप्रदत्त अभिव्यक्ति स्वतन्त्रतालगायत मौलिक हकअधिकारको खिल्ली उडाउँदै निरंकुशतातर्फ अग्रसर भएको प्रष्ट भएको कांग्रेसको ठहर छ।

साथै, सरकारको राहत घोषणा कागजमा सीमित भएको जनाउँदै कांग्रेसले केही सीमित राहत पनि भेदभाव र अपारदर्शी ढंगबाट वितरण गरिएको निष्कर्ष निकालेको छ।

‘जीवन निर्वाहको समस्या झेलिरहेका नागरिकलाई  बिनाभेदभाव राहत र सहयोग पुर्‍याउन सरकारसँग जोडदार माग गर्दछ। साथै, प्रभावित नागरिकको यथार्थ स्थिति स्थानीय सरकारलाई थाहा हुने भएकाले केन्द्र सरकारले तत्काल केन्द्रीय राहत कोषबाट स्थानीय निकायलाई साधनस्रोत हस्तान्तरण गरी राहतमा तीव्रता दिन माग गर्दछ,’ विज्ञप्तिमा छ।

स्थानीय तहमा राहत वितरण सर्वदलीय संयन्त्रमार्फत् अनुगमनको व्यवस्था तत्काल मिलाउन सरकारसँग कांग्रेसले माग गरेको छ।

परीक्षण व्यापक बनाउन माग

आमनेपाली संक्रमणको जोखिम सामना गर्न लकडाउन पालना गरी बसेको एक महिना नाघिसकेको छ। यस अवधिमा संक्रमणको यथार्थ स्थितिको मूल्याङ्कन गर्न पिसिआर परीक्षण तीव्रता दिने काममा सरकार पूर्णतः असफल रहेको निष्कर्ष कांग्रेसले निकालेको छ।

‘पिसिआर प्रविधिमार्फत् परीक्षणलाई ७७ जिल्लामै व्यापक तीव्रता दिँदै संक्रमितको उपचारमा संलग्न स्वास्थ्यकर्मी, सुरक्षाकर्मीलगायत सबैलाई आवश्यक पर्ने स्वास्थ्य सुरक्षा सामाग्री यथेष्ठ व्यवस्थाका साथै कोभिड-१९ उपचारका लागि आवश्यक सबै व्यवस्था तत्काल मिलाउन पनि कांग्रेस माग गर्दछ,’ विज्ञप्तिमा छ।

निश्चित मापदण्डमा क्वारेन्टाइन व्यवस्थित गर्न, अलपत्र नागरिकलाई कि खान दिने, कि गाउँ जान दिने व्यवस्था गर्न र देश बाहिर अप्ठ्यारोमा रहेका नेपालीको उद्धार गर्न कांग्रेसले माग गरेको छ।

  • ताजा समाचार
  • जनप्रिय

हेल्थपोष्ट टुइट्स सबै

बीचमै अलप नहुने संकल्पसहित प्रधानमन्त्री ओली अस्पताल भर्ना

प्रधानमन्त्री केपी शर्मा ओली मिर्गौला प्रत्यारोपणका लागि अस्पताल भर्ना भएका छन् । महाराजगन्जस्थित त्रिवि शिक्षण अस्पतालमा दोस्रोपटक मिर्गौला प्रत्यारोपणका लागि प्रधानमन्त्री ओली सोमबार साँझ भर्ना भएका हुन् ।

अस्पताल भर्ना हुनुअघि उनले राष्ट्रका नाममा भिडियो सन्देश जारी गरे । भिडियो सन्देशमा उनले जनताका सपनालाई बीचमै अलप पारेर आफू अलप नहुने बताएका छन् ।

प्रधानमन्त्री ओली उच्च आत्मबलका साथ अस्पताल भर्ना भएका छन् । उनले आफ्नो स्वास्थ्यबारे ढुक्क हुन जनतालाई अपिल गरेका छन् । उपचारपछि अहिलेभन्दा बढी ऊर्जा र आत्मविश्वासका साथ अस्पतालबाट फर्किने उनको विश्वास छ । प्रधानमन्त्री ओलीले आफ्नो आत्मविश्वास अजम्बरी हुनका लागि नभई जनतामा जागृत सपना साकार पर्नका लागि भएको बताए ।

पहिलो प्रत्यारोपणका वेला (२०६४ साउनमा) नेपालमा मिर्गौला प्रत्यारोपणको सुविधा नभएकाले भारतमा गएर गरेको बताउँदै प्रधानमन्त्री ओलीले यसपटक स्वदेशमै प्रत्यारोपण गराउन पउँदा खुसी व्यक्त गरेका छन् ।

विज्ञान, आधुनिक प्रविधि, ज्ञान र सीपले मिर्गौला प्रत्यारोपण अहिले पहिलेजस्तो जटिल नमानिने उनले बताए । यसपटकको प्रत्यारोपण त्यसैले पनि तुलनात्मक रूपमा सजिलो हुने विश्वास उनले व्यक्त गरे ।

  • ताजा समाचार
  • जनप्रिय

हेल्थपोष्ट टुइट्स सबै

अस्पताल भर्नाअघि भिडियो सन्देश दिँदै प्रधानमन्त्री ओली, मोदीले गरे सफल उपचारको कामना

प्रधानमन्त्री केपी शर्मा ओलीले मिर्गौला प्रत्यारोपणका लागि अस्पताल भर्ना हुनुपूर्व भिडियोमार्फत देश र जनतालाई सन्देश दिने भएका छन् । प्रधानमन्त्री ओलीले अस्पताल जानुअघि बालुवाटारबाट आफ्नो स्वास्थ्य तथा कार्यसम्पादनलगायत विषयमा सन्देश दिने बालुवाटार स्रोतले बताएको छ ।

आफू अस्पतालमा उपचाररत रहँदा सरकारले गर्ने कार्यसम्पादनबारे भिडियो सन्देशमार्फत जानकारी दिने अनुमान गरिएको छ । उनले स्वास्थ्यलाभको कामना गर्न बालुवाटार पुगेका उच्चपदस्थ अधिकारीहरूसित उच्च आत्मबल देखाएका छन् ।

१२ वर्षअघि प्रत्यारोपित मिर्गौलाले काम गर्न छाडेपछि केही महिनादेखि नियमित डायलाइसिस गराउँदै आएका प्रधानमन्त्री ओली दोस्रोपटक प्रत्यारोपणका लागि सोमबार महाराजगन्जस्थित त्रिवि शिक्षण अस्पताल भर्ना हुँदै छन् । उनको बुधबार पुनः प्रत्यारोपण गर्ने कार्यक्रम छ । यसपटक उनलाई भान्जी नाता उल्लेख गरिएकी समीक्षा संग्रौला ज्ञवालीले मिर्गौला दिने बताइएको छ ।

प्रधानमन्त्री ओलीले पहिलोपटक भारतको एपोलो अस्पतालमा मिर्गौला प्रत्यारोपण गराएका थिए । यसपटक भने उनको प्रत्यारोपण स्वदेशी अस्पतालमा स्वदेशी चिकित्सकको नेतृत्वमै हुन लागेको हो । यद्यपि, प्रत्यारोपणमा सहयोग गर्न पहिलोपटक प्रत्यारोपण गर्ने भारतीया चिकित्सकलाई समेत बोलाइएको छ । पहिलो प्रत्यारोपणको नेतृत्व गरेका भारतीय विशेषज्ञ प्रा.डा. अनन्तकुमार प्रतिनिधिसहित नेपाल आइसकेका छन् । यसपटक प्रत्यारोपणको नेतृत्व त्रिवि शिक्षण अस्पतालका वरिष्ठ प्रत्यारोपण सर्जन प्रा.डा. प्रेम ज्ञवालीले गर्दै छन् ।

भारतीय प्रधानमन्त्री नरेन्द्र मोदीले प्रधानमन्त्री केपी शर्मा ओलीलाई सफल शल्यक्रिया र शीघ्र स्वास्थ्यलाभको कमना गरेका छन् । दोस्रोपटक मिर्गौला प्रत्यारोपण गर्न गरिरहेका प्रधानमन्त्री ओलीलाई भारतीय समकक्षी मोदीले सोमबार ट्विटमार्फत स्वास्थ्यलाभको अग्रिम शुभकामना दिएका हुन् ।

प्रधानमन्त्री ओलीको स्वास्थ्यलाभका लागि मोदीले भगवान् पशुपतिनाथसित प्रार्थना गरेका छन् । आगामी दिनमा पनि नेपाल–भारत सम्बन्धलाई नयाँ उचाइमा पुर्याउन प्रधानमन्त्री ओलीको योगदान निरन्तर रहने विश्वास मोदीले व्यक्त गरेका छन् ।

प्रधानमन्त्री मोदीले ट्विटमा भनेका छन्, ‘मेरा प्रिय मित्र केपी शर्मा ओलीजी, तपाईंलाई सफल शल्यक्रिया तथा शीघ्र स्वास्थ्यलाभको कामना गर्दछु । भगवान् पशुपतिनाथले तपाईंलाई सधैँ राम्रो स्वास्थ्य, खुसी र लामो जीवनसहित रक्षा गरून् । भारत–नेपाल सम्बन्धलाई नयाँ उचाइमा पुर्याउन तपाईंको योगदान आगामी दिनमा पनि निरन्तर रहने विश्वास लिएको छु ।’

  • ताजा समाचार
  • जनप्रिय

हेल्थपोष्ट टुइट्स सबै

आफ्नो स्वास्थ्यबारे प्रधानमन्त्रीको भिडियो सन्देश : म उठेर बोल्न सक्ने अवस्थामा छु

प्रधानमन्त्री केपी शर्मा ओलीले अस्पतालको शय्याबाट आफ्नो पछिल्लो स्वास्थ्य अवस्थाबारे भिडियो सन्देश जारी गरेका छन् । एक सातादेखि महाराजगन्जस्थिति त्रिवि शिक्षण अस्पतालअन्तर्गत मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा उपचाररत प्रधानमन्त्री ओलीले एपेन्डिसाइटिसको मेजर शल्यक्रियापछि अहिले आफू उठेर बोल्न सक्ने, कुरा गर्न सक्ने अवस्थामा रहेको बताएका छन् । उनले आफ्नो स्वास्थ्यमा राम्रो सुधार भइरहेको समेत बताएका छन् ।

करिब २४ घण्टादेखि जनमानसमा प्रधानमन्त्री ओलीको स्वास्थ्य अवस्था खस्किएका खबरहरू फैलिएसँगै ओलीले भिडियो सन्देश जारी गरेका हुन् । यद्यपि, प्रमको स्वास्थ्यबारे अनर्गल खबर कसले र किन सञ्चार गरायो भन्नेबारे भने केही खुलेको छैन ।

रोगबारेको सानो चर्चाबाट सुरु गरिएको २ मिनेट ६ सेकेन्ड लामो सन्देशमा उनले सागको अवस्था र सफलताको पनि कामना गरेका छन् । उनले एपेन्डिसाइटिससँगै संक्रमण फैलिएका कारण उपचारमा लामो समय लागेको समेत उल्लेख गरेका छन् ।
‘मेरो स्वास्थ्य राम्ररी सुधार भइराख्या छ । एउटा मेजर अपरेसनपछि तपाईंहरू देखिरहनुभएको छ– मेजर अपरेसनपछि पनि म उठेर बोल्न सक्ने, साथीहरूसँग कुरा गर्न सक्ने अवस्थामा छु र समाचारहरू हेर्न सक्ने अवस्थामा छु,’ ओलीले भनेका छन् ।

१२ वर्षअघि प्रत्यारोपण गराएको मिर्गौलाले काम गर्न छोडेपछि नियमित डायलाइसिस गराइरहेका प्रधानमन्त्री ओलीको गत मंगलबार (१० मंसिरमा) एपेन्डिसाइटिसको आकस्मिक शल्यक्रिया गरिएको थियो । सोमबार राति १ बजेदेखि दुखाइ महसुस गरेका ओलीले त्यसको करिब ७ घण्टापछि मात्र शिक्षण अस्पताल पुर्याइएका थिए । अस्पताल पुगेलगत्तै करिब ४५ मिनेटको परीक्षणपछि उनमा एपेन्डिसाइटिस र पेटमा संक्रमण फैलिएको पाइएपछि आकस्मिक शल्यक्रिया गरिएको थियो ।

परम्परागत पद्धतिबाट पेट चिरेर शल्यक्रिया गरिएकाले घाउ निको हुन केही समय लागेको उपचारमा संलग्न चिकित्सकहरूको भनाइ छ । प्रत्यारोपणका बिरामी भएका कारण इम्युनोसप्रेसिभ लिइरहेका प्रधानमन्त्री ओलीमा सामान्य बिरामीमा भन्दा संक्रमणको उच्च जोखिम हुने भएकाले एपेन्डिसाइटिस कुहिएर फैलिएको संक्रमणको जोखिम उच्च मानिएको थियो । यद्यपि, अद्भुत आत्मबलका कारण नै उनको स्वास्थ्यमा सोचेभन्दा निकै छिटो स्वास्थ्यलाभ हुँदै गएको चिकित्सकको भनाइ छ ।

प्रधानमन्त्रीको भिडियो सन्देशको पूर्णपाठ
एपेन्डिसाइटिस भनेको कसैलाई समय र सूचना दिएर आउने रोग होइन । यो अचानक आइलाग्छ । मलाई पनि अप्रत्याशित रूपमा त्यसैगरी आइलाग्यो । त्यसमा इन्फेक्सन भएछ । र, त्यो बाहिर पनि फैलिएछ । त्यसमा मात्रै इन्फेक्सन सीमित भएको भए निकालेर फाल्न सजिलो हुन्थ्यो । बाहिर पनि इन्फेक्सन भएको हुनाले त्यो इन्फेक्सनलाई पनि हटाउनुपर्यो । त्यसकारण उपचारका क्रममा हप्ता–दश दिन लाग्ने भयो । तर, मेरो स्वास्थ्य राम्ररी सुधार भइराख्या छ । एउटा मेजर अपरेसनपछि तपाईंहरू देखिरहनुभएको छ– मेजर अप्रेसनपछि पनि म उठेर बोल्न सक्ने, साथीहरूसँग कुरा गर्न सक्ने अवस्थामा छु र समाचारहरू हेर्न सक्ने अवस्थामा छु ।

हिजो मैले १३औँ ‘साग’को उद्घाटन समारोह पनि पूरै हेरेँ । हुन सक्छ कि सक्दैन भन्ने द्विविधा समाप्त भएकोमा खुसी लाग्या छ । म राष्ट्रपतिज्यूलाई उद्घाटन गरिदिनुभएकोमा, अरु सबैलाई सहभागी हुनुभएकोमा धन्यवाद भन्न चाहन्छु । मैत्रीपूर्ण खेलबाट देशको इज्जत अगाडि बढाउन र क्षेत्रीय मित्रता अगाडि बढाउन म नेपाली खेलाडीहरू र सार्क क्षेत्रका खेलाडीहरू, सबैलाई आग्रह गर्दछु ।

केपी शर्मा ओली
प्रधानमन्त्री
(मनमोहन कार्डियोथोरासिक भास्कुलर तथा ट्रान्सप्लान्ट सेन्टरको आइसियू कक्षबाट)

  • ताजा समाचार
  • जनप्रिय

हेल्थपोष्ट टुइट्स सबै

प्रधानमन्त्रीको ‘डिस्चार्ज योजना’ बनाउँदै चिकित्सक, दुई/तीन दिनभित्रै बालुवाटार सारिने

फाइल तस्बिर: केही महिनाअघि मुटु तथा फोक्सोको परीक्षण र उपचारका लागि अस्पताल भर्ना भएका ओली डिस्चार्ज अघि

एपेन्डिसाइटिसको आकस्मिक शल्यक्रियापछि मनमोहन कार्डियोथोरासिस एण्ड ट्रान्सप्लान्ट सेन्टरमा उपचाररत प्रधानमन्त्री केपी शर्मा ओलीको स्वस्थ्यमा उल्लेख्य सुधारपछि चिकित्सकहरुले डिस्चार्जको तयारी थालेका छन् ।

एपेन्डिसाइटिसपछि पेट र रंगतमा फैलिएको संक्रमण नियन्त्रणमा रहेको र घाउ पनि निको भइसकेसँगै चिकित्सकहरुले डिस्चार्ज गर्ने योजना बनाएका हुन् । ‘अब डिस्चार्ज गर्न सकिन्छ, तर बालुवाटारभित्रको भेटघाट र वाँकी उपचारका व्यवस्था सहज हुनेवित्तिकै सार्ने तयारी छ,’ उपचारमा संलग्न एक चिकित्सकले भने ।

ती चिकित्सकका अनुसार प्रधानमन्त्रीलाई ठोस खानासमेत दिन थालिससकिएको छ । शरीरमा इलेक्टोलाइडहरुका मात्रा पनि नर्मल भइसकेको छ ।

स्रोतका अनुसार बालुवाटारभित्र डाइलासिस गर्ने प्रबन्ध मिलाउँने र अस्पताल रहँदै टाँका काटेर डिस्चार्ज गर्नेमा चिकित्सकहरु तयार छन् । ‘अहिलेसम्म अवस्था हेर्दा एकदमै राम्रो सुधार छ, खाना, बस्न, हिँडडुलमा कुनै समस्या छैन्,’ ती चिकित्सकले भने, ‘भेटघाट र थप संक्रमण नहोस् भन्नका लागि सावधानी अपनाएर मात्रै अस्पताल राखिएको हो,’ उनले भने ।

अहिले संक्रमण नियन्त्रणका लागि नियमित एन्टिवायोटिक्स दिने र संक्रमणका मात्रा हेर्नका लागि कल्चर र अन्य जाँचहरु नियमित रुपमा भइरहेको छ ।

प्रधानमन्त्रीको स्वास्थ्यलाई लिएर आइतबार बढी हल्ला चलेपछि अस्पतालले डिस्चार्ज योजनासहितको प्रेस विज्ञाप्ति सोमबार जारी गर्ने तयारी गरेको छ । अचानक पेट दुःखाई सूरु भएपछि मंसिर १० मा अस्पताल पुर्याइएका ओलीको सोही दिन शल्यक्रिया भएको थियो । तत्काल भेन्टिलेटरमा राखेर उपचार सुरु गरेसँगै केही घण्टापछि नै स्वास्थ्यमा उल्लेखनीय सुधार देखिन थालेको थियो ।

  • ताजा समाचार
  • जनप्रिय

हेल्थपोष्ट टुइट्स सबै

Breaking : ग्रान्डीमा प्रधानमन्त्रीको डायलाइसिस, थप पटक गरेपछि मात्रै डिस्चार्ज गरिने

प्रधानमन्त्री केपी शर्मा ओलीको बुधबार ग्रान्डी इन्टरनेशनल अस्पतालमा डायलाइसिस गरिएको छ । नियमित परीक्षणका लागि भन्दै बिहानै अस्पताल गएका ओलीको रगतमा क्रियाटिन र पिसाबमा प्रोटिनको मात्रा बढेको देखिएपछि तत्कालै डायलाइसिस सुरु गरिएको थियो ।

अस्पतालको उच्च स्रोतका अनुसार करिब साडे २ बजे डायलाइसिस सकिसकेको थियो । डायलाइसिसपछि ओलीलाई केहीबेर आइसियुमा राखेर घर पठाउँने वा भर्ना गर्ने विषयमा छलफलपछि थप चरणमा डायलाइसिसपछि मात्रै डिस्चार्ज गर्ने निर्णयमा चिकित्सकहरु पुगेका छन् ।

ओलीको अवस्था बिग्रिएपछि अस्पताल लैजादासमेत अन्त्यन्त्रै गोप्य ढंगले अस्पतालको पछाडीको ढोकाबाट भित्र लगिएको थियो । उपचारमा निजी चिकित्सक डा. दिव्यसिंह शाहको नेतृत्वमा टोली खटिएको छ । टोलीका सदस्यालाई पनि उच्च तहको गोपनीयता राख्न कडा निर्देशन दिइएको छ ।

डायलाइसिसपछि ओलीले बालुवाटार नै फर्किने मन गरेपनि चिकित्सकहरुले मानेनन् । मिर्गौलाले काम गर्न छाडेको अवस्थामा डायलाइसिस सुरु गर्दा एकपटकले मात्रै पुग्दैन ।

डायलाइसिसपछि ओलीले बालुवाटार नै फर्किने मन गरेपनि चिकित्सकहरुले मानेनन् । मिर्गौलाले काम गर्न छाडेको अवस्थामा डायलाइसिस सुरु गर्दा एकपटकले मात्रै पुग्दैन् । उपचारमा संलग्न चिकित्सकहरुका अनुसार प्रधानमन्त्रीको अन्य स्वास्थ्य सूचकहरु पनि त्यति राम्रो देखिएका छैनन् । उनमा अहिले संक्रमणकोसमेत आशंका गरिएको छ ।

१२ वर्षअघि मिर्गौला प्रत्यारोपण गरिएका ओलीले केही महिनाअघि मात्रै सिंगापुरमा प्लाज्मा फेरेसिस गरिएको थियो । डायलाइसिस सुरु गरिएपछि अब नियमित डायलाइसिस वा प्रत्यारोपण मात्रै विकल्प हुन सक्छ ।

  • ताजा समाचार
  • जनप्रिय

हेल्थपोष्ट टुइट्स सबै

सिंगापुरमा २ साताको उपचारपछि फर्किएका प्रम ओलीको स्वास्थ्यअवस्था सामान्य, नियमित काम गर्न सक्ने

प्रधानमन्त्री केपी शर्मा ओली सिंगापुरमा २ साता लामो स्वास्थ्योपचारपछि स्वदेश फर्किएका छन् । शरीरमा मिर्गौलासम्बन्धी एन्टिबडी बढेपछि त्यसको निष्कासनका लागि प्लाज्मा फेरेसिस विधिबाट उपचार गर्न ५ भदौमा सिंगापुर प्रस्थान गरेर प्रधानमन्त्री ओली शुक्रबार अपराह्न स्वदेश फर्किएका हुन् । प्रधानमन्त्री ओलीको सिंगापुरको नेसनल युनिभर्सिटी अस्पतालमा विभिन्न चरणमा प्लाज्मा फिरोसिस विधिबाट उपचार गरिएको थियो ।

झन्डै डेढ दशकदेखि मिर्गौलारोगसित लडिरहेका प्रधानमन्त्री ओलीको करिब १२ वर्षअघि प्रत्यारोपित मिर्गौलामा समस्या देखिएपछि उनी १८ साउनमा स्वास्थ्यपरीक्षणका लागि सिंगापुर गएका थिए । त्यसवेला १० दिनसम्म नेसनल युनिभर्सिटी अस्पतालमा स्वास्थ्यपरीक्षण तथा उपचार गराएर उनी २८ साउनमा स्वदेश फर्किएका थिए । परीक्षणका क्रममा शरीरमा मिर्गौलासम्बन्धी एन्टिबडीको मात्रा बढेको पाइएको थियो । पहिलोपटक उपचार गराएर स्वदेश फर्किएको १० दिनपछि प्रम ओली ५ भदौमा प्लाज्मा फेरेसिसका लागि पुनः सिंगापुर प्रस्थान गरेका थिए ।

प्रत्यारोपणको करिब १२ वर्षपछि प्रम ओलीको शरीरले प्रत्यारोपित मिर्गौलालाई चिन्न थालेकाले त्यसलाई रिजेक्ट गर्न एन्टिबडी उत्पादन गर्न थालेको विशेषज्ञ चिकित्सकहरूको भनाइ छ । यस्तो अवस्थामा प्लाज्मा फेरेसिस विधिद्वारा शरीरबाट एन्टिबडी निष्कासन, पुनः प्रत्यारोपण र नियमित डायलाइसिस गरी ३ मात्र विकल्प रहने विशेषज्ञ बताउँछन् । प्रम ओलीको हकमा पहिलो विकल्पको प्रयोग गरिएको हो ।

प्रधानमन्त्रीको स्वास्थ्यअवस्था सामान्य छ, नियमित काममा बाधा छैन : डा. शाह
प्लाज्मा फेरेसिसपछि प्रधानमन्त्री ओलीको पछिल्लो स्वास्थ्यअवस्था सामान्य रहेको प्रधानमन्त्रीकी निजी चिकित्सक डा. दिव्या सिंह शाहले जानकारी दिएकी छिन् । वरिष्ठ मिर्गौला विशेषज्ञ डा. शाहले शुक्रबार प्रधानमन्त्री स्वदेश फर्किएलगत्तै विज्ञप्ति जारी गर्दै पछिल्लो स्वास्थ्यअवस्थाबारे जानकारी दिएकी हुन् ।

डा. शाहका अनुसार प्रधानमन्त्री ओलीले दैनिक कामलाई निरन्तरता दिन सक्नेछन् । सिंगापुरको २ साताको बसाइमा प्रधानमन्त्री ओलीको नेसनल युनिभर्सिटी अस्पतालमा शरीरमा बढी मात्रामा रहेको एन्टिबडीलाई वैज्ञानिक प्रविधिबाट हटाउने उपचार प्रक्रिया पूरा भएको डा. शाहले जारी गरेको विज्ञप्तिमा उल्लेख छ ।

  • ताजा समाचार
  • जनप्रिय

हेल्थपोष्ट टुइट्स सबै

गंगालाल अस्पतालमा नयाँ ओपिडी भवन, प्रधानमन्त्रीले भने– मुटुरोगको उपचारमा शिकारी युगको अन्त्य

प्रधानमन्त्री केपी शर्मा ओलीले गंगालाल अस्पतालको स्थापनाले मुटुरोगको उपचारको क्षेत्रमा शिकारीयुगको अन्त्य भएको बताएका छन् । गंगालाल अस्पतालका नवनिर्मित ओपिडी भवन एवं विस्तारित आकस्मिक सेवाको उद्घाटन गर्न पुगेका ओलीले सुरुमा रोगको निदान नभइकनै मान्ने मर्ने गरेको र त्यसलाई शिकारी लागेको भन्ने गरिएको प्रसंग उप्काउँदै अहिले त्यस्तो अवस्था नरहेको सुनाए ।

उनले गंगालाल अस्पताल स्थापना हुँदाको प्रसंगमा त्यतिबेला आफू गृहमन्त्री रहेको भन्दै चिकित्सकहरु मुटुको अस्पताल खोल्ने कुरा गर्दा निकै खुसी भएको सुनाए । ‘होचो सिलिङ भएको ठाउँ हुन्थ्यो भने, टाउको ठोकिन्थ्यो होला, म त्यति खुसी भएको थिएँ’ उनले भने, ‘मलाई चिन्ता भनेको शिकारयुगको अन्त्य होला र विज्ञान युगको सुरुवात होला कि नहोला भन्ने थियो’

ओलीले आफू सानो हुँदा अधिकांश मानिस मर्दा शिकारी लागेको, शिकारीले बाण हानेको भन्ने गरिएको सुनाए । ‘त्यही अस्पतालबाट अहिले १७ हजारको त ओपनहार्ट सर्जरी भएछ, यहीबाट नयाँ जीवन पाएकाहरु देशभर छन्’ ओलीले भने । ओलीले मुटुसँगै आँखा, प्लाष्टिक सर्जरी, मिगौला प्रत्यारोपणका क्षेत्रमा नेपालले उल्लेख्य प्रगती हाँसिल गरेको समेत बताए । ओलीले हाम्रा धर्मशास्त्रले अन्धविश्वास मात्रै नपस्किएको, विज्ञान प्रविधिको विकासका आधार र ज्ञान दिएको समेत बताए । ओलीले धवन्तरी, पतन्जलीदेखि चरकजस्ता तवस्वी र योगीहरु चिकित्सा विज्ञानमा धेरै प्रयोग गरेको बताए ।

म नक्कली हैन् अस्थायी बिरामी
प्रधानमन्त्री ओलीको स्वास्थ्यमा केही दिनदेखि स्वास्थ्यमा समस्या देखिएपनि अस्पतालको उद्घाटनमा आएको भन्दै अस्पतालका निर्देशकले स्वागत मन्तव्यकै क्रमा प्रसंग कोट्याएका थिए । निधार्रित समयभन्दा १ घण्टा ढिला पुगेको ओलीले स्वास्थ्यका कारण बसेरै संवोधन गरेपछि परम्परागत र आधुनिक चिकित्सा पद्धतिबारे करिव १ घण्टा धारप्रवाह दिए । ओलले मन्तव्य अन्त्य गर्ने समयमा भने, ‘यति धेरै बोल्यो नक्कली बिरामी रहेछ भन्नुहोला’ उनले भने, ‘म नक्कली बिरामी होइन् अस्थायी बिरामी ’

उनले आफू सुतिरहेको र निकै कर गरेपछि मात्रै आएको बताए । अन्य स्वास्थ्य समस्या के भएको थियो भन्ने नखुलाईकनै ओलीले मन्तव्यको बीचमा बुद्धिबंगारा झरेको प्रसंग उप्काए । ‘मेरो दायाँपट्टीको बुद्धिबंगारो हिजो आफै सुस्कियो, छामेर हेरेँ रगत पनि आएको थिएन् जरा पनि रहेनछ’ ओलीले थपे, ‘मेरो हजुरआमा १०१ वर्षको हुँदासम्म मकै चपाउँनुहुन्थ्यो’
उनले थपे, ‘मेरो हजुरआमालाई प्रेसर, सुगर केही थिएन, न कहिल्यै सुई लगाउँन दिनुभयो’ उनले भने, ‘उपचार भनेकै उहाँको एउटा खल र लोहोरो थियो, त्यसैमा कुटेर विभिन्न औषधि घरमै बनाएर खानुहुन्थ्यो’

भावुक बने निर्देशक,अवरुद्ध भयो गला
अस्पतालको इतिहास, थपिएको सेवाबारे जानकारी दिन मञ्चमा पुगेका अस्पतालका निर्देशक डा. ज्योतिन्द्र शर्माका गला मन्तव्यका क्रममा रोकिए । स्वार काप्यो – जब शर्माले आफूलाई सहयोग गर्नेका नाम लिए । शर्माले अस्पतालका पूर्व निर्देशकहरु डा. मनबहादुर केसी, डा. भगवान कोइरालादेखि आफूलाई निर्देशकको नियुक्ती हुँदाका स्वास्थ्यमन्त्री खगराज अधिकारीसम्मलाई सम्झे । श्रीमती, छोराछोरी, बाबुआमा र सासुससुरालाई धन्यवाद दिइरहँदा उनको गला अवरुद्ध भएका थिए । शर्माले आफ्नो कार्यकाल जम्मा १५ दिनमात्रै वाँकी रहेको भन्दै अगामी कार्यकालयका लागि आफूभन्दा योग्य व्यक्तिलाई निर्देशक बनाउँन समेत सरकारसँग आग्रह गरे ।

प्रधानमन्त्री दुई उपप्रधानमन्त्रीहरु ईश्वार पोखरेल र उपेन्द्र यादवसमेत उपस्थित कार्यक्रममा शर्मा २४ वर्षअघि ९ वेडबाट सुरु भएको अस्पताल अहिले मुटुरोगका सम्पूर्ण उपचार संभव भएको अन्तराष्ट्यि अस्पताल भएको बताए । उनले अस्पतालले हालसम्म १७ लाखलाई ओपिडी सेवा, ७० हजार प्रोस्युजुअर, १७ हजार ओपन हार्डसर्जरी र २३ हजार मुटुका शल्यक्रिया गरेको जानकारी दिए । करिव ५१ करोड लागतमा नवनिर्मित भवन चार वर्षअघि शर्मा नै निर्देशक भएपनि निर्माण प्रारम्भ भएको थियो । नवनिर्मित भवनबाट ३४ बेडको विस्तारित आकस्मिक कक्षसहित, ओपिडीसहित अन्य थुपै सेवा विस्तार गर्ने जानकारी शर्माले दिए । कार्यक्रममा तोकिएकै समयमा भवन निर्माण पूरा गर्न सघाएको भन्दै भवन विभागका इन्जिनियारसहित निर्माण कम्पनीसमेतलाई सम्मान गरिएको थियो ।

  • ताजा समाचार
  • जनप्रिय

हेल्थपोष्ट टुइट्स सबै