कञ्चनपुरमा खोप लगाउने संख्या १ लाख ९७ हजार बढी

हेल्थपोस्ट नेपाल

काठमाडौं – कञ्चनपुरमा कोरोनाविरुद्धको पूर्ण खोपको मात्रा लगाउनेको संख्या १ लाख ९७ हजार २३३ पुगेको छ। स्वास्थ्य कार्यालयका कोल्डचेन अधिकृत जनक कुँवरका अनुसार कोभिसिल्ड र एस्ट्राजेनेकाको पूर्णमात्रा लगाउनेको संख्या ३४ हजार ३६२, भेरोसेलको पूर्णमात्रा लगाउनेको संख्या १ लाख ३२ हजार ३९ रहेको छ। जोन्सन एन्ड जोन्सन खोप लगाउनेको संख्या २७ हजार ४०० छ।

कोभिसिल्ड र एस्ट्राजेनेकाको पहिलो मात्रा ५१ हजार १०३ जनाले लगाएका छन्। यसैगरी, भेरोसेलको पहिलो मात्रा खोप १ लाख ८४ हजार ८९८ जनाले लगाएका छन्। १२ देखि १७ वर्ष उमेर समूहका विद्यार्थीलाई ६३ हजार ७३७ मोडेर्ना खोपको पहिलो मात्रा दिइएको छ।

खोपको पहिलो मात्रा लगाउनेको संख्या ८६ दशमलव ६० र दोस्रो मात्रा खोप लगाउनेको संख्या ६५ प्रतिशत छ। बिहीबार मात्रै १५ हजार २०० जनालाई कोरोनाविरुद्धको भेरोसेल खोप लगाइएको छ। ‘माघ महिनादेखि नियमित रुपमा अन्य खोप जस्तै कोरोनाविरुद्धको खोप लगाउने तयारी भइरहेको छ,’ अधिकृत कुँवरले भने, ‘बिदाको दिनबाहेक हप्ताको छवटै दिन पालिकामार्फत खोप लगाउनका लागि योजना बनाउँदैछौं।’ कोरोनाविरुद्धको खोप लगाउनबाट कोही नछुटून् भन्ने उद्देश्य लिएर कार्य अगाडि बढाइँदै आएको उनले बताए।

‘तत्कालै १ लाख भेरोसेल खोप लगाउनका लागि कार्य अगाडि बढाइसकिएको छ,’ उनले भने, ‘अपुग भएको खोप आवश्यकताअनुसार कैलालीको धनगढीस्थित आपूर्ति केन्द्रबाट ल्याउने व्यवस्था गरिएको छ।’

भारतबाट नेपाल भित्रिने नेपालीलाई सीमानाका गड्डाचौकीमै समेत कोरोनाविरुद्धको पहिलो मात्रा लगाउने व्यवस्था गरिएको छ। दोस्रो मात्रा सम्बन्धित पालिकामा गएर लगाउने व्यवस्था गरिएको छ।



Leave a Reply

Your email address will not be published.