नक्कली मास्क बिक्री गर्ने चारजना काठमाडौंबाट पक्राउ

हेल्थपोस्ट नेपाल

काठमाडौं – नेपाल प्रहरीले विदेशी मास्कको नक्कल गरी कम गुणस्तरको मास्क बनाएर बिक्री गर्ने गरेको तथ्य फेला पारेको छ। काठमाडौंको त्रिपुरेश्वरमा नक्कली मास्क बिक्री भइरहेको भन्ने सूचनाका आधारमा खोजी गर्दा उक्त तथ्य फेला परेको प्रहरी प्रधान कार्यालयले जनाएको छ।

त्रिपुरेश्वरमा रहेको महालक्ष्मी इशान इन्टरप्राइजेज प्रालि र अनेष्ट सप्लायर्सले अमेरिकी ब्राण्डको थ्रीएम मास्कको नक्कल गरी उस्तै देखिने कम गुणस्तरको मास्क बिक्री गरेको पाइएको हो। यसरी बिक्रीमा संलग्न चारजनालाई ६ हजार ११४ थान थ्रीएम मास्कसहित पक्राउ गरिएको छ।

महानगरीय प्रहरी परिसरका अनुसार महालक्ष्मी इशान इन्टरप्राइजेजबाट ४ हजार १९४ थान र अनेष्ट सप्लायर्सबाट १ हजार ९२० थान नक्कली थ्रीएम मास्क प्रहरीले बरामद गरेको छ। पक्राउ पर्नेमा काठमाडौं महानगरपालिका–११ त्रिपुरेश्वरस्थित महालक्ष्मी इशान इन्टरप्राइजेजका सञ्चालक ३४ वर्षीय वुद्धिबहादुर कार्की, काठमाडौं भोटेबहाल बस्ने भारत राजस्थानका नक्कली मास्क सप्लायर्स यश अग्रवाल, २० वर्षीय श्रीयान्स लावटी र ललितपुर सातदोबाटो बस्ने अनेष्ट सप्लायर्सका म्यानेजर सङ्खुवासभाका २३ वर्षीय मुक्तिप्रसाद पोखरेल रहेका छन्।



Leave a Reply

Your email address will not be published.