यौन तथा प्रजनन स्वास्थ्यका समस्या अझै बाहिर आउँदैनन्

हेल्थपाेस्ट/चितवन
प्रकाशित
२०७७ कार्तिक २८ गते १७:२३

नेपाली मिडियामा यौन तथा प्रजनन् स्वास्थ्य सम्वन्धी सामग्री कम प्राथमिकतामा पर्ने एक अध्ययनले देखाएको छ।

मिडिया एक्सन नेपालले गरेको १० वटा मिडियाको अध्ययनमा ० दशमलव ५८ प्रतिशतमात्र यस्ता समाचार प्राथमिकतामा परेका छन्। मिडिया एक्सनले राजधानीबाट प्रकाशित हुने तीन वटा मिडिया र प्रदेश प्रदेशबाट एक एक वटा मिडियाको अध्ययन गरेको हो।

साउन, भदौ र असोज महिनाका २५ देखि २९ गते प्रकाशित समाचार सामग्रीको अध्ययनमा नेपाल छापा सञ्चार माध्यमले यौन र प्रजनन् स्वास्थ्य अधिकारबारे कम सामग्री प्रकाशित गर्ने गरेको मिडिया एक्सन नेपालको अध्ययनले देखाएको हो।

सो अवधिमा मिडिया एक्सनले ४ हजार ७ सय ९८ वटा समाचारको अध्ययन गरेको छ। जसमा २८ वटा मात्र समाचार यौन र प्रजनन् स्वास्थ्य अधिकार बारे रहेको छन्।
मिडिया एक्सन नेपालका अध्यक्ष लक्ष्मण दत्त पन्तका अनुसार काठमाण्डौँबाट कान्तिपुर, गोरखापत्र र नयाँ पत्रिकाको अध्ययन गरिएको हो।

अध्ययनमा सरकारी सञ्चार माध्यम गोरखापत्र दैनीकमा न्यून मात्रामा यौन तथा प्रजनन् स्वास्थ्य सम्वन्धी सामग्री प्रकाशन भएका छन्। साउन, भदौ र असोज महिनाका २५ देखि २९ गते प्रकाशित सामग्रीमा गोरखापत्ररले ० दशमलव १९ प्रतिशत मात्र यौन तथा प्रजनन् स्वास्थ्य सम्बन्धी समाचार सामग्री प्रकाशन गरेको छ। सो अवधिमा गोरखापत्र दैनिकको १ हजार ४९ वटा समाचार तथा सामग्री अध्ययन गर्दा जम्मा २ वटा मात्र समाचार प्रकाशन भएका छन्।

त्यस्तै, कान्तिपुर दैनीकले ० दशमलव ५१, नयाँ पत्रिकाले ० दशमलव ९१ प्रतिशत मात्र यौन स्वास्थ्य सम्बन्धी समाचार प्रकाशन भएको अध्यक्ष पन्तले बताए। सो अवधिमा कान्तिपुर दैनिकका ५ सय ८७ र नयाँ पत्रिकाका ३ सय ३१ वटा समाचार सामग्री प्रकाशन हुँदा समान ३ वटा समाचार यौन तथा स्वास्थ्य सम्बन्धी रहेका छन् ।

कर्णाली प्रदेशको युव आह्वान दैनिकले सबैभन्दा धेरै यौन तथा प्रजनन् स्वास्थ्य सम्बन्धी समाचार प्रकाशित गरेको छ । उसले १ दशमलव ५२ प्रतिशत समाचार प्रकाशन गरेको उल्लेख गरिएको छ । बाग्मती प्रदेशको थाहा सन्देशले कुनै पनि यस्ता समाचार प्रकाशन गरेको छैन । १ सय २५ वटा समाग्री अध्ययन गर्दा कुनै पनि समाग्री प्रकाशन नभएको पन्तले बताए।

यसको २ सय ६२ समाचार मध्ये ३ वटा समाचार यौन तथा प्रजनन् सम्बन्धित छन् । प्रदेश २ बाट प्रकाशित हुने जनकपुर टुडे दैनिक ० दशमलव ७४, लुम्बिनी प्रदेशको दैनिकपत्रले ० दशमलव १३, प्रदेश १ बाट प्रकाशित हुने ब्लाष्ट दैनीकले १ दशमलव २५ प्रतिशत, सुदुर पश्चिमको पश्चिम टुडे दैनिकले ० दशमलव ९९ प्रतिशत यौन तथा स्वास्थ्य सम्बन्धी समाचार प्रकाशन गरेको छ।

जीवनको अत्यन्तै महत्वपुर्ण स्वास्थ्य अधिकार, जनस्वास्थ्य माथिको पहुँच र अधिकारको प्रयोग गर्ने विधि जस्ता विषय नेपाली मिडियाको प्राथमिकतामा पर्ने पन्तले बताए ।

‘नेपाली मिडियाको मुलः प्रवृति राजनीतिक विषय केन्द्रित भएका छन्,’ पन्तले भने, ‘अझै यौन र प्रजनन स्वास्थ्यलाई नेपाली मिडियाले खासै चासो समेत राख्ने गरेको पाइदैन।’ जनस्वास्थ्य अधिकारको महत्वपुर्ण सवाल यौन तथा प्रजनन् स्वास्थ्यलाई प्राथमिकता दिएर अध्ययन गरिएको छ ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय