तीव्र गतिमा फैलिने ‘ओमिक्रोन’ : एकबाट १० जनामा सजिलै सर्नसक्छ संक्रमण

हेल्थपोस्ट नेपाल

काठमाडौं – कोरोना भाइरसको ओमिक्रोन भेरियन्टको संक्रमण अन्यभन्दा तीव्र गतिमा बढ्ने अनुसन्धानले देखाएको छ। पाटन स्वास्थ्य विज्ञान प्रतिष्ठान र नेपाल स्वास्थ्य अनुसन्धान परिषद्मा आबद्ध रहेका सङ्क्रामक रोग विशेषज्ञ प्रा. डा. जनक कोइरालाले ओमिक्रोन भेरियन्ट (तेस्रो लहर) ले पहिले देखिएको भेरियन्टको तुलनामा धेरै मानिसलाई सङ्क्रमित बनाउने बताए। उनका अनुसार ओमिक्रोन भेरियन्टले एकजनाबाट १० जनामा सङ्क्रमण सार्ने गर्दछ।

‘सङ्क्रमणको पहिलो लहरले एकजनाबाट अर्को दुई जनालाई, दोस्रो लहरमा डेल्टा भाइरसले एकजनाबाट चारदेखि पाँचजनासम्म सङ्क्रमित बनाउने गर्दथ्यो’, उनले भने, ‘तर अहिले तेस्रो लहरको ओमिक्रोन भाइरसले एकजनाबाट १० जनालाई सङ्क्रमित गराउने गर्दछ। त्यसैले यो द्रूत गतिमा फैलिन्छ।’

ओमिक्रोन भेरियन्टबाट बच्नका लागि व्यक्ति आफू नै सजक हुनुपर्ने उनले बताए। ‘व्यक्तिबाट व्यक्तिमा सर्ने रोग भएकाले यसबाट बच्न आफू नै सर्तक हुनुपर्दछ’, उनले भने, ‘हामीले जनस्वास्थ्यका मापदण्ड लागू गर्यों भने सायद यसले व्यापक रुप लिँदैन।’

हात नियमित धुने, भीडभाड नभएका ठाउँमा जाने, मास्क राम्रोसँग लगाउने हो भने सङ्क्रमणबाट बच्न सकिन्छ। यस्तै ओमिक्रोन भेरियन्टबाट बच्नका लागि खोप बढीभन्दा बढी मानिसलाई लगाउनु पर्दछ। ओमिक्रोन सङ्क्रमण मानिसमा रुघा लागेर माथिल्लो श्वासप्रश्वास नलिमा इन्फेक्सन (असर) गर्दछ।

‘सङ्क्रमण नलीमा टाँसिएर रुघा बढी लगाउने गर्दछ। जबकी डेल्टा भाइरस सिधै फोक्सोमा असर गर्दथ्यो’, सङ्क्रामक रोग विशेषज्ञ डा. कोइरालाले भने, ‘ओमिक्रोनले पनि मानिसमा रुघा लाग्ने, जीउ दुख्ने, टाउको दुख्ने, ज्वरो आउने जस्ता लक्षण देखिन्छ र यसले फोक्सो सिधै सङ्क्रमण गरेर निमोनिया बनाउने कम गर्दछ। खोप लगाएका व्यक्तिलाई ओमिक्रोन भेरियन्टले त्यति गाह्रो नबनाउने उनको भनाइ छ0।

खोप नलगाएकामा १० गुणाबढी सङ्क्रमण

कोरोना भाइरसविरुद्धको खोप नलगाउने व्यक्तिमा लगाएकोभन्दा १० गुणाबढी सङ्क्रमण हुने सम्भावना रहेको अध्ययनले देखाएको उनले बताए। उनका अनुसार ओमिक्रोन भेरियन्टले खोप नलगाएकालाई अस्पतालमा भर्ना भएर गाह्रो बनाउने १७ गुणा र मृत्यु हुने सम्भावना पनि २० गुणा बढी हुने गर्दछ। उनले दुईवटा खोप लगाए संक्रमणलाई जित्न सकिने बताए।



Leave a Reply

Your email address will not be published. Required fields are marked *