निस्दी गाउँपालिकालाई प्रदेश ५ सरकारले दियो एम्बुलेन्स

पूर्वी पाल्पाको निस्दी गाउँपालिकालाई प्रदेश ५ सरकारले एम्बुलेन्स सहयोग गरेको छ । स्वास्थ्यसेवाको पहुँच जनतासम्म पुर्याउने उद्देश्यले गाउँपालिकाको वडा नम्बर २ स्थित सहलकोट स्वास्थ्यचौकीलाई सामाजिक विकास मन्त्रालयले एम्बुलेन्स प्रदान गरेको हो । प्रदेश सांसद नारायण आचार्य, युवराज खनाल, जिल्ला समन्वय समितिका अध्यक्ष दयाराज बस्यालले गाउँपालिकाका अध्यक्ष मुक्तबहादुर सारूलाई एम्बुलेन्सको साँचो तथा कागजात हस्तान्तरण गरेका छन् ।

हस्तान्तरण कार्यक्रममा प्रदेश सांसद नारायण आचार्यले निस्दी गाउँपालिका मानव सूचकांकमा पछि पर्नुका साथै स्वास्थ्यको पहुँचबाट समेत पछि परेका कारण एम्बुलेन्स सहयोग गरेको बताए । अर्का सांसद युवराज खनालले ग्रामीण बस्तीमा आधारभूत तहको स्वास्थ्य र शिक्षाका लागि सबै मिलेर काम गर्नुपर्ने बताए । जिल्ला समन्वय समिति, पाल्पाका प्रमुख दयाराज बस्यालले जनताको प्रत्यक्ष सरोकारसँग जोडिएर गरिएको सहयोगको सदुपयोग गर्न सबै लाग्नुपर्ने बताए ।

गाउँपालिकाका अध्यक्ष सारूले आफूहरूले पाएको उपहार एम्बुलेन्सको प्रयोग गरिब जनताको हितमा गर्ने बताए । केम खाम्चा स्मृति प्रतिष्ठानका अध्यक्ष तथा समाजसेवी देवीलाल लामिछानेले सदरमुकामदेखि करिब ९० किलोमिटर पूर्वमा रहेको सहलकोट, बाकामलाङ क्षेत्रका लागि प्राप्त एम्बुलेन्सले दूरदराजमा रहेका सर्वसाधारण, ज्येष्ठनागरिक, सुत्केरी तथा अशक्तको स्वास्थ्योपचारमा राहत पुर्याउने बताए ।

जिल्ला स्वास्थ्य कार्यालय पाल्पाका अनुसार पाल्पामा हाल २० वटा एम्बुलेन्स सञ्चालनमा छन् ।

  • ताजा समाचार
  • जनप्रिय

हेल्थपोष्ट टुइट्स सबै

देउसी–भैलो खेलेर क्लबले थाल्यो एम्बुलेन्स सेवा

रूपन्देहीको सैनामैना–८ रामापुरमा रहेको नवजागृति युवा क्लबले देउसी–भैलोबाट संकलित रकमले एम्बुलेन्स सञ्चालन गरेको छ । समयमै उपचार पुर्याउने उद्देश्यले देउसी–भैलोबाट बचेको रकमले एम्बुलेन्स सञ्चालन गरिएको क्लबका अध्यक्ष दिलीपकुमार न्यौपानेले बताए । उनका अनुसार देउसी–भैलोबाट उठेको रकमबाहेक एम्बुलेन्स किन्नका लागि सैनामैना नगरपालिका–८ ले एक लाख रकम सहयोग गरेको थियो भने ५० हजार रकम चन्दाबाट संकलन गरिएको थियो । एम्बुलेन्स किन्ने अभियानका साथ चार दिनसम्म रामापुर, कलौनी र बाँसगढीका घर–घरमा पुगी देउसी–भैलो खेलिएको अध्यक्ष न्यौपानेले बताए ।

नेपाल सरकारबाट राजस्व छुट गरी ११ लाख ५० हजार मूल्यबराबरको एम्बुलेन्स खरिद गरिएको आयोजकले जनाएको छ । क्लबका उपाध्यक्ष मित्रमणि खनालका अनुसार देउसी–भैलोबाट १० लाख रकम जम्मा भएको थियो ।

एम्बुलेन्सको सैनामैना नगरपालिकाका प्रमुख चित्रबहादुर कार्कीले एक कार्यक्रमबीच शुभारम्भ गरेका छन् । एम्बुलेन्सको शुभारम्भ गर्दै नगरप्रमुख कार्कीले सरकारले गर्नुपर्ने काममा क्लबले सहयोग गरेको भन्दै क्लबको सामाजिक कामको प्रशंसा गरे ।

एम्बुलेन्सको सैनामैना नगरपालिकाका प्रमुख चित्रबहादुर कार्कीले एक कार्यक्रमबीच शुभारम्भ गरेका छन् । एम्बुलेन्सको शुभारम्भ गर्दै नगरप्रमुख कार्कीले सरकारले गर्नुपर्ने काममा क्लबले सहयोग गरेको भन्दै क्लबको सामाजिक कामको प्रशंसा गरे । उनले सैनामैना नगरभित्रका जनताले एम्बुलेन्स प्रयोग गर्दा ज्येष्ठ नागरिक र अपांगता भएका बिरामीलाई ५० प्रतिशत छुट र सुत्केरी महिलालाई निःशुल्क सेवा दिन आग्रह गरे । उक्त छुट रकमको भुक्तानी सैनामैना नगरपालिकाले बेहोर्न प्रतिबद्धता जनाउँदै उनले एम्बुलेन्स सेवामा नगरपालिकाको सहभागिता रहने प्रतिबद्धतासमेत जनाए ।

कार्यक्रममा एम्बुलेन्स सञ्चालनका लागि सहयोग गर्ने १ सय ५ जना, देउसी–भैलोमा दान गर्ने र चन्दादातालाई क्लबले सम्मानपत्रद्वारा सम्मान गरेको थियो । ०६२ सालमा स्थापना भएको क्लबले देउसी–भैलोको दानबाट विगतदेखि नै टोल सरसफाइ, सडकबत्ती जडान र खेलकुदका कार्यक्रम गर्दै आएको छ । क्लबले सञ्चालनमा ल्याएसँगै सैनामैनामा एम्बुलेन्सको संख्या ४ पुगेको छ ।

  • ताजा समाचार
  • जनप्रिय

हेल्थपोष्ट टुइट्स सबै

अनुगमन गर्न नपाइने भन्दै चालकले ठप्प पारे एम्बुलेन्स सेवा

आकस्मिक उपचारसेवामा प्रयोग गरिने एम्बुलेन्सलाई जो–कोहीले आपत्कालीन उद्धारको साधनका रूपमा लिई यसको निर्बाध सञ्चालनमा सहयोग पुर्याउँछन् । बन्दा–हडताल होस् वा सशत्र विद्रोह, या त युद्ध नै किन नहोस्, जस्तोसुकै अप्ठ्यारो परिस्थितिमा पनि एम्बुलेन्सलाई कसैले रोक लगाउँदैन । जस्तो अप्ठ्यारो अवस्थामा पनि बिरामीलाई अस्पताल ल्याउन–लैजान छुट दिइएको हुन्छ । तर, चितवनका एम्बुलेन्सचालक आफैँ एम्बुलेन्स चलाउन छाडेर आन्दोलनमा उत्रिएका छन् ।

जिल्ला स्वास्थ्य कार्यालय चितवनले एम्बुलेन्समा अनुगमन गर्न लागेपछि चालकहरू मंगलबारबाट आन्दोलनमा उत्रिएका हुन् । संयुक्त एम्बुलेन्स चालक संघ ट्रेड युनियन चितवनले मंगलबार जिल्लामा एम्बुलेन्स नचलाई भरतपुर अस्पताल, चितवन मेडिकल कलेज, पुरानो मेडिकल कलेज, जिल्ला प्रहरी कार्यालय चितवनवरिपरि राखेर आन्दोलन गरेका हुन् ।

जिल्ला एम्बुलेन्स सेवा सञ्चालन समितिले जिल्लाका एम्बुलेन्सको दर्ता, नवीकरण, बिरामी बोकेको वा नबोकेको विषयमा अनुगमन गर्ने तयारी गरेको थियो । अनुगमनका क्रममा संयुक्त एम्बुलेन्स चालक संघ चितवनले जथाभावी स्थानमा अनुगमन गर्न नपाइने भन्दै एम्बुलेन्स सञ्चालनमा रोक लगाइएको बताएको छ । ‘अनुगमन गर्ने हो भने हामीलाई पत्र काटेर कार्यालयमा बोलाएर अनुगमन गर्नुपर्छ, बाटोमा गर्न पाइँदैन,’ युनियनका जिल्ला अध्यक्ष सुमन घलेले भने, ‘अनुगमन गर्दा हाम्रो संस्थालाई पत्राचार गरिनुपर्छ । बिरामी बोकेर सडकमा गुडेका एम्बुलेन्सलाई अनुगमनका नाममा रोक्न पाइँदैन ।’

चालकको लाइसेन्स खोज्ने, बिलबुक खोज्ने, चलिराखेको एम्बुलेन्सलाई रोकेर चेकजाँच गर्ने काम जिल्ला स्वास्थ्य कार्यालयले गर्न नहुने उनले बताए । आफ्नो अनुमतिबेगर अनुगमन गर्न नपाइने भन्दै आन्दोलनमा उत्रेको अध्यक्ष घलेले बताए । जिल्ला प्रहरी कार्यालयले संयुक्त एम्बुलेन्स चालक संघ ट्रेड युनियनका केन्द्रीय अध्यक्ष नवराज लामिछानेलाई पक्राउ गरेको छ । लामिछानेलाई नछोडेसम्म र अनुगमन गर्दा पत्रचार नगरेसम्म एम्बुलेन्स नचलाउने अध्यक्ष घलेको भनाइ छ । उनका अनुसार संयुक्त एम्बुलेन्स चालक संघ ट्रेड युनियनको केन्द्रले पनि आन्दोलन गर्ने तयारी गरेको छ ।

जिल्ला जनस्वास्थ्य अधिकृत शोभाखर अधिकारीले एम्बुलेन्सले पालना गर्नुपर्ने मापदण्ड चेकजाँचको तयारी गर्दा चालकहरूले विरोध जनाएको बताए । ‘एम्बुलेन्सहरूको दर्ता, चालकको लाइसेन्स, बिलबुक, नवीकरणको विषयमा हामीले एम्बुलेन्स चेक गर्ने तयारी गरेका थियौँ,’ अधिकारीले भने, ‘तयारी गर्नासाथ अनुगमन सुरु नै नभई चालकहरूले विरोध गर्नुभयो ।’ बिरामीभन्दा अन्य व्यक्ति बोकेको गुनासो आएपछि अनुगमन थालिएको अधिकारीले बताए । अनुगमन टोलीलाई नै अवरोध गरेर चालकहरूले अनुगमन गर्न दिएका छैनन् । टोलीमा जिल्ला रेडक्रस, प्रहरी, स्वास्थ्य कार्यालयका प्रतिनिधिहरू सहभागी छन् ।

चितवन जिल्लामा युनियनमा आबद्ध एम्बुलेन्स ९० वटा छन् । अनुगमनमा युनियनलाई समावेश नगरे आन्दोलन जारी राख्ने युनियनले चेतावनी दिएको छ । मेडिकल सिटीका रूपमा परिचित चितवनमा एम्बुलेन्सचालकले सामान्य मापदण्ड पनि पालना गरेको पाइँदैन ।

  • ताजा समाचार
  • जनप्रिय

हेल्थपोष्ट टुइट्स सबै

वीरमा माइनर ओटी, आइसियू, भेन्टिलेटर सेवासहितका तीन एम्बुलेन्स

केन्द्रीय अस्पतालले वीरमा गम्भीर बिरामीको जीवनरक्षाका लागि आवश्यक आधारभूत उपकरणसहितका तीनवटा एम्बुलेन्स ल्याएको छ ।
अस्पतालमा पहिलोपटक सरकारी मापदण्डअनुसार ‘क वर्ग’का यस्ता एम्बुलेन्स ल्याइएका हुन् । अस्पतालले खरिद गरेको १२८ स्लाइस सिटीसहित तीनवटा एम्बुलेन्सको स्वास्थ्यमन्त्री उपेन्द्र यादवले शुक्रबार औपचारिक सुरुवात गरे ।

वीर अस्पतालका निर्देशक डा. भूपेन्द्र बस्नेतका अनुसार नयाँ एम्बुलेन्समा आइसियूसहित, माइनर ओटी, अत्यावश्यक औषधि, ह्लिलचियर, ट्रली, स्पाइनल बेड, भेन्टिलेटर, कार्डियाक डिफिबिलेटरलगायत सेवा तथा उपकरण जडित छन् ।
गम्भीर अवस्थाका बिरामीको प्रकृतिका आधारमा जीवनदायी सपोर्टसहित अस्पतालसम्म पु-याउन प्रभावकारी हुने यस्ता एम्बुलेन्सले अस्पताल पुर्याउनुपूर्व हुने मृत्युदर घटाउन सघाउ पु-याउने निर्देशक डा. बस्नेतको विश्वास छ ।

 

उपकरणसहितको एम्बुलेन्सभित्रै तालिमप्राप्त स्वास्थ्यकर्मी राखेर अस्पताल ल्याइने र अस्पतालबाट रेफर हुने बिरामीका लागि एम्बुलेन्स प्रयोग हुने अस्पतालले जनाएको छ । मर्सिडिज भेहिकल कम्पनीको सहकार्यकमा फोर्स नामक कम्पनीले एम्बुलेन्सको डिजाइन गरेको हो ।

यसअघि अन्तर्राष्ट्रिय सभा–सम्मेलन तथा भिआइपी, भिभिआइपी भ्रमणमा समेत स्वास्थ्य प्रबन्ध गर्न निजी क्षेत्रका एम्बुलेन्स खोज्नुपर्ने विकल्पसमेत यससँगै अन्त्य भएको छ । सरकारले अघिल्लो आर्थिक वर्षमा उपलब्ध गराएको बजेटबाट प्रतिएम्बुलेन्स ४० लाख रूपैयाँमा खरिद गरिएको अस्पतालले जनाएको छ ।

अस्पतालमा यसअघि ‘ग’ वर्गबराबरको सेवा भएका तीनवटा एम्बुलेन्स मात्रै उपलब्ध थिए । शुक्रबार नै मन्त्री यादवले वीरमा बुधबार जडित नयाँ सिटी स्क्यान मेसिनको समेत उद्घाटन गरे ।
अस्पताल पुगेका मन्त्रीले जाइकाको सहयोगमा नवनिर्मित भवन र सरकारी खर्चमा निर्माणाधीन सर्जिकल ब्लकको अवलोकनसमेत गरेका थिए । उनले मन्त्रालयले सरकारी अस्पताललाई सुविधासम्पन्न बनाउन आवश्यक अत्याधुनिक उपकरण किन्न मन्त्रालय जतिसुकै वेला तयार रहने बताए ।

  • ताजा समाचार
  • जनप्रिय

हेल्थपोष्ट टुइट्स सबै

बर्दघाट नगरले ल्यायो ४ एम्बुलेन्स, सञ्चालन जिम्मा वडाध्यक्षहरूलाई

बर्दघाट नगरपालिका नवलपरासी पश्चिमले बिरामीको सुविधाका लागि एम्बुलेन्स सेवा सुरू गरेको छ । नगरवासीको स्वास्थ्यलाई मध्यनजर गरी नगरपालिकाले चारवटा एम्बुलेन्समार्फत सेवाप्रवाहको थालनी गरेको बर्दघाट नगरपालिकाका प्रमुख धीरज शर्मा बस्यालले बताए ।
नगरपालिकाका सबै वडालाई पायक पर्ने गरी एम्बुलेन्स सेवाको व्यवस्थापन गरिएको नगरप्रमुख शर्माले बताए । चारवटा एम्बुलेन्स खरिद गरी सञ्चालन गर्ने निर्णय गतवर्षको नगरसभाले गरेको थियो ।
साबिकको चारवटा गाविसलाई केन्द्रविन्दु बनाई एम्बुलेन्स सुरु गरिएको नगरपालिकाका प्रमुख प्रशासकीय अधिकृत चिरञ्जीवी गिरीले जानकारी दिए । उनका अनुसार सम्बन्धित वडाका वडाध्यक्ष एम्बुलेन्स सञ्चालन तथा व्यवस्थापन समितिको संयोजक रहनेछन् भने त्यहाँ रहेको हस्पिटल वा स्वास्थ्यचौकी ती एम्बुलेन्सका स्टेसन हुनेछन् ।
साबिकको माकर गाविसको चिसापानी हस्पिटलमा एउटा एम्बुलेन्स रहने र उक्त एम्बुलेन्सको व्यवस्थापनको संयोजन जिम्मा वडा नं. २ का वडाध्यक्षलाई हुनेछ । पञ्चनगर गाविसको भुताहामा रहेको स्वास्थ्यचौकीमा रहने अर्को एम्बुलेन्सको जिम्मेवारी ९ नम्बर वडाका वडाध्यक्षको हुनेछ । वडा नं. १३ मा पर्ने साबिकको जहदा गाविसको स्वास्थ्यचौकीमा अर्को एम्बुलेन्स रहनेछ । साबिकको दाउन्नेदेवी गाविसको स्वास्थ्यचौकीमा पर्ने एम्बुलेन्स सञ्चालनको जिम्मा वडा नं १४ का वडाध्यक्षको छ । ती समितिले एम्बुलेन्स सञ्चालनको व्यवस्थापनका साथै आय–व्ययसमेत राख्नेछन् । एम्बुलेन्स प्रयोग गरेबापत प्रतिकिलोमिटर ४० रूपैयाँ दररेट राखिएको छ । त्यसमा नगरपालिकाभित्रका स्थायी बासिन्दा भए २५ प्रतिशत छुट दिने नगरपालिकाले जनाएको छ ।
नगरपालिकाको जनस्वास्थ्य सेवा प्रमुख कृष्णहरि पौडेलका अनुसार बर्दघाट नगरपालिकाभित्र १५ बेडको चिसापानी अस्पताल, अर्को १५ बेडको सहिदस्मृति सामुदायिक अस्पताल, ४ वटा स्वास्थ्यचौकी, एउटा सहरी स्वास्थ्यकेन्द्र र एउटा सामुदायिक स्वास्थ्य एकाइ छन् ।
साबिकको माकर, पञ्चनगर, दाउन्नेदेवी, जहदा गाविसका साथै धुरकोट र जमुनिया गाविसका दुई–दुईवटा वडालाई एकीकृत गरी बर्दघाट नगरपालिका बनेको थियो । १६ वडा रहेको बर्दघाट नगरपालिकामा १२ हजार ७८ घरधुरी र ६१ हजार ४ सय ७२ जनसंख्या छ । पूर्व–पश्चिम राजमार्गको १६ किलोमिटर क्षेत्र यसै नगरपालिका क्षेत्रमा पर्दछ ।

  • ताजा समाचार
  • जनप्रिय

हेल्थपोष्ट टुइट्स सबै

दसैँका तीन दिन एम्बुलेन्स सेवा प्रभावित हुने

चुडामणी बस्याल, अध्यक्ष, संयुक्त एम्बुलेन्स चालक संघ, रुपन्देही ।

रुपन्देहीमा दशैका तीन दिन एम्बुलेन्स सेवा प्रभावित हुने भएको छ । एम्बुलेन्स चालकहरु दशै मनाउनका लागि घर जाने भएपछि सेवा प्रभावित हुने अवस्था आएको हो ।
संयुक्त एम्बुलेन्स चालक संघ, रुपन्देहीले दशैको नवमी, दशमी र एकादशी गरी तीन दिनका लागि नजिकका अस्पतालहरुमा मात्र एम्बुलेन्स सेवा दिन अनिवार्य गरेको छ ।
संघका अध्यक्ष चुडामणी बस्यालले एम्बुलेन्स चालकहरुको सोमबारको बैठकले चाडपर्वलाई मध्यनजर गरी तीन दिनका लागि सेवालाई कम गर्ने निर्णय गरेको बताए । तथापी सेवा ठप्प भने नहुने बस्यालको भनाई छ । रुपन्देहीमा संचालित एम्बुलेन्सका करिब १० प्रतिशत चालक रुपन्देही बाहिरका रहेको अनुमान छ ।
चालकहरुबीच यस्तो समझदारी भएको भएपनि आवश्यक परेको खण्डमा फोन सम्पर्क मार्फत चालकलाई सम्पर्क गरी टाढा जानुपर्ने अवस्थामा पनि सेवा दिइने उनले बताए । उनले तीन दिनका लागि अस्पतालमा रातीमा दिइने एम्बुलेन्स सेवालाई अनिवार्य नगरी नजिकको एम्बुलेन्सबाट सेवा दिने निणर्य भएको जानकारी दिए ।
सबै अस्पतालहरुमा त एम्बुलेन्स नहुने अवस्था देखिन्छ त ? भन्ने जिज्ञासामा अध्यक्ष बस्यालले आफुहरु फोन सम्पर्कमा रहने र चालकहरु बीच समन्वय गरी मिलाएर एम्बुलेन्स सेवा प्रवाह गर्ने बताए । उनले आफुले दसैँ रुपन्देहीमै रहेर मनाउने हुँदा समन्वयमा कुनै कसर नराखी एम्बुलेन्स सेवा दिनमा लागिपर्ने प्रतिबद्दता जनाए ।
संयुक्त एम्बुलेन्स चालक संघ, रुपन्देही ६० वटा एम्बुलेन्स आबद्ध छन् । संघले अस्पताल र क्षेत्र हेरी एम्बुलेन्सलाई सेवाको लागि जिम्मेवारी दिने गरेको छ । संघका अनुसार लुम्बिनी अञ्चल अस्तालमा २५ वटा, आम्दा अस्पतालमा २ वटा, बुटवल अस्पतालमा १ वटा, तिलोत्तमा अस्पतालमा १ वटा, मेडिटेक अस्पतालमा १ वटा, चौराहा अस्पतालमा १ वटा, क्रिमशन अस्पतालमा ४ वटा, यूर्निभर्सल मेडिकल कलेजमा ८ वटा, देवदह मेडिकल कलेजमा २ वटा, देवदह क्षेत्रमा ८ वटा, गौतमबुद्ध मुटु अस्पतालमा १ वटा लगायत छन् ।

 

  • ताजा समाचार
  • जनप्रिय

हेल्थपोष्ट टुइट्स सबै