काठमाडौं महानगरपालिकाकी उपमेयर हरिप्रभा खड्गीलाई शुक्रबार हृदयाघात भएको छ । हृदयाघातपछि थापाथलीस्थित नर्भिक अस्पताल पुर्याइएकी खड्गीको अहिले उपचार भइरहेको महानगरले जनाएको छ ।

उपचारका क्रममा खड्गीको स्वास्थ्यमा सुधार भइरहेको उनका सहयोगीले जानकारी दिएका छन् । शुक्रबार मध्याह्न एक्कासि हृदयाघात भएपछि खड्गीलाई अस्पताल पुर्याइएको थियो । खड्गीको भर्खरै एन्जियोग्राफी गरिएको र उनको स्वास्थ्यअवस्था स्थिर रहेको अस्पतालले जनाएको छ । खड्गी अब खतरामुक्त रहेकाले उनको एक–दुई दिनमै डिस्चार्ज हुन सक्ने अस्पतालको भनाइ छ ।

मुलुककै सबैभन्दा ठूलो स्थानीय तह काठमाडौं महानगरपालिकामा नेपाली कांग्रेसका तर्फबाट उपमेयरमा प्रस्तुत गरिएकी खड्गी भारी मतका साथ जनताबाट निर्वाचित भएकी थिइन् । कांग्रेसका मेयरका उम्मेदवारले नेकपाका उम्मेदवारसित भारी मतले पराजय बेहोर्दा खड्गीले भने आफ्नो लोकप्रिय छविलाई प्रमाणित गरेकी थिइन् । उपमेयर खड्गी महानगरको काममा निरन्तर सक्रिय रहँदै आएकी छिन् ।

काठमाडौं महानगरपालिकाले निकालेको मेडिकल अधिकृतको मागसम्बन्धी सूचनाप्रति नेपाल चिकित्सक संघले गम्भीर आपत्ति जनाएको छ । महानगरले बुधबार प्रकाशन गरेको आवश्यकताको सूचनामा मेडिकल अधिकृत सातौँ तह भनी माग गरेपछि संघले शुक्रबार त्यसलाई सच्याउन महानगरलाई पत्र लेखेको हो ।

संघले महानगरको उक्त सूचनामा मेडिकल अधिकृत पदका लागि निर्धारण गरिएको सातौँ तहको योग्यता प्रचलित स्वास्थ्यसेवा ऐनको मर्म र भावनाविपरीत भएको ठहर गरेको छ । संघले अन्तर्राष्ट्रिय अभ्यासहरूका आधारमा सर्कक्षेत्रलगायत विभिन्न देशको उदाहरणसहित चिकित्सकको सुरु नियुक्ति नवौँ तहबाट हुनुपर्ने माग गर्दै आएकोमा नेपाल सरकारले ०६४ मा स्वास्थ्यसेवा ऐन संशोधन गरी चिकित्सकको सुरु नियुक्ति आठौँ तहबाट गर्ने प्रावधान ल्याएको थियो । तर, महानगरले त्यसविपरीत मेडिकल अधिकृतमा सातौँ तहको योग्यतासहितको सूचना गरी गरेपछि संघले महानगरलाई सच्याउन आग्रह गरेको हो ।

महानगरका कार्यकारी प्रमुखलाई सम्बोधन गरी संघका महासचिव डा. लोचन कार्कीले लेखेको पत्रमा भनिएको छ, ‘काठमाडौं महानगरपालिकाको सूचना १÷०७५–७६ मिति २०७६–०२–०८ मा प्रकाशित सूचनाअनुसार मेडिकल अधिकृत सातौँ तह भनी माग गरिएको हुनाले उक्त सूचना प्रचलित स्वास्थ्यसेवा ऐनको भावना र मर्मविपरीत भएको ब्यहोरा जानकारी गराउँदै अविलम्ब उक्त सूचना सच्याउन हुन हार्दिक अनुरोध गर्दछु ।’