गड्डाचौकी नाकाबाट बढ्यो ओमिक्रोन भित्रिने खतरा, दुई दिनमा १२ संक्रमित भेटिए

हेल्थपोस्ट नेपाल

काठमाडौं – कञ्चनपुर सीमा नाकामा ओमिक्रोनको संक्रमण न्यूनीकरणका लागि पहल थालिएको छ। कञ्चनपुरको पश्चिमी नाका गड्डाचौकीबाट दिल्ली ३५२ किलोमिटरको दूरीमा छ। जहाँ तीव्र रुपमा ओमिक्रोन संक्रमित देखिँदा सुदूरपश्चिम प्रदेश र स्वास्थ्य कार्यालयहरुले भारतबाट स्वदेश फर्किनेलाई एन्टिजेन टेष्टका साथै कोरोनाविरुद्धको खोप अभियान तीव्र रुपमा अघि बढाएका छन्।

भारतमा दिल्ली, कर्नाटक, गुजरातलगायतका सहरमा संक्रमण बढ्न थालेपछि काम छाडेर घर फर्किने नेपालीको संख्या पनि बढिरहेको छ। स्वास्थ्य कार्यालय कञ्चनपुरका प्रमुख शिवराज सुनारले ओमिक्रोनको उच्च जोखिममा कञ्चनपुर रहेको बताए। ‘दिल्लीमा संक्रमण बढिरहँदा अरुभन्दा हामी बढी जोखिममा छौं’, उनले भने, ‘त्यसैले भारतबाट आउनेको कोरोना परीक्षण र खोप लगाउने प्रबन्ध गड्डाचौकी नाकामै मिलाएका छौं।’

उनले कोरोना परीक्षणसँगै क्षयरोग र मलेरिया जाँचसमेत नाकामै हुने गरेको बताए। ‘सोमबार मात्रै नाकामा चारजना भारतबाट फर्किनेमा कोरोना देखियो’, उनले भने, ‘संक्रमितलाई महाकाली प्रादेशिक अस्पतालमा राखेर नमूना परीक्षण गर्न काठमाडौं पठाएका छौं।’ उनले एन्टिजेन विधिबाट कोरोना देखिएकाको नमूना संकलन गरेर ओमिक्रोनबारे पत्ता लगाउन काठमाडौं पठाइएको बताए।

‘ओमिक्रोन कोरोनाकै एउटा प्रजाती र नेपालमा आगामी माघ दोस्रो सातादेखि आउनसक्ने प्रक्षेपण पनि गरिएको छ’, उनले भने, ‘नाकामा थप प्रभावकारी ढङ्गले स्वास्थ्यपरीक्षण र होल्डिङ सेन्टरको प्रबन्धका लागि सरोकारवाला निकायसित समन्वय गरिरहेका छौं।’ उनले विगतको भन्दा थप सवल व्यवस्थापनका लागि स्वास्थ्यको टोली खटिसकेको जानकारी दिए। उनले खुल्ला सीमा नाकाका कारण संक्रमण नियन्त्रणमा समस्या रहेको बताए। ‘अवैध नाकाबाट भारतबाट मान्छे आउन नदिनु नै चुनौतीको विषय छ’, उनले भने, ‘गड्डाचौकी नाकाबाट आउनेमध्येमा कोरोना देखिएकै छ।’

स्वास्थ्य कार्यालयले जिल्लामै ओमिक्रोन परीक्षण गर्ने तयारी गरिरहेको उनले बताए। ‘पिसिआर ल्याबबाट ओमिक्रोन पत्ता लगाउन सकिन्छ’, उनले भने, ‘त्यसका लागि छुट्टै एन्टिजेन र केमिकल चाहिन्छ।’ त्यसैगरी सुदूरपश्चिम प्रदेश स्वास्थ्य निर्देशनालयका कोभिड–१९ सम्पर्क व्यक्ति हेमराज जोशीले ओमिक्रोन रोकथाम र नियन्त्रणका लागि कोरोनाविरुद्धको खोप अभियानलाई बढाउने तयारी गरिएको बताए।

‘यहाँका जिल्लामा ४५ देखि ६० प्रतिशतसम्म खोपमा प्रगति भएको छ’, जोशीले भने, ‘९० प्रतिशतसम्म खोप लगाउने लक्ष्यका साथ अघि बढ्दै छौं।’ उनले प्रदेशसित भेरोसेल, फाइजरलगायतका खोप मौज्दात रहेको बताए। ‘सिमानामा हेल्थ डेस्कमार्फत परीक्षणदेखि खोप अभियानसम्म निरन्तर नै छ’, उनले भने, ‘भारतमा संक्रमण देखिएका सहरहरुसित दूरीका हिसाबले हामी नजिक भएकाले उच्च सर्तकता अपनाउन आवश्यक छ।’

इलाका प्रहरी कार्यालय गड्डाचौकीका प्रमुख प्रहरी नायब निरीक्षक जीवन गुरुङले आज बिहान मात्रै भारतबाट स्वदेश फर्किन लागेका आठजनामा नाकामा परीक्षण गर्दा कोरोना संक्रमण देखिएको बताए। ‘अलि पहिलेसम्म सातामा एक-दुईजनामा यहाँ संक्रमण देखिन्थ्यो’, उनले भने, ‘तर हिजोआज संक्रमण दर बढ्न थालेको देखियो।’



Leave a Reply

Your email address will not be published. Required fields are marked *