भारतमा २४ घण्टामा ७१ जनाको मृत्यु, यी हुन् उच्च जोखिम भएका १० राज्य

भारतमा कोरोना भाइरस संक्रमणबाट बितेको २४ घण्टामा ७१ जनाको मृत्यु भएको छ। भारतभरि थप २ हजार २ सय ९३ जनामा संक्रमण फेला परेको पुष्टि भएको छ।

कोरोना भाइरसका कारण भारतमा १ हजार २ सय २३ जनाको मृत्यु भइसकेको छ। शनिबारसम्ममा ३७ हजार ३ सय ३७ जनामा भाइरसको संक्रमण देखिएको छ।

संक्रमितमध्ये २६ हजार १ सय ६७ जनाको उपचार भइरहेको छ। अरू ९ हजार ९ सय ५१ जन उपचारपछि निको भएर घर फर्किसकेका छन्।

कोरोेना भाइरसको महामारीबाट सबैभन्दा प्रभावित महाराष्ट्र भएको छ। महाराष्ट्रमा हालसम्म ४ सय ८५ जनाको मृत्यु भएको छ। १३ हजार ८ सय ७० जनामा संक्रमण देखिएको छ।

यी कोरोनाको जोखिम बढी भएका १० राज्य

महाराष्ट्र

महाराष्ट्रमा अहिलेसम्म १३ हजार ८ सय ७० जनाकमा कोरोना भाइरसको संक्रमण रहेको पुष्टि भएको छ। ४ सय ८५ जनाको ज्यान गएको छ। संक्रमितमध्ये १ हजार ८ सय ७९ निको भएका छन्।

दिल्ली

दिल्लीमा भाइरसको संक्रमणबाट ६१ जनाले ज्यान गुमाएका छन्। ४ हजार ९ सय ६६ जना संक्रमितमा १ हजार १ सय ६७ जना घर फर्किसकेका छन्।

मध्यप्रदेश

मध्यप्रदेशमा ३ हजार ३ सय ८८ जना संक्रमितमध्ये १ सय ४५ जनाको मृत्यु भएको छ। १ सय २४ जना निको भएका छन्।

गुजरात

गुजरातमा ५ हजार ६ सय ९२ जनामा कोरोना भाएरसको संक्रमण देखिएको छ। २ सय ३६ जनाको ज्यान गएको छ। संक्रमितमध्ये ७ सय ३५ जना निको भएका छन्।

तमिलनाडु

तमिलनाडुमा ३ हजार ८ सय ६६ जनामा भाइरसको संक्रमण रहेको छ भने २८ जननाको मृत्यु भएको छ।

आन्ध्र प्रदेश

आन्ध्र प्रदेशमा १ हजार ८ सय ९९ जना भाइरसका संक्रमित रहेका छन् भने ३३ जनाले ज्यान गुमाएका छन्।

विहार

विहारमा ५ सय ७२ जनामा कोरोना भाइरसको संक्रमण देखिएको छ। ३ जनाको मृत्यु भएको छ।

उत्तर प्रदेश

उत्तर प्रदेशमा ३ हजार २४ जना संक्रमितमध्ये ४२ जनाको भाइरसका कारण मृत्यु भएको छ।

राजस्थान

राजस्थानमा ३ हजार ८ सय ४४ जना कोरोना भाइरसका संक्रमितमध्ये ६२ जनाको ज्यान गएको छ।

पश्चिम बंगाल

पश्चिम बंगालमा हालसम्म ९ सय ६७ जनामा कोरोना भाइरसको संक्रमण रहेको पुष्टि भएको छ। जसमध्ये ३३ जनाको मृत्यु भइसकेको छ।

कोरोना भाइरसको महामारी नियन्त्रणमा नआएपछि भारतले तेस्रो चरण अन्तर्गत लकडाउनको समय दुई साता थपेर १७ मेसम्म बढाएको छ। भारतमा पहिलोपटक मार्च २४ बाट अप्रिल १३ सम्म, अप्रिल १४ बाट मे ३ सम्म र मे ३ बाट थपेर मे १७ तारिखसम्म पुर्याएको छ।

प्रभाव, संक्रमितको संख्या र जोखिमका आधारमा भारतमा ७४ जिल्लालाई रेड जोन, ओरेन्ज जोन र ग्रीन जोन गरी तीन समूहमा विभाजन गरेको छ।
भारत सरकारले उत्तर प्रदेशका १९ जिल्ला रेड जोनमा, ३५ जिल्ला ओरेन्ज र २० जिल्लालाई ग्रीन जोनमा राखेको छ।

यस्ता छन् जोेखिम अनुसार छुट्याइएका जिल्लाहरू

रेड जोन

आगरा, लखनउँ, सहारनपुर, कानपुरनगर, मुरादावाद, फिरोजावाद, गौतमबुद्धनगर, बुलंदशहर, मेरठ, रायबरेली, वाराणसी, बिजनौर, अमरोहा, सन्तबवीरनगर, अलीगढ, मुजफ्फरनगर, रामपुर मथुरा बरेली।

ओरेन्ज जोन

गाजियाबाद, हापुड, बदायु, बागपत, बस्ती, शामली औरैया, सीतापुर, बहराइच, कन्नौज, आजमगढ, मैनपुरी, श्रावस्ती, बांदा, जौनपुर, एटा, कासगञ्ज, सुुल्तानपुर, प्रयागराज, जालौन, मिर्जापुर, इटावा, प्रतापगढ, गाजीपुर, गोंडा, मउ, भदोही, उन्नाव, पीलीभित, बलरामपुर, अयोध्या, गोरखपुर, झांसी, हरदोइ, कौशांबी।

ग्रीन जोन

बाराबंकी, लखीमपुर, खिरी, हाथरस,महाराजगञ्ज, शाहजहांपुर, अम्बेडकर नगर, बलिया, चन्दैली, चित्रकुट, देवरीया, फरुखाबाद, फतेहपुुर, हमीरपुर, कानपुर, देहात, कुहीनगर, ललितपुर, महोबा, सिद्धार्थनगर, सोनभद्र, अमेठी।

तेस्रो चरणको लकडाउनमा पनि रेलसेवा र हवाइसेवा र मेट्रो पहिलेको जस्तै बन्द रहने निर्णय भारत सरकारले गरेको छ। अर्को राज्यमा फसेका श्रमिकलाई घर पठाउन रेलसेवा सञ्चालन गरिएको छ, जसका लागि राज्य सरकारको अनुमति आवश्यक गरेको छ।

लकडाउनको समयमा स्कुल कलेज लगायतका सबै शैक्षिक संस्था होटल, रेस्टुरेन्ट सिनेमा हल, सपिङ सेन्टर, खेल संस्थान, फिटनेस सेन्टर बन्द रहने छन्। तर, जोखिम कम भएका क्षेत्रमा साना पसलहरु खोल्न दिइने छ।

सार्वजनिक कार्यक्रम गर्न नपाइने तथा भेला हुन नपाउने निर्णय भारत सरकारले गरेको छ।

सबै धार्मिक संस्थाहरु बन्द रहने छन्। तर, विशेष परिस्थितिमा गृह मन्त्रालयको अनुमतिमा सडक, हवाइ तथा रेलसेवा प्रयोग गर्न दिइने छ।

बिहान ७ बजेदेखि बेलुका ७ बजेसम्म हिँडडुल गर्न प्रतिबन्ध लगाई लकडाउनलाई थप प्रभावकारी बनाउने निर्णय भारत सरकारले गरेको छ।

६५ वर्षमाथिका सर्वसाधारण, दीर्घरोगी तथा १० वर्षभन्दा मुनिका बालबालिकालाई बाहिर आउन प्रतिबन्ध लगाइएको छ।

मदिरा पसलहरु खुला रहने भएपनि सार्वजनिक स्थाहरुमा धुमपान गर्न नपाइने र एक जिल्लाबाट अकोर्् जिल्ला जाने सबै सवारीसाधान तथा सर्वसाधारणमा रोक लगाएको छ।

ग्रीन जोनमा केही सीमित गतिविधि बाहेक सार्वजनिक सवारीसाधान सञ्चालन गर्न पाइने र मालबाहक सवारीलाई पास बिना पनि प्रवेश गर्न दिने व्यवस्था गरिएकाे भारतीय सञ्चारमाध्यमहरूले जानकारी दिएका छन्।

ओरेन्ज जोनमा एक ट्याक्सी बराबर १ जना सवारीलाई आवतजावत गर्न दिइने र चार पाङग्रे साना सवारीले दुई जना बोक्न सक्ने छन्।

रेड जोनमा खाद्यान्न लगायतका अति आवश्यक वस्तुहरुको अभाव हुन नदिन अनलाइन सेवा सुरू गरिनुका साथै सरकारी कर्मचारीले घरबाटै काम गर्न सक्ने र निजी संस्थानका ३३ प्रतिशत कर्मचारीले अफिसबाट काम गर्न सक्ने छन्।

यसका साथै रेडजोनमा इलेक्ट्रोनिक मिडिया, सूचना प्रविधिसम्बन्धी काम गर्ने संस्था, कल सेन्टर तथा कोल्डस्टोर लगायतका पसलहरु खोल्न सकिने छ।

विश्वभर कोरोना भाइरसको संक्रमणबाट २ लाख ३९ हजार ६ सय १५ जनाको मृत्यु भएको छ। ३४ लाख १ हजार ३ सय ३५ जनामा संक्रमण रहेको पुष्टि भएको छ। संक्रमितमध्ये १० लाख ८३ हजार ८ सय १६ जना निको भइ घर फर्किसकेका छन्।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय