भक्तपुर अस्पतालको बेथेति सुधारमा लाग्दा डा. सुमित्रालाई सरूवाको धम्की

हेल्थपोस्ट नेपाल

बिरामी सिफारिस केन्द्रका रूपमा परिचित भक्तपुर अस्पताललाई सुधार गर्दै सबै सेवा सञ्चालन गरिएकामा केही निजी क्लिनिक सञ्चालक तथा अस्पतालका बिचौलियाले मेडिकल सुपरिटेण्डन्ट डा. सुमित्रा गौतम, अन्य चिकित्सक र कर्मचारीलाई सरुवा गर्ने धम्की दिन थालेका छन्।

बिरामीको उपचार, ल्याब परीक्षण र औषधि खरिद गर्न निजी अस्पताल, क्लिनिक तथा औषधि पसलमा पठाइने गरेकामा केही चिकित्सक एवं कर्मचारीलाई कारबाही गरिएकाले बिचौलियासहित गिरोहले उनीहरूलाई नै सरुवा गर्न शक्तिकेन्द्र धाउन थालेका हुन्।

‘म आएदेखि यहाँको बेतिथि सुधार्न लागेको लाग्यै छु, यस्तो कोभिडको जोखिममा आफैँ बिरामी हुँदासमेत यहाँका चिकित्सक र कर्मचारी अहोरात्र खटिएका छन्, यति हुँदाहुँदै पनि केही चिकित्सक र कर्मचारीले आउने बिरामीलाई सिधै बाहिर पठाउने गरेको पुष्टि भएकाले कारबाही गरिएको हो,’ उनले भनिन्।

प्याम्परदेखि कोभिडका बिरामीसमेतलाई बाहिर पठाइएको रेकर्ड आएकाले त्यस्ता चिकित्सकलाई सरुवा गरिएकोे, केहीलाई स्पष्टीकरण सोधेर सचेत गराइएको उनले बताइन्।

अस्पतालमै हुने उपचारसमेत यहाँ हुँदैन भन्दै निजी अस्पताल तथा क्लिनिकमा पठाउने गरेको, आफ्नै अस्पतालमा भएका सबै ल्याब परीक्षण यहाँ हुँदैन भनेर बाहिरका प्याथोलोजीमा पठाउने गरेको र अस्पतालको आफ्नै फार्मेसीमा १० प्रतिशत छुटमा पाइने औषधिसमेत बाहिर किन्न पठाउने गरेको प्रमाणित भएपछि कारबाही गरिएको अस्पताल प्रशासनले जनाएको छ।

‘अस्पतालको फार्मेसीमा औषधिमा १० प्रतिशत र शल्यक्रियाका सामानमा ३० देखि ३५ प्रतिशतसम्म छुट दिने गरिएकोे छ । कुनै पनि ल्याब परीक्षणका लागि बाहिर जानै पर्दैन, अस्पतालमै छ, यहाँ नभए सँगैको मानव अगं र भक्तपुर क्यान्सर अस्पतालको ल्याबमा पठाउने व्यवस्था गरेका छौँ, यति हुँदाहुँदै पनि बिरामीलाई कमिशनका लागि बाहिर पठाउने काम भित्रैबाट भएको पाइएपछि कारबाही गरेका हौँ, यसले इमान्दार चिकित्सक र कर्मचारीको मनोबल बढाएको छ,’ उनले भनिन्।

अस्पतालकै एक कर्मचारीलाई चिकित्सकले यही ल्याब सेवा हुँदाहुँदै परीक्षणका लागि सान प्याथालोजीमा पठाएको र अस्पतालको भन्दा तीन गुणा महंगो शुल्क लिएकाले प्रतिवाद गर्दा त्यहाँका सञ्चालकले चिकित्सकलाई नै कमिशन दिनुपर्ने बताएपछि यो रहस्य बाहिर आएको ती कर्मचारीले बताए।

उपचारका लागि आएका कोभिडका बिरामीलाई समेत बिचौलियाले छाडेनन्। उपचाररत बिरामीका आफन्त सन्तोष श्रेष्ठले भने ‘बुबा कोभिड भएर ल्याउनेबित्तिकै भर्ना नगरी बिभिन्न परीक्षण गर्न अस्पताल अगाडिको प्याथालोजीमा पठाए, त्यहाँ महंगो रहेछ, अर्को दिन अस्पतालमै भर्ना भएपछि पो अर्का चिकित्सकले सबै यही परीक्षण हुन्छ भनेपछि हामी छक्क पर्‍यौं।’

बेथिति हटाउँदै सेवामा सुधार आएपछि अस्पताल सुदृढीकरण मूल्याङकन ३८ बाट बढेर यस वर्ष ८२ मा पुग्नाका साथै बागमती प्रदेशकै उत्कृष्ट अस्पताल बनेर पुरस्कार पाएको अस्पताललाई अब फेरि बदनाम हुनबाट जोगाउन र व्यवस्थितरूपले सेवा दिन अस्पताल अहोरात्र लागेको अस्पताल व्यवस्थापन समितिका अध्यक्ष मिलन सुवालले जानकारी दिए।

अस्पतालको फोर्मेसीमा कार्यरत एक कर्मचारीले आफ्नै अगाडि बाहिरका औषधि पसलमा पठाएपछि त्यसो नगर्न भन्दा गाली खानुपरेको सुनाए।

‘अस्पतालको फार्मेसीमा रू ५० मा पाइने थर्र्मामिटर बाहिर रू २५० सम्म पर्छ, यहाँ रू ३०को युरिन व्याग बाहिर रू १०० लिन्छन्, टाँका लगाउने सूचर रू ३५० देखि ४५० सम्म पर्नेमा बाहिर रू एक हजार १०० सम्म लिने गरेका छन्, यति सम्मकी रू एक हजार १०० पर्ने शव परीक्षणका लागि आवश्यक सामानको प्याक बाहिर रू दुई हजार ७०० देखि तीन हजार ७०० सम्म लिने गरेका छन्, हामीले यहीँ पाइन्छ, बाहिर नपठाउनुस भन्दा हामीलाई नै थर्काउथे,’ ती कर्मचारीले भने।

विगतमा कमिशन बढी आउने र नचल्ने औषधिको बोलपत्र बढी गरेर औषधि नै खेर फाल्ने, औषधि सप्लायर्सले ल्याएको भन्दा बढी बिल बनाएर भुक्तानी लाने गरेकोजस्ता बेथितिलाई अस्पतालले तोडेको छ। औषधि बोलपत्रमा न्यूनतम मूल्य निर्धारण गर्दै त्यहीँ मूल्यमा वर्षदिनसम्म औषधि ल्याउनुपर्ने गरी कडाइ गरिएकाले सप्लायर्सहरूले मेसु डा गौतम आएको छ महिनामै सरुवा गर्न खोजेकामा नसकेको व्यवस्थान समितिको भनाइ छ ।

औषधि सप्लायर्स, केही निजी अस्पतालका सञ्चालक, अस्पताल बाहिरका केही औषधि व्यवसायी र ल्याब सञ्चालकले उनको सरुवा गर्न धम्की दिँदै शक्तिकेन्द्र धाउन थालेका हुन्। सरुवा गराउने अभियानमा लागेका टोली भक्तपुर जिल्ला समन्वय समितिका प्रमुख नवराज गेलालदेखि प्रमुख जिल्ला अधिकारी प्रेम भट्टराइसम्मलाई गुनासो गर्न पुगेका थिए ।

जिसस प्रमुख गेलालले भने ,‘अस्पतालले बिरामीलाई सबै सेवा भित्रबाटै दिन थालेको र बिरामी बाहिर पठाउने चिकित्सकलाई समेत कारबाही गरिएकाले हाम्रो व्यवसायमा समस्या पर्‍याें भन्दै केही व्यक्ति मेसु डा. गौतमको सरुवा गर्न आएका थिए तर मैले अस्पताल अहिले एकदम राम्रो भएको छ, यस्ता गलत कुरा लिएर नआउनुस् भनेर पठाइदिए।’

मेसु डा. गौतमले औषधि सप्लायर्सदेखि केही व्यक्तिले फोनबाट केन्द्रदेखि प्रदेश सरकारसम्म पुगेर अब सरुवा गराइछाड्छौँ भनेर धम्की दिएको बताए।



Leave a Reply

Your email address will not be published. Required fields are marked *