कोरोना संक्रमणमा कमी आएपछि अस्पतालमा घट्दै बिरामी

कोभिड–१९ को संक्रमण दरमा केही कमी आएको भन्दै काठमाडौं महानगरपालिकाले तत्काल अक्सिजनसहितको उपचार कक्ष थप सञ्चालन नगर्ने जनाएको छ।

अहिले स्वास्थ्य उपकरणसहित सञ्चालनमा आएका अस्पतालहरुमा पनि २० प्रतिशत मात्र कोरोनाका बिरामी रहेकाले महानगरले तत्काल थप उपचार कक्षको आवश्कता नरहेको जनाएको हो।

दोस्रो लहरको कोरोना संक्रमण बढ्दै गएपछि यसअघि महानगरले १२ वटा अस्पतालसँग सम्झौता गरी आवश्यक पर्ने स्वास्थ्य उपकरण र उपकरण खरिदका लागि आर्थिक सहयोग गरेको थियो। महानगरका प्रवक्ता ईश्वरमान डङ्गोलका अनुसार अहिले सञ्चालनमा आएका अस्पतालमा पनि बिरामीको संख्या कम रहेकाले तत्कालका लागि थप सञ्चालनको योजना नरहेको हो।

‘बिरामीको संख्या बढे त्यसमा पुनः विचार गरिन्छ’, उनले भने , ‘महानगरकाको आर्थिक सहयोगमा सामाखुशीस्थित राधास्वामी सत्सङ्ग भवनमा नेपाली सेनाको व्यवस्थापनमा ८८ अक्सिजनसहित १७४ शय्याको कोभिड–१९ आइसोलेसन केन्द्र सञ्चालनमा ल्याए पनि हाल उक्त स्थानमा १६ वटा शय्या मात्र सञ्चालनमा आएको छ।’ उनका अनुसार धेरै संक्रमित घरमै आइसोलेसनमा छन्, केही मात्रै अस्पताल गएकाले पनि निर्माण भएको अक्सिजनसहितका अस्पतालहरुमा शय्याअनुसार बिरामी नभएका हुन्।

त्यस्तै महानगरकाकै सहयोगमा सञ्चालित छत्रपाटी निःशुल्क चिकित्सालय र नरदेवी आयुर्वेदिक अस्पताल पनि जम्मा संख्याको २० प्रतिशत मात्रै कोरोनाका बिरामीले उपचार गराइरहेका छन्।

हालसम्म महानगरमा ६१ हजार ९२४ कोरोना संक्रमित भेटिएकामा ५० हजार ६८९ जना निको भएका छन् भने १० हजार १२५ होम आइसोलेसन र १७० संस्थागत आइसोलेसनमा रहेका छन्। त्यस्तै हाल १० हजार ८१६ सक्रिय संक्रमितमध्ये ५२१ ले अस्पतामा उपचार गराइरहेका छन्। कोरोनाका कारण ४१९ जनाले ज्यान गुमाएको तथ्यांकमा उल्लेख छ।

कोरीनाका बिरामीलई उपचारमा सहज होस् भन्ने हेतुले नागरिक हट लाइन ११८० बाट २४ सै घण्टा सेवा दिने व्यवस्था मिलाइएको छ। बिरामीलाई अस्पतालमा पुग्न सहज होस् भनी फोन नं १०२ मार्फत १० वटा र नन् कोभिड बिरामीका लागि १० वटा गरी कूल २० वटा निःशुल्क एम्बुलेन्स सेवा महानगरले सञ्चालनमा ल्याएको छ। यी माध्यमबाट हालसम्म २२ हजार कोरोना संक्रमित बिरामी र १२ हजार अन्य बिरामीले सेवा लिएका छन्।

संक्रमण दरमा आयो कमी

महानगरमा संक्रमण दरमा केही कमी आएको छ। अघिल्लो हप्ता महानगरले परीक्षण गरिएकामध्ये ७० प्रतिशतमा संक्रमण पुष्टि हुने गरेको थियो। अहिले ४५ प्रतिशतमा आएको छ।

अघिल्ला हप्ताहरुमा अत्यधिकरूपमा कोरोना संक्रमित बढेपछि महानगरले स्वाब संकलनका लागि पाँचवटा केन्द्र बढाएर हरेक दिन १६ वटा स्थल तोकेर परीक्षणलाई तीव्र बनाएको थियो। महानगरपालिकाको जनस्वास्थ्य महाशाखाका ल्याब टेक्निसियन राधिका कुँइकेलका अनुसार परीक्षणका लागि आवश्यकतानुरूप टोली तयारी अवस्थामा रहेको छ। ‘कोरोनाको शंका देखिएका र वडाले खटाएअनुसार अहिले परीक्षणको व्यापक बनाइएको छ, जसले गर्दा अघिल्लो हप्ताको तुलनामा कमी आएको छ’, उनले भने।

१२ अस्पतालसँग सम्झौता

संक्रमणविरुद्ध लड्नका लागि महानगरले आफ्नो क्षेत्रभित्र रहेका अस्पतालले माग गरेअनुरूप क्षमता बढाउन आवश्यक पर्ने उपकरण तथा व्यवस्थापनमा सहयोग गर्नका लागि अस्पतालसँग सम्झौता गरेको छ। अस्पतालको व्यवस्थापन तथा उपचार प्रणालीको सुधार तथा क्षमता वृद्धि गरेर संक्रमणमा परेका बिरामीलाई बचाउन महानगरले आफ्नो क्षेत्रभित्र भएका १२ सरकारी तथा सामुदायिक अस्पताललाई अनुदान रकम दिन सम्झौता गरिसकेको छ।

महानगरले यसरी सम्झौता गरेका अस्पतालमा वीरेन्द्र सैनिक अस्पताल, चिकित्सा विज्ञान राष्ट्रिय प्रतिष्ठान वीर अस्पताल, छत्रपाटी निःशुल्क चिकित्सालय, निजामती कर्मचारी अस्पताल, महेन्द्रनारायण निधि मेमोरियल अस्पताल, हेल्पिङ ह्याण्ड्स सामुदायिक अस्पताल, शहीद गङ्गालाल राष्ट्रिय हृदयरोग केन्द्र, शुक्रराज ट्रपिकल तथा सरुवा रोग अस्पताल, मोडल अस्पताल र नेपाल–कोरियामैत्री अस्पताल रहेका छन्।

यसअघि महानगरपालिकाले गत वैशाख २४ गते सम्झौता गरेर त्रिभुवन विश्वविद्यालय शिक्षण अस्पताललाई १० थान भेन्टिलेटर उपलब्ध गराइसकेको छ। त्यस्तै वैशाख २७ गते नरदेवी आयुर्वेदिक अस्पतालसँग अक्सिजनसहितको उपकरण जडान गर्न सम्झौता गरेको थियो।

महानगरले यही जेठ १४ गतेदेखि एन्टिजेन विधिबाट बृहतरुपमा परीक्षण गरिरहेको छ। यस विधिबाट महानगरले ५० हजारलाई परीक्षणको दायरामा ल्याउने जनाएको छ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय