बागलुङका सबै नगरमा आँखा उपचार सम्भव

हेल्थपोस्ट नेपाल

बागलुङ- जिल्लाका सबै शहरी क्षेत्रमा आँखा उपचारको पहुँच विस्तार भएको छ। जिल्लाका चारवटै नगरपालिकाको केन्द्रमा आँखा उपचार केन्द्र स्थापना भएसँगै साना शहरी क्षेत्रमा आँखा उपचारको पहुँच विस्तार भएको हो ।

सदरमुकाममा धौलागिरि आँखा अस्पताल र बाँकी तीन नगरपालिकामा आँखा उपचार केन्द्रमार्फत सेवा प्रवाह भइरहेको नेपाल नेत्रज्योति सङ्घ बागलुङका अध्यक्ष भरत पुरीले बताए। यसअघि उपचार केन्द्र नरहेको जिल्लाको जैमिनीमा बिहीबार आँखा उपचार केन्द्र स्थापना भएपछि नगरपालिकामा सर्वसाधारणको आँखा उपचारमा पहुँच पुगेको हो।

गलकोटको हटिया बजार र ढोरपाटन नगरपालिकाको बुर्तिबाङ बजारमा यसअघि नै आँखा उपचार केन्द्र स्थापना भइसकेको छ । नेत्रज्योति सङ्घ बागलुङले हिमालयन आँखा अस्पताल पोखराको प्राविधिक सहयोग र जैमिनीको व्यवस्थापनमा आँखा उपचार केन्द्र स्थापना गरेको हो। अब दक्षिणी क्षेत्रका नागरिकले आँखाको सामान्य जाँच र उपचारका लागि सदरमुकाम धाउनुपर्ने बाध्यता हटेको छ । उपयोगविहीन कृषिउपज सङ्कलन केन्द्रको भवन प्रयोग गरेर उपचार केन्द्र सञ्चालनमा ल्याइएको हो।

तत्कालका लागि नेत्रज्योति सङ्घले कर्मचारीको व्यवस्थापन गर्ने र स्थानीय तहको निर्वाचनपछि नगरपालिकाले आँखा उपचार केन्द्रको सबै व्यवथापन गर्नेछ । प्राविधिक सहयोग भने हिमालयन आँखा अस्पतालसँग सहकार्य गरेर नेत्रज्योति सङ्घले गर्ने अध्यक्ष पुरीले बताए। तत्कालका लागि आँखाको जाँच तथा उपचारका लागि आवश्यक रु १४ लाख मूल्य बराबरका उपकरण हिमालयन आँखा अस्पतालले सहयोग गरेको छ।



Leave a Reply

Your email address will not be published.