सिकिस्त बिरामीको सङ्ख्या घट्दो, डेल्टा भेरियन्ट कमजोर भएकाे हो?

हेल्थपोस्ट नेपाल

कोभिडका गम्भीर बिरामीको सङ्ख्या कम हुँदै गए पनि नयाँ भेरिअन्ट वा अहिलेकै भेरिअन्ट थप सङ्क्रामक हुने जोखिम कायमै रहेकोले सावधानी अपनाउनुपर्ने स्वास्थ्य मन्त्रालयले जनाएको छ।

दोस्रो लहर उच्च बिन्दुमा पुगेका बेला जेठ ६ गते सघन उपचार कक्ष आईसीयूमा उपचार गर्ने मानिसको सङ्ख्या १,७४८ थियो भने त्यसको दुई दिनपछि भेन्टिलेटरमा ५२३ जना रहेका थिए।

मन्त्रालयको तथ्याङ्क अनुसार आइतवार आइसीयूमा ३२२ र भेन्टिलेटरमा ११३ कोभिड बिरामी रहेका छन्।

गम्भीर बिरामीको सङ्ख्या घटे पनि सावधानी अपनाउनुपर्ने अवस्था भने नटरेको मन्त्रालयका सह-प्रवक्ता डा. समीरकुमार अधिकारी बताउँछन्।
के जोखिम बाँकी छ?

डा. अधिकारी भन्छन्, “नयाँ भेरिअन्ट आइहाल्यो वा अहिलेकै भेरिअन्ट केही समयपछि अझ बढी सङ्क्रामक भइहाल्यो भने अहिलेजस्तै अवस्था रहन्छ भन्न सकिँदैन।”

“विदेशबाट पनि मानिसहरू आएका छन्। गाउँबाट सहर आउने, सहरबाट गाउँ जाने पनि भइरहेको छ। त्यस्तोमा कहीँ कतै एक/दुई जनाले मात्रै पनि बढी सङ्क्रामक किसिमको भाइरसबाट सङ्क्रमित भएको अवस्था भयो भने धेरै व्यक्तिहरू सङ्क्रमित भएर जटिलता हुनसक्ने ठूलो सम्भावना छ।”

तथ्याङ्क अनुसार नेपालमा आइतवार एन्टीजन/पीसीआर परीक्षण गरिएका १२,४०४ मध्ये ५९६ जना अर्थात ४.८ प्रतिशतमा सङ्क्रमण देखिएको छ।

अहिले देशभरि सक्रिय सङ्क्रमितको सङख्या १५ हजार रहेका छन्।

सङ्क्रमितको सङ्ख्या घटिरहेका बेला खोप लगाउने मानिसहरूको सङ्ख्या बढ्दो छ।

मन्त्रालयको तथ्याङ्क अनुसार एक मात्रा खोप लगाउनेको सङ्ख्या ७९ लाख ६२ हजारभन्दा बढी छ जुन लक्षित जनसङख्याको ३६.६ प्रतिशत हो।

त्यस्तै नेपालको कुल जनसङ्ख्याको २२ प्रतिशतले पूर्ण मात्रा खोप लगाएका छन्।

कसलाई जोखिम बढी?
चिकित्सकहरूका अनुसार खोप लगाउनेको सङख्या बढेको भए पनि प्रतिरोधी क्षमता विकास हुन नसकेका वृद्ध अवस्थाका मानिसहरू गम्भीर अवस्थामा उपचार गर्न आएका छन्।

तर युवावस्थाकै मानिसहरू पनि जोखिममा रहेको शुक्रराज ट्रपिकलतथा सरुवा रोग अस्पतालका प्रमुख कन्सल्टेन्ट डा. अनुप बाँस्तोला बताउँछन्।

बाँस्तोलाले भने, “रोग प्रतिरोधी क्षमता नबनेका वा पहिला सङ्क्रमित नभएका मानिसहरू अझै पनि जोखिममा छन्।”



Leave a Reply

Your email address will not be published. Required fields are marked *