तिलोत्तमामा सहरी स्वास्थ्य संस्थाको भवन उद्घाटन

कृष्ण मल्ल/बुटवल
प्रकाशित
२०७७ भदौ २६ गते १५:१५

रूपन्देहीको तिलोत्तमा नगरपालिकामा शहरी स्वास्थ्य केन्द्र भलवारीको भवनको उद्घाटन गरिएको छ। सहरी स्वास्थ्य केन्द्र भलबारीको भवन वडा नं. ७ को दल्कामा बनेको हो।

हरेक वडामा कम्तिमा एउटा सरकारी स्वास्थ्य संस्था पुर्याउने नीतिअनुसार तिलोत्तमामा स्वास्थ्य चौकी नभएका वडाहरुमा सहरी स्वास्थ्य केन्द्र निर्माणको काम भैरहेको छ । हालसम्म तिलोत्तमाका दश वटा वडामा सरकारी स्वास्थ्य केन्द्र सञ्चालनमा छन्।

त्यसैगरी शुक्रबार नै करहिया स्वास्थ्य चौकी भवन शिलन्यास गरिएको छ। जग्गाको स्वामित्व नहुँदा करहिया स्वास्थ्य चौकीको लामो समयदेखि आफ्नै भवन निर्माण हुन सकेको थिएन।

ज्योतिनगरमा झण्डै ६ कठ्ठा जमिनको स्वामित्व चौकीको नाममा आएपछि आफ्नैं सुविधासम्पन्न भवन निर्माण थालिएको हो। चालु आर्थिक वर्षभित्र भवनको निर्माण कार्य सकिने नगरपालिकाले जनाएको छ।

भवन उद्घाटन तथा शिलन्यास कार्यक्रममा तिलोत्तमा नगर प्रमुख बासुदेव घिमिरेले आफ्नै भवनबाट प्रवाह गरिने स्वास्थ्य सेवा प्रभावकारी हुने विश्वास व्यक्त गरे।

पछिल्लो समय तिलोत्तमाका सरकारी स्वास्थ्य संस्थामा धेरै परिवर्तन आएको बताउँदै उहाँले सरकारी स्वास्थ्य संस्थाबाट पनि गुणस्तरीय सेवा पाइन्छ भन्नेमा विश्वस्त रहन नगरबासीलाई आग्रह गरे।

नगर उप–प्रमुख जगेश्वरदेवी चौधरी, प्रमुख प्रशासकीय अधिकृत माधवप्रसाद शर्मा, जिल्ला स्वास्थ्य कार्यालयका क्षय-कुष्ट निरीक्षक टिकाराम अधिकारी, स्वास्थ्य केन्द्र व्यवस्थापन समितिका उपाध्यक्ष राजेन्द्र प्रसाद सुवेदी, स्वास्थ्य केन्द्र ईञ्चार्ज शिशिर पाण्डेलगायतले बोलेका थिए।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय