बिहारमा नक्कली मदिरा सेवनबाट १३ जनाको मृत्यु

हेल्थपोस्ट नेपाल

बिहार-भारतको पूर्वी राज्य बिहारमा नक्कली मदिरा सेवनका कारण पाँच दिनमा झण्डै १३ जनाको मृत्यु भएको छ। स्थानीय सञ्चारमाध्यमले बिहीबार जनाएअनुसार उक्त घटना दक्षिण बिहारको औरङ्गाबाद र गया जिल्लामा भएको बताइएको छ। बिहार राज्यका मुख्यमन्त्री नितिश कुमारले रक्सीको बिक्री र उपभोगमा प्रतिबन्ध लगाएपछि धेरै वर्षदेखि सुक्खा राज्यको रूपमा चर्चा गरिने गरिएको छ।

तर छिमेकी राज्यबाट खरिद गरी बिहारमा गोप्य रूपमा बिक्री गर्ने मदिरा माफियाको संलग्नता रहेको अवैध मदिराको कारोबार राज्यमा भइरहेको छ। मदनपुर र सलैया प्रहरी चौकीका प्रहरीले फोनमा घटनाको अनुसन्धान भइरहेको बताए पनि अहिलेसम्म मृत्यु हुनेको यकिन संख्या भने बताउन अस्वीकार गरेका छन्।

धेरै जसो पीडितहरूले बान्ता हुने, पेट दुख्ने र कम देख्ने अनुभव गरेको बताइएको छ। छिमेकी राज्य झारखण्डबाट ल्याइएको मदिरा मदनपुर, सलैया र गया जिल्ला क्षेत्रमा विक्री गरिएको जी न्युजले उल्लेख गरेको छ ।

यसैबीच भारतको राष्ट्रिय मानव अधिकार आयोगले बिहारमा भएको सो घटनाबारे सरकारलाई नोटिस पठाएको छ।



Leave a Reply

Your email address will not be published.