मोरङमा फागुन २८ गतेदेखि हात्तीपाइले विरुद्धको औषधि खुवाइने

हेल्थपोस्ट नेपाल

मोरङ – मोरङमा हात्तीपाइले विरुद्धको औषधि खुवाउने तयारी गरिएको छ। यही फागुन २८ गतेदेखि औषधि खुवाउने तयारी थालिएको हो। मोरङको कूल जनसङ्ख्या ११ लाख ११ हजार १४६ मध्ये १० लाख ७४ हजार ७९० जनालाई सो रोगविरुद्धको औषधि खुवाइने जनस्वास्थ्य प्रमुख सुरेश मेहताले जानकारी दिए।

गत वर्षमा ८३ प्रतिशत नागरिकलाई खुवाइएको सो औषधि यसवर्ष ९० प्रतिशतलाई खुवाउने अभियान तीव्र पारिएको आज आयोजित पत्रकार सम्मेलनमा प्रमुख मेहताले बताए। औषधि खुवाउन लगभग १४ दिनसम्म अभियान चल्ने बताइएको छ।

औषधि नखाने व्यक्तिका कारण नियमित खाइरहने मानिसलाई थप औषधि खाइरहनु पर्ने भएको यो अभियानलाई सफल बनाउन सबैले आ–आफ्नो तहबाट सहयोग गर्नु पर्ने जनस्वास्थ्य अधिकृत धरणीधर निरौलाले बताए। मोरङको सुनवर्षी नगरपालिकामा ३०० मानिसको नमूना परीक्षण गर्दा २४ जनामा हात्तीपाइले रोगको लक्षण देखिएकाले सो क्षेत्रमा हात्तीपाइले विरुद्धको औषधि खुवाउन कुनै पनि नागरिकलाई छुट्न नदिन विशेष ध्यान दिइने प्रमुख मेहताको भनाइ छ।

हात्तीपाइले विरुद्धको औषधि खुवाउने यस वर्ष ११ औं चरण हो भन्दै यसमा इभरमेटिन, डिइसी र अल्बेन्डाजोल औषधि खुवाउने जनस्वास्थ्य निरीक्षक रामकुमार लामाले बताए। उनले गर्भवती महिला तथा छारे रोग भएको मानिसले यो औषधि खान नहुने भन्दै लक्षित समूह दुई वर्ष माथि उमेरका सबै रहेका बताए।



Leave a Reply

Your email address will not be published.