कोरोनाको जोखिम उच्च छ, विद्यालय खोल्न हतार नगरौं

हेल्थपोस्ट नेपाल

कोरोना जोखिमको विश्लेषणका आधारमा काठमाडौँ र अन्य जिल्लाका स्थानीय तहमा आगामी असोज १ गतेदेखि विद्यालय सञ्चालन गर्न सकिने गरी तयारी गरिएको छ। काठमाडौँका प्रमुख जिल्ला अधिकारीले राखेको मंगलबार बैठकमा स्वास्थ्य जोखिमको स्थिति विश्लेषण गरी जिल्ला संकट व्यवस्थापन केन्द्रसँगको समन्वयमा कुन समूह वा सिफ्टमा विद्यालय खोल्ने भन्ने एकरूप कार्ययोजना पेश गर्न आग्रह गर्ने निर्णय भएको थियो।

विद्यालय खोल्न सकिने स्थानका शिक्षक र कर्मचारीले कोभिडविरुद्धको खोप लगाएको हुनुपर्नेलगायतका आधार बनाइएको छ। सहायक प्रमुख जिल्ला अधिकारी कल्पना घिमिरे नेपालले स्मार्ट लकडाउन अन्तर्गत विद्यालयलगायतका क्षेत्र खोल्न सकिने निर्णय यसअघि भइसकेकामा सम्बन्धित पालिकाले त्यसको ढाँचाबारे आवश्यक परामर्श गरी कार्ययोजना पेश गर्न भनिएको जानकारी दिए। उनले जोखिम भएका स्थानमा अनिवार्यरूपमा विद्यालय खोल्नुपर्ने भन्ने नरहेको स्पष्ट गरे।

हतार नगर्न अभिभावकको आग्रह

राष्ट्रिय अभिभावक महासंघले भने जोखिम कायमै रहेकाले विद्यालय खोल्न हतारो नगर्न आग्रह गरेको छ। महासंघका अध्यक्ष सुप्रभात भण्डारीले शहरी क्षेत्रमा जोखिम कायम रहेको, महत्वपूर्ण चाडपर्व आउन लागेको, सबैले खोप नलगाएको र बालबालिका प्रभावित हुने गरी तेस्रो लहर आउन सक्ने भएकाले तत्काल विद्यालय खोल्न नहुने सुझाव सरोकार भएकाहरुको बैठकमा दिइएको बताए। भौतिकरूपमा विद्यालय बन्द हुँदा हाल सञ्चार तथा सूचना प्रविधिको सहयोगमा वैकल्पिक माध्यमबाट सिकाइ निरन्तरता दिइएको छ।

कोरोना जोखिम उच्च

नेपालमा अहिले दैनिक थपिने कोभिड १९ संक्रमितको संख्या २ हजारको हाराहारीमा छ । पछिल्लो विवरण अनुसार देशभर सक्रिय संक्रमितको संख्या ३० हजार ३०३ छ। जसमध्ये काठमाडौं उपत्यकामा मात्रै ७ हजार ३१० सक्रिय संक्रमित छन्।

स्वास्थ्य मन्त्रालयका अनुसार परीक्षण गरेकामध्ये पछिल्लो साता संक्रमण पुष्टि हुने टेष्ट पोजेटिभिटी दर १५.५ प्रतिशत छ । तर, स्वास्थ्य संगठनको मापदण्ड अनुसार टेष्ट पोजेटिभिटी दर ५ प्रतिशतभन्दा कममा झरेपछि मात्रै संक्रमण नियन्त्रण भएको मानिन्छ।



Leave a Reply

Your email address will not be published. Required fields are marked *