अमेरिकाले फाइजर कम्पनीको बुस्टर डोजलाई अनुमति दिएको छ। फूड एण्ड ड्रग एडमिनिस्ट्रेसन (एफडिए) ले बुस्टर डोजलाई अनुमति प्रदान गरेको हो।

तर, बुस्टर डोज ६५ वर्षमाथिका र जोखिममा रहेकालाई मात्र लगाउन हाललाई अनुमति दिइएको एफडिएले जनाएको छ। यसका लागि ६५ वर्ष वा त्यो भन्दा माथिको उमेर हुनुपर्ने र खोपको अन्तिम मात्रा कम्तिमा ६ महिनाअघि लगाएको हुनुपर्ने बताइएको छ।

यस्तै उच्च जोखिममा रहेका र फ्रन्टलाईनमा खटिनेलाई पनि बुस्टर डोज दिन सकिने एफडिएले जनाएको छ। बुस्टर डोजले रोग नियन्त्रण तथा रोकथाम सेन्टर (सिडिसी) बाट पनि अनुमति पाउनुपर्नेछ।

बुस्टर डोजलाई सिडिसीले अनुमति दिनेबारे बुधबार र आज छलफल गर्दैछ। उसले पनि चाँडै अनुमति दिने संकेत गरेको छ। सिडिसीले उच्च जोखिम र फ्रन्टलाइनमा रहेका नागरिकको पहिचान गर्ने र मापदण्ड तय गर्ने बताइएको छ।

यता, एफडिएका कमिस्नर जेनेट उडककले स्वास्थ्य क्षेत्रमा काम गर्ने, शिक्षक र डे केयरका स्टाफ, खाद्यान्न पसलका कामदार, घरवारविहीनका लागि बनाइएका आश्रम र कैदीहरु जोखिमको सूचीमा रहेको भन्दै उनीहरुले बुस्टर डोज लगाउन पाउने बताएका छन्।