स्वास्थ्यकर्मी तथा स्वास्थ्य संस्थाको सुरक्षासम्बन्धी अध्यादेश जारी, के प्रावधान थप गरियो?

हेल्थपोस्ट नेपाल

काठमाडौं–स्वास्थ्यकर्मी तथा स्वास्थ्य संस्थाको सुरक्षालाई जोड दिँदै अध्यादेश जारी गरिएको छ। ‘नेपालमा स्वास्थ्यकर्मी तथा स्वास्थ्य संस्थाको सुरक्षासम्बन्धी (पहिलो संशोधन) अध्यादेश २०७९’ आइतबार राष्ट्रपति विद्यादेवी भण्डारीले जारी गरेकी हुन्।

नेपाल चिकित्सक संघले २०६६ सालको ऐन समयसापेक्ष संशोधन गर्न पटक–पटक गरेको आग्रह र नेपाल सरकारसँगको सम्झौताअनुसार संशोधन अध्यादेश जारी गरिएको हो।

अध्यादेशमा ‘स्वास्थ्य संस्थामा आगजनी गर्ने, स्वास्थ्य संस्थामा तोडफोड वा अन्य कुनै कार्य गरी हानीनोक्सानी पुर्‍याउने तथा स्वास्थ्यकर्मी वा स्वास्थ्य संस्थामा कार्यरत कर्मचारीलाई कुटपिट गर्न वा शारीरिक रुपमा चोट पुर्‍याउने’ मुद्दामा तत्काल प्राप्त प्रमाणबाट कसूरदार देखिने भएमा वा कसूरदार हो भन्ने विश्वास गर्ने मनासिब आधार भएमा मुद्दा हेर्ने अधिकारीले अभियुक्तलाई पुर्पक्षका लागि थुनामा राख्नेछ भन्ने प्रावधान थप गरिएको छ।

नयाँ अध्यादेश अनुसार स्वास्थ्य संस्थामा तोडफोड वा अन्य कुनै कार्य गरी हानी नोक्सानी पुर्‍याउने र स्वास्थ्यकर्मी वा स्वास्थ्य संस्थामा कार्यरत कर्मचारीलाई कुटपिट गर्न वा शारीरकि रुपमा चोट पुर्‍याउनेलाई पनि पुर्पक्षका लागि थुनामा राखेर थप सजाय हुने व्यवस्था गरिएको छ। अध्यादेशको कसूर र सजायसम्बन्धी व्यवस्थामा ‘कसैले दफा ३ बमोजिमको कुनै कार्य गरेमा यस ऐनअन्तर्गतको कसूर गरेको मानिनेछ’ भनिएको छ।

अब स्वास्थ्य संस्थामा आगजनी गरेमा दुई वर्षदेखि पाँच वर्षसम्म कैद वा दुईलाख रुपैयाँदेखि पाँचलाख रुपैयाँसम्म जरिवाना वा दुवै सजाय हुने व्यवस्था अध्यादेशमा उल्लेख छ। यस्तै, स्वास्थ्य संस्थामा तोडफोड वा अन्य कुनै कार्य गरी हानि नोक्सानी पुर्‍याउने र स्वास्थ्यकर्मी वा स्वास्थ्य संस्थामा कार्यरत कर्मचारीलाई कुटपिट गर्न वा शारीरिक रुपमा चोट पुर्‍याउने कार्य गरेमा तीन वर्षसम्म कैद वा तीनलाख रुपैयाँसम्म जरिवाना वा दुवै सजाय हुने भनिएको छ।

स्वास्थ्य संस्थामा तालाबन्दी गर्न वा घेराउ गर्न नहुने, स्वास्य्य संस्थामा उपचारका लागि आएका वा उपचाररत बिरामीको उपचार गर्ने कार्यमा कुनै किसिमले बाधा पुर्‍याउन नहुने र स्वास्थ्यकर्मी वा स्वास्थ्य संस्थामा कार्यरत कर्मचारीलाई हातपात गर्न, कुनै किसिमले धम्की दिन, गाली गलौज गर्न वा अभद्र वा अपमानजनक व्यवहार गर्न नहुने अध्यादेशमा उल्लेख छ। यदि यस्तो कार्य गरेमा एक वर्षसम्म कैद वा एकलाख रुपैयाँसम्म जरिवाना वा दुवै सजाय हुने व्यवस्था छ।

के भन्छ चिकित्सक संघ

चिकित्सक संघले आइतबार नै विज्ञप्ति जारी गर्दै थप गरिएको यो प्रावधानले चिकित्सक तथा स्वास्थ्यकर्मी एवं स्वास्थ्य संस्थामाथि हुने अस्वाभाविक र गैरमानवीय कार्यलाई पूर्ण रुपमा निषेध गर्ने विश्वास व्यक्त गरेको छ।

संघले यो अध्यादेशका बारेमा सम्पूर्ण चिकित्सक एवं स्वास्थ्यकर्मीलाई यथेष्ट जानकारी राख्न तथा अध्यादेशका सम्बन्धका सबैलाई जानकारी गराउनका लागि संघका सम्पूर्ण शाखा कार्यालय तथा देशभर स्वास्थ्य संस्था तथा अस्पतालहरुले आ–आफ्नो स्वास्थ्य संस्था तथा अस्पतालमा फ्लेक्स बनाइ सबैलाई सूचित गर्न आग्रह गरेको छ।

 



Leave a Reply

Your email address will not be published.