भरतपुर अस्पतालसँग जमिन छ , पार्किङ छैन

हेल्थपोस्ट नेपाल

कार्यालय समय अगाबै भरतपुर अस्पताल अगाडिका सडक पार गर्न मुस्किल पर्दछ। सडकका दायाँबायाँ सवारीसाधनले भरिएका हुन्छन्। बिरामीलाई मात्र होइन, सर्वसाधारणलाई सडक पार गर्न कठिन हुन्छ। ट्राफिक प्रहरीलाई दैनिक बिहानी समयमा सवारीका सधानलाई व्यवस्थित गर्न हम्मेहम्मे पर्छ। अस्पताल नजिकै बाइपास सडक पर्दछ। सडकमा भीडभाड बढी हुने भएपछि त्यति बेलाका समयमा सकेसम्म मानिसले वैकल्पिक सडक प्रयोग गर्ने गर्दछन् ।

अस्पतालसँग ३१ बिघा जमिन छ । अस्पताल विकास समितिका अध्यक्ष डा भोजराज अधिकारीका अनुसार अन्य संघ संस्थालाई भाडामा लगाएर पनि अस्पतालसँग १२ बिघा जमिन छ। अस्पतालको आबास क्षेको पूर्व तर्फ भूभाग धानबारी र झाडीले भरिएको छ। अस्पताल प्रशासनले चासो नदिएकै कारण पार्किङ नभएको हो।

अध्यक्ष डा. अधिकारीका भनाइमा चिकित्सक, कर्मचारीका लागि प्रशासन अगाडि र दुई नम्बर गेटमा सवारी पार्किङ छ। साँघुरो र थोरै सवारी अट्ने भएकाले त्यहाँ पार्किङ खासै गरिएको पाइँदैन। सर्वसाधारणका लागि पार्किङ नभएको स्वीकार गर्दै उनले सडक छेउको नहर पुरेको ठाउँमा केही व्यवस्थित गर्न बताए।

अस्पतालका चिकित्सक, कर्मचारीको मात्र एक सय भन्दा बढी चारपाग्रें सवारी रहेका बताइएको छ। अस्पतालमा ७५० कर्मचारी कार्यरत छन्। अस्पतालले दैनिक एक हजार ९०० जनासम्म बिरामीलाई सेवा प्रदान गर्ने जनाइएको छ। अस्पतालमा चिकित्सक र कर्मचारी सरहनै सवारीसाधन आउने गर्दछन्। अस्पतालमा एम्बुलेन्स आवतजावत गर्ने गर्दछ। ती सवारीका लागि पार्किकको व्यवस्था पूर्ण हुन नसकेको स्वीकार गर्दै अध्यक्ष डा अधिकारीले यस विषयमा छलफलमानै रहेको बताए।

जिल्ला ट्राफिक प्रहरी कार्यालय चितवनका निमित्त प्रमुख प्रहरी नायब निरीक्षक ज्ञानबहादुर बराकोटी अस्पताल अगाडिको पार्किङ व्यवस्थापन समस्या हुने गरेको बताए।

‘कहिलेकाहीँ त व्यवस्थापन गर्ननै मुस्किल पर्दछ,’ उनले भने।

प्रमुख जिल्ला अधिकारी प्रेमलाल लामिछानेले सो बाटो प्रयोग गरेर जाँदा आफूले पनि अव्यवस्थित पार्किङ देखेर ट्राफिक प्रहरीलाई भनेको जानकारी दिए। अस्पतालले ठाउँ व्यवस्थापन गरेर आफ्ना चिकित्सक, कर्मचारी र सेवाग्राहीलाई पार्किङ व्यवस्थापन गर्नुपर्ने उनको भनाई छ।



Leave a Reply

Your email address will not be published. Required fields are marked *