मनाङवासीका दु:ख : एक्स–रे का लागि जानुपर्छ अर्को जिल्ला

हेल्थपोस्ट नेपाल

मनाङ – सामान्य रोग लागे पनि मनाङवासीले निकै दु:ख पाउने गरेका छन्। सामान्य औषधि उपचारका लागि पनि अर्को जिल्ला नपुगेसम्म हुँदैन। जिल्लाको एकमात्र अस्पतालमा समेत जिल्लावासीलाई आवश्यक आधारभूत उपचार तथा औषधि पर्याप्त पाउने अवस्था छैन।

मनाङ भौगोलिक रुपमा विकट भएकाले पनि उपचारको पहुँचमा पुग्न समस्या छ। सामान्य उपचारका लागि पनि जिल्लाबाहिर जानुपर्ने समस्या हल गर्न सम्बन्धित निकायलाई स्थानीयवासीको गुनासो छ। सामान्य चोटपटक लागेपछि उपचारका लागि अर्को जिल्ला जानुपर्ने बाध्यता हिमाली जिल्ला मनाङका स्थानीयले खेपिरहेका छन्।

एक्स–रे, भिडियो एक्स–रे लगायतका प्राविधिक सेवा मनाङमा उपलब्ध छैनन्। यसले गर्दा यहाँ कुनै चोटपटक लागेका व्यक्ति दुई/तीन दिन लगाएर छिमेकी जिल्ला पुगेर उपचार गर्नुपर्ने बाध्यता छ। सामान्य देखिएका चोटपटकको उपचारका लागि जिल्लामा मेसिन उपलब्ध रहे पनि उपयोग भने नभएको स्वास्थ्य कार्यालय मनाङका प्रमुख बद्री आचार्यले जानकारी दिए। उनका अनुसार जिल्लाको एउटा मात्रै अस्पतालमा पनि सामान्य सेवा प्रवाह गर्न मुस्किल छ। ‘अस्पतालमा आवश्यक चिकित्सक पनि उपलब्ध छैनन्। अस्पतालमा उपलब्ध सामग्री उपयोग गर्न सकेका छैनौं। यस विषयमा सम्बन्धित निकाय समक्ष समेत जानकारी गराएका छौं’, आचार्यले भने।

विकट जिल्ला भीरपाखामा काम गर्ने कामदार तथा स्थानीयमा चोटपटक लागेमा अस्पतालसम्म पुर्याए पनि आवश्यक उपचार पाउन नसकेर अन्यत्र जिल्ला पुर्याउन सकिएन भने ज्यान जान सक्ने अवस्था छ। अस्पतालमा आएका बिरामीलाई सामान्यबाहेक अन्य सेवा दिन नसकेको उनले बताए।

‘मनाङवासीलाई हेलिकप्टर चार्टर गरेर मात्रै उपचारको पहुँचमा पुग्न सक्ने अवस्था छ। मौसम अनुकूल नभएको अवस्थामा ज्यान नै जान सक्छ। यस्तो जोखिमबाट जोगाउने उद्देश्यले प्रदेश, सङ्घ तथा स्थानीय सरकार समक्ष पहल गरिरहेका छौं। हालसम्म सुनुवाई भने भएको छैन,’ आचार्यले भने, ‘समयमै सम्बन्धित निकाय सचेत भइदिएमा जिल्लावासीलाई यहीँ नै सहज रुपमा उपचार सेवा दिन सकिनेछ।’

प्रमुख जिल्ला अधिकारी रवीन्द्रप्रसाद आचार्यले स्वास्थ्य सेवा सहज बनाउन स्थानीय सरकारसँग पनि समन्वय भइरहेको बताए। उनका अनुसार यहाँका स्थानीय सरकारले पनि प्रदेश र सङ्घीय सरकारलाई यसका लागि दबाब दिएका छन्। ‘जिल्ला अस्पतालमा प्राविधिकको आवश्यकता छ। अस्पतालमा मेसिन मात्रै जडान गरेर भएन। चलाउने प्राविधिकको आवश्यकता छ। यसको पूर्तिका लागि प्रदेश सरकारसमक्ष पेश गरेका छौं। विकट जिल्ला भएकाले होला यहाँ कर्मचारी आउन नचाहेको जस्तो पनि लाग्छ। स्थानीय, प्रदेश र सङ्घीय सरकारले यसको व्यवस्थापन गरोस् भनेर अपिल गरिरहेका छौं’, प्रजिअ आचार्यले भने, ‘छिट्टै प्राविधिकको व्यवस्थापन गर्ने काममा लाग्नेछौं।’

स्थानीय सरकारले पटक-पटक जिल्लामा कम्तीमा आधारभूत स्वास्थ्य सेवा सहज बनाउन प्रदेश र सङ्घीय सरकारसमक्ष आग्रह गरिरहेको जनाउँदै आएका छन्। समयमा सम्बन्धित निकायको ध्यान पुगेमा मनाङवासीको सकसपूर्ण सडकमार्फत अर्को जिल्लामा पुगेर उपचार गर्नुपर्ने बाध्यता हट्न सक्नेछ।



Leave a Reply

Your email address will not be published.