हेल्थपोस्ट नेपाल 
स्वास्थ्य तथा जनसंख्या मन्त्रालयले आगामी ५ महिनामा १ लाख ९३ हजार कोरोना संक्रमित थपिने प्रक्षेपण गरेको छ। बिहीबार प्रतिनिधिसभाको स्वास्थ्य तथा शिक्षा समितिमा स्वास्थ्य मन्त्रालयअन्तर्गतको नीति, योजना तथा अनुगमन महाशाखाका प्रमुख डा. गुणराज लोहनीले प्रस्तुत गरेको तथ्याङ्कमा सो संख्यामा संक्रमित थपिने उल्लेख छ।
मन्त्रालयको प्रक्षेपणअनुसार मंसिरसम्ममा १ लाख ९३ हजार ८ सय ५६ संक्रमित थपिने सम्भावना छ। जसमध्ये ३८ हजार ७ सय ७१ जनालाई उपचार सेवा आवश्यक पर्ने र ९ हजार ६ सय ९३ जनालाई सघन उपचार आवश्यकता पर्न सक्ने बताइएको छ।
साउनमा ५३ हजार ३ सय ७, भदौमा ४५ हजार ७ सय २६, असोजमा ३८ हजार ५ सय ९७, कात्तिकमा ३१ हजार ४४ र मसिंरमा २५ हजार १ सय ८३ संक्रमित थपिने मन्त्रालयले जनाएको छ।
