१० जनामा कोरोना संक्रमण देखिएपछि झापाको कचनकवल सिल, ६५ को स्वाब विराटनगर पठाइयाे

सोमबार र मंगलबार गरिएको परीक्षण १० जनाको रिपोर्ट पोजेटिभ आएपछि झापाको दक्षिणी सीमावर्ती कचनकवल गाउँपालिका पूरै सिल गरिएको छ।

कोरोना नियन्त्रण तथा जिल्ला सुरक्षा समिति झापाको आपतकालीन बैठकले गाउँपालिका सिल गर्ने निर्णय गरेको झापाका प्रमुख जिल्ला अधिकारी उदयबहादुर रानाले बताए। कम्तीमा ५ दिनका लागि गाउँपालिका सिल गरिएको हो।

संक्रमित ९ जनालाई रेडक्रसको एम्बुलेन्समा कोरोना अस्पताल विराटनगर पठाइएको छ। थप ६५ जनाको पिसिआर परीक्षण गर्न स्वाब विराटनगर लगिएको हाे।

थप क्वारेन्टाइनका रूपमा महेन्द्ररत्न मावि केचना, जानकी आधारभूत विद्यालय पाठामारी र लक्ष्मी मावि बनियानीलाई तयार गर्ने निर्णय भएको छ। पथरिया माविको क्वारेन्टाइनको क्षमता पनि बढाइने भएको छ।

भारतबाट आएका नेपाली नागरिकमा कोरोना भाइरसको संक्रमण धमाधम देखा पर्न थालेपछि गाउँपालिका सिल गरिएको कचनकवलका अध्यक्ष अञ्जार आलमले जानकारी दिए।

गाउँपालिकाभित्र सात वडा छन्। त्यसमध्ये ५ वडाको सीमा भारतसँग जोडिएको छ। ‘गाउँपालिकाको १, २, ३, ४ र ५ नम्बर वडा भारतसँग जोडिएका छन्,’ अध्यक्ष आलमले भने, ‘ भारतसँग सीमा जोडिएका स्थानबाट लुकिछिपी नेपाली नागरिक भित्रिन सक्ने भएकाले सिल गरिएको हो।’

झापाका प्रमुख जिल्ला अधिकारी, सांसद, जनप्रतिनिधि, राजनीतिक दलसँग छलफल गरेर यस्तो निर्णय गरिएको आलमको भनाइ छ।

प्रदेश सांसद वसन्त बानियाँले कचनकवलवासीलाई सुरक्षित गर्न गाउँपालिका सिल गर्नुपरेको बताए। ‘भारतबाट आउनेलाई राख्न थप क्वारेन्टाइन बनाउने बारेमा गाउँपालिकासँग समन्वय गरिरहेका छौ‌ँ,’ उनले भने।

शनिबार भारतको मुम्बई र दिल्लीबाट आएका ३३ जना नेपालीलाई पथरिया माविमा बनाइएको क्वारेन्टाइनमा राखिएको थियो। उनीहरू सबैको स्वाब पिसिआर परीक्षणका लागि विराटनगर पठाइएकोमा १० जनाको रिपोर्ट कोरोना पोजेटिभ आएको हो।

अरूको रिपोर्ट आउन बाँकी रहेको जिल्ला जनस्वास्थ्य कार्यालय झापाका फोकल पर्सन जीवन चौलागाईंले बताए।

पथरिया माविमा राखिएका व्यक्तिमा कोरोना देखा परेपछि सो क्वारेनटाइन सिल गरिएको छ। भारतबाट आउने नागरिकलाई अन्यत्र राखिने तयारी भइरहेको छ।

स्थानीय महेन्द्ररत्न माविमा एक सय बेडको थप क्वारेनटाइन बनाउने काम सुरू भएको छ। पथरिया माविमा ३३ र लक्ष्मीप्रसाद देवकोटा माविको क्वारेनटाइनमा एक महिलासहित ६४ जना रहेका छन्।

सो गाउँपालिकामा ९७ जनालाई क्वारेनटाइनमा राखिएको छ। उनीहरू सबै भारतबाट आएका हुन्। लक्ष्मीप्रसाद देवकोटा माविको क्वारेन्टाइनमा बसेकाहरूको पनि स्वास्थ्यकर्मीको टोलीले स्वाब संकलन गरिरहेका छन्।

यो गाउँपालिकाको पाँच वटा वडा भारतको विहार राज्यस्थित किसनगञ्ज जिल्लासँग जोडिएको छ। खुल्ला सीमा कारण भारतबाट लुकिछिपी नेपाली नागरिक आउने क्रम जारी छ।

बोर्डरसम्म आइपुगेका नेपालीलाई भारतीय सीमा सुरक्षा बल एसएसबीले नेपाल प्रवेश गर्न दिइरहेको गाउँपालिका अध्यक्ष आलमले बताए। ‘यसले सीमामा थप चुनौती देखिएको छ,’ आलमले भने।

चारदिनको अवधिमा ९६ जना नेपाल प्रवेश गरेका छन्। मंगलबार मात्रै केचना र पाठामारी सीमामा ५० जना नेपाली आएर बसेको अध्यक्ष आलमले बताए।

उनीहरूलाई अहिले नेपाली सुरक्षाकर्मीले सीमामै रोकेर राखेका छन्। क्वारेनटाइनको व्यवस्थापन भएपछि मात्र स्वास्थ्य जाँच गराएर ल्याउने अध्यक्ष आलमले बताए।

१० जनामा कोरोना संक्रमण फेला परेपछि प्रमुख जिल्ला अधिकारी रानाको नेतृत्वको टोली कचनकवल गएको थियो। सो टोलीले त्यहाँको क्वारेन्टाइन, सुरक्षा अवस्था र सीमाका बारेमा गाउँपालिका अध्यक्ष आलमसँग जानकारी लिएको छ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय