कोरोना संक्रमणलाई मध्यनजर गर्दै सर्वोच्च अदालतले अक्सिजन तथा कोरोनाको औषधिको सहज आपूर्ति तथा जनशक्तिको व्यवस्थापन गर्न स्वास्थ्य तथा जनसंख्या मन्त्रालयलाई अन्तरिम आदेश जारी गरेको छ।

अधिवक्ता शैलेन्द्रप्रसाद अम्वेडकर र अधिवक्ता मोहना अंसारीले दायर गरेको रिटको सुनुवाइ गर्दै न्यायाधीश बमकुमार श्रेष्ठको एकल इजलासले यो आदेश दिएको हो।

अदालतले आवश्यक औषधि र अक्सिजनको आपूर्तिको समस्या, बिरामीसँग प्रत्यक्ष सरोकार राख्ने अस्पतालमा नभई नहुने अत्यावश्यक जनशक्तिको समस्या र संक्रमितहरुले उपचारबाट विमुख हुन नपरोस् भनी राखिएको मागलाई सम्बोधन गर्दै उक्त आदेश दिइएको हो।

अस्पतालहरु सञ्चालनमा ल्याउन आवश्यक पहल गर्न र सहज रुपमा अक्सिजन, औषधिको आपूर्ति गराउन सरोकारवालाको प्रतिनिधित्व समेत हुनेगरी एउटा कार्य समितिसमेत निर्माण गरी कार्य अगाडि बढाउन निर्देशन दिइएको छ।