वडा अध्यक्ष भन्छन् : पूरै वडा सिल गरेर सबैको परीक्षण गर्दैछौं

नेपालगञ्ज उपमहानगरपालिका- ८ मा आइतबार एकै दिन १५ जनामा कोरोना भाइरसको संक्रमण भेटियो। योसँगै त्यहाँ कोरोना संक्रमितको संख्या १६ पुगेको पुग्यो। यी सबै संक्रमित एउटै टोलका हुन्।

आइतबार स्वास्थ्य परीक्षण गर्दा १५ जनामा भाइरसको संक्रमण देखिएपछि सिंगै उपमहानगरपालिका त्रसित भएको छ।

गत शुक्रबार एक जनामा कोरोना भाइरसको संक्रमण देखिएपछि उपमहानगरले आइतबार उनको सम्पर्कमा आएका अन्य ९० जनाको स्वास्थ्य परीक्षण गरेको थियो। स्वास्थ्य परीक्षण गरिएकामध्ये ६० जनाको रिपोर्ट आइसकेको छ। जसमा १५ जनामा कोरोना पोजे‌टिभ देखियो। आझै ३० जनाको रिर्पोट आउन बाँकि छ।

‘महामारी फैलिएको सुरुआति दिनमा कसैले वास्ता गरेनन्। आइतबार एकैदिन १५ जनामा कोरोना संक्रमण देखिँदा सर्वसाधारण भने त्रसित बनेका छन्, नेपालगञ्ज उपमहानगरपालिका ८ नम्बरका वडा अध्यक्ष सुरेन्द्र गुप्ताले भने, ‘संक्रमितहरू कतिको सम्पर्कमा आए, कतिसँग घुलमिल भए ति सबैको खोजि गरेर परीक्षण नगर्दासम्म खतरा कायमै रहने छ।’

अहिले भाइरसको संक्रमण देखिएका १६ जना सबै ८ नम्बर वडाकै स्थानीय हुन्। वडामा करिव ६ हजार जनसंख्या छ। ति सबैको स्वास्थ्य परीक्षण गर्नुपर्ने अध्यक्ष गुप्ताको भनाइ छ। सुरुमा स‍ंक्रमण पुष्टि भएका ६० वर्षीय वृद्ध त्यही टोलका स्थानीय मदरसामा पढाउने शिक्षक हुन्।

‘एकैदिन १५ जनामा संक्रमण देखिनु सामान्य होइन। यो अवस्थाले वडा मात्रै नभई उपमहानगरपालिका नै त्रासमा छ। वडाले केही गर्न सक्दैन यसका लागि स्थानीय, प्रदेश तथा केन्द्र सरकारले समन्वय गरि काम गर्न आवश्यक छ,’उनले भने।

संक्रमितको संख्या अझै बढ्न सक्ने अनुमान गरिएको बताउँदै गुप्ताले सवै वडावासीको स्वास्थ्य परीक्षण गर्नुपर्ने बताए।

‘यहाँ थुप्रैमा संक्रमण हुन सक्छ। सबैको स्वास्थ्य परीक्षण नभएसम्म ढुक्क हुने अवस्था छैन’, अध्यक्ष गुप्ताले भने,‘पहिलेदेखि नै सीमाना र लकडाउनमा कडाई गरेको भए यस्तो अवस्था आउने थिएन।’

कोरोना भाइरसको महामारी नियन्त्रण तथा रोकथामका लागि वडामा स्वास्थ्य सामग्री तथा स्वास्थ्यकर्मीको अभाव रहेको भन्दै वडाले गर्नसक्ने सहयोग गर्ने र थप जिम्मेवारी उपमहानगरले लिनुपर्ने उनी बताउँछन्।

वडामा स्वास्थ्य सामग्री तथा स्वास्थ्यकर्मीको अभावका कारण सर्वसाधारणको स्वास्थ्य परीक्षण गर्नेदेखि लिएर सबै काम उपमहानगरले गरिरहेको छ।

‘भाइरसको रोकथाम तथा नियन्त्रणका लागि ८ नम्बर वडालाई शिल गरि लकडाउनकमा कडाई गर्नुका साथै वडाका सबैको स्वास्थ्य परीक्षणका लागि पहल गरिरहेका छौं,’ उनले भने।

गत शुक्रबार ८ नम्बर वडामा रहेको अन्सारी मस्जिदका पूजारीमा पहिलोपटक कोरोना भाइरसको संक्रमण पुष्टि भएको थियो। उनमा संक्रमण देखिएपछि मस्जिद आसपासका सर्वसाधारणको स्वास्थ्य परीक्षण गरिएका थियो।

संक्रमण देखिएको टोलमा सबैजसो मुस्लिम समुदायको बसोबास रहेको र उनीहरूको मस्जिदमा आउजाउ रहेकाले संक्रमणको जोखिम बढी रहेको अध्यक्ष गुप्ताले जानकारी दिए।

यसरी एकै पटक ठूलो संख्यामा कोरोना संक्रमित भेटिएपछि मस्जिद आसपासका सर्वसाधारणको मात्रै स्वास्थ्य परीक्षण गरिएको उनले बताए। उनले यत्तिले मात्रले पुग्ने नभई वडाका सबै स्थानीयको स्वास्थ्य परीक्षण गर्नु निकै आवश्यक रहेको बताए। वडाले मात्र धान्न नसक्ने भएकाले थप भयावह स्थिती सिर्जना हुन नदिने उपमहानगरलगायत सम्बन्धित निकायले बेलैमा ध्यान दिनुपर्ने उनको भनाइ छ।

नेपालगञ्ज तथा बाँकेको दशगजा क्षेत्रबाट लकडाउनको समयमा सयौं मानिस नेपाल भित्रिएका थिए। उनीहरूमध्ये आधाजति नाकाबाट सिधै घर गएका थिए। भारतबाट आएका केही मानिस मात्रै क्वारेन्टाइमा बसेकाले त्यहाँ संक्रमणले भयावह रुप लिनसक्ने चिन्ता व्यक्त हुनथालेको छ।

नाकाबाट सिधै घर गएकाहरूको खोजिकार्य जारिरहेको वडाध्यक्ष गुप्ताको भनाई छ। उनले यस्तो विषम परिस्थितिमा सबै वडावासीलाई नआत्तिकन सावधानी अपनाउन आग्रह गरे।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय