काठमाडौं उपत्यकामा बर्डफ्लु देखिएपछि काभ्रेमा उच्च सतर्कता

हेल्थपोस्ट नेपाल

काठमाडौं – राजधानी काठमाडौंसहित केही जिल्लामा बर्डफ्लु देखिएपछि उपत्यकाको पूर्वीनाका तथा कुखुरा उत्पादनमा मुलुककै दोस्रो काभ्रेपलाञ्चोकमा उच्च सतर्कता अपनाउन थालिएको छ। यसका लागि जिल्लाको मुख्य नाकामा पन्छीको जाँचलाई कडाइ गरिनुका साथै स्थानीय तहलेसमेत सरोकारवालासँगको छलफललाई तीव्रता दिएका छन्।

पनौती नगरपालिकाले आफ्नो क्षेत्रभित्रका व्यावसायिकरुपमा कुखुरा, कालिज तथा पशुपन्छीजन्य पालक कृषकसहित बुधबार महामारीजन्य रोगबारे सरोकारवालासँग अन्तक्रिया कार्यक्रमको आयोजना गरेको थियो। कार्यक्रममा नगर प्रमुख भीम न्यौपानेले बर्डफ्लुप्रति सावधानी अपनाउन व्यवसायीलाई आग्रह गर्दै यदी रोग देखिएमा नलुकाउन आग्रह गरे। उनले भने, ‘रोग देखिए आफ्नो पनि क्षति अरुको पनि क्षति, महामारी हुन नदिउँ यसप्रति विशेष सचेत रहन आग्रह गर्दछु।’

पशुपन्छी विशेषज्ञ डा. सुदीप हुमागाईले फार्म व्यवस्थापन तथा सरसफाइमा चनाखो रही जनधनको क्षति हुन नदिन व्यवसायीलाई आग्रह गरे। साथै उनले हालको बर्डफ्लु सङ्क्रमण मानिसमासमेत हुनसक्ने लक्षणसहित बर्डफ्लु देखिएकाले उच्च सावधानी अपनाउनुपर्ने आवश्यकता औंल्याए। उनले भने, ‘पन्छी पालिएको खोर सधैँ सफा राख्दै निसंक्रमण गर्नुपर्छ। त्यसो गर्नेले मास्क, बुट र पञ्जा अनिवार्य लगाउनुपर्छ।’

नगरपालिकाका पशु चिकित्सक मणिप्रसाद सापकोटाले विभिन्न ५० स्थानबाट बर्डफ्लु परीक्षणका लागि ‘स्याम्पल’ पठाइएको जानकारी दिए। पोल्ट्री व्यवसायी संघका सल्लाहकार मधुसुदन गुरागाईले नयाँ-नयाँ रोगले व्यवसायीलाई धरासायी बनाइरहेको अवस्थामा प्रविधिमैत्री भई जैविक सुरक्षासँगै नयाँ सुरक्षाका रणनीति अपनाउन आग्रह गरे।

गत हप्ता बनेपा नगरपालिकाले पनि पन्छीमा लाग्ने सङ्क्रामक रोगका विषयमा स्थानीय सरोकारवाला भेला गरी छिमेकी जिल्लासँग जोडिएको आफ्ना नाकामा सुरक्षा जाँचका विषयमा छलफल गरेको थियो। साथै नगरपालिकाले आफ्ना क्षेत्रभित्र रहेको पन्छीको जाँच गर्ने योजनाअनुसार बर्डफ्लु गतिविधि गरिरहेको छ। भेटेरीनरी अस्पताल तथा पशु सेवा विज्ञ केन्द्रले जिल्लास्थित उपत्यकाको प्रवेश नाका साँगा र जिल्लाको पूर्वी नाका विपी राजमार्गअन्तर्गत रोशी गाउँपालिकाका मङ्गलटारमा केही हप्ताअघि पन्छीको जाँच केन्द्र स्थापना गरिसकेको छ। गत माघ १६ गते मोरङका दुई स्थानमा देखिएको बर्डफ्लु सङ्क्रमण त्यसयता चितवन र सङ्घीय राजधानी काठमाडौंमा देखिएको छ।



Leave a Reply

Your email address will not be published.