सुदूरपश्चिम प्रदेशको धनगढीमा रहेको सेती प्रादेशिक अस्पतालका लागि पौने दुई करोडमा खरिद गरिएको अक्सिजन प्लान्ट महिनौँदेखि थन्किएको छ । प्रदेश सामाजिक विकास मन्त्रालयको १ करोड ७४ लाख बजेटमा खरिद गरिएको अक्सिजन प्लान्ट महिनौँदेखि थन्किएको हो । सुरुमा महिनौँसम्म आपूर्तिकर्ताले अन्यत्रै थन्क्याएको अक्सिजन उत्पादन गर्ने मेसिन अर्थात् अक्सिजन जेनेरेटर प्लान्ट अहिले सेती प्रादेशिक अस्पतालमा थन्क्याइएको छ ।
कमिसनको चलखेलमा धनगढीको डिबी मेडिसिनलाई टेन्डर दिन खोजिएको भन्दै सुरुवातदेखि नै खरिद प्रक्रिया विवादित बनेको थियो । अहिले उपकरण खरिद गरेको महिनौँ बितिसक्दासमेत सञ्चालनका लागि कुनै प्रक्रिया अगाडि बढ्न सकेको छैन ।
अस्पतालले उपकरण एउटा कोठामा राखिएको बताएको छ । तर, आपूर्तिकर्ताको भने उपकरण जडान भइसकेको दाबी छ । धनगढी आएका आपूर्तिकर्ता कम्पनीका इन्जिनियर सुशीलकुमार सिंहले अक्सिजन प्लान्ट जडान भइसकेको बताए ।
यता अस्पतालका मेसु डा. हेमराज पाण्डेयले भने उपकरण एउटा कोठामा राखिएको बताए । अहिले अक्सिजन प्लान्ट सञ्चालनका लागि मन्त्रालयसँग कुनै समन्वय हुन सकेको छैन । सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले जडानका क्रममा भोल्टेजको समस्या देखिएको बताउँदै छिट्टै जडान गरेर सञ्चालनमा ल्याउने तयारी रहेको बताए ।
अक्सिजन प्लान्ट खरिदका लागि गत आर्थिक वर्षदेखि नै प्रक्रिया सुरु भए पनि आफूले चाहेको आपूर्तिकर्तामार्फत खरिद गर्ने चलखेल भएको भन्दै सर्वोच्च अदालतमा उजुरी परेको थियो । सर्वोच्चको मुद्दा किनारा नलागे पनि उपकरण खरिद गर्दै लामो समयदेखि थन्क्याइएको हो ।
सेती अस्पतालले अक्सिजन प्लान्ट नहुँदा सिलिन्डर खरिदमै बर्सेनि ५० देखि ६० लाख खर्च गर्दै आएको छ । अस्पतालमा गम्भीर प्रकृतिका बिरामीको चाप अत्यधिक भएका वेला एक दिनमै २५ देखि ३० हजारसम्मको अक्सिजन आवश्यक पर्ने गरेको छ ।
