मास्क र स्यानिटाइजर नि:शुल्क दिन अदालतको आदेश, नेपालगन्जमा टास्क फोर्स गठन

भारतमा कोरोना भाइरसको संक्रमण फैलिदैं जान थालेपछि सीमावर्ती बाँकेमा पनि उच्च सर्तकता अपनाउन थालिएको छ। नेपालगञ्ज देखि १ सय ९० किमी दुरीमा रहेको लखनउमा समेत संक्रमितहरु भेटिइसकेका छन्।

विरुद्ध संक्रमण फैलिन नदिनका लागि बाँकेमा टास्क फोर्स गठन गरिएको छ। नेपालगञ्ज उप–महानगरपालिकाको आयोजनामा बसेको समन्वयात्मक बैठकले प्रमुख जिल्ला अधिकारी कुमारबहादुर खड्काको संयोजकत्वमा टास्क फोर्स गठन गरिएको हो।

यसैगरी बैठकले नेपालगञ्ज उपमहानगरपालिकाका प्रमुख डा. धवलसमशेर राणाको संयोजकत्वमा आकस्मिक कोष ब्यवस्थापन समिति, भेरी अस्पतालका प्रमुख डा. प्रकाश थापाको संयोजकत्वमा मेडिकल समिति, प्रमुख जिल्ला अधिकारी खड्काको संयोजकत्वमा ब्यवस्थापन समिति र जिल्ला जनस्वास्थ्य कार्यालय बाँकेका प्रमुख धिरजंग शाहको संयोजकत्वमा रोकथाम तथा नियन्त्रण समिति गठन गरिएको छ ।

बैठकमा नेपालगञ्ज उपमहानगरपालिकाका प्रमुख डा. धवल शम्शेर राणाले कोरोना भाईरस विरुद्ध पूर्व तयारीका लागि आकस्मिक कोष आवश्यक पर्ने भएकाले नेपालगञ्ज उपमहानगरपालिकले ३० लाख सहयोग गर्ने जानकारी दिएका छन ।

बैठकमा बाँकेको जिल्ला समन्वय समितिले ३० लाख, कोहलपुर नगरपालिकाले २० लाख, ६ वटा गाउँपालिकाले १० लाखका दरले ६० लाख र नेपालगञ्ज उद्योग वाणिज्य संघले २० लाख रुपिया सहयोग गर्ने प्रतिवद्धता गरेका छन्।

बैठकका अध्यक्षता गर्दै नेपालगञ्ज उपमहानगरपालिकाका उपप्रमुख उमा थापा मगरले कोरोना भाईरस भारतको उत्तरप्रदेश राज्यमा देखिएका कारण नेपालगञ्ज पनि उच्च जोखिममा रहेको भन्दै आम नागरिक सचेत हुनुपर्ने बताईन्। बैठकले अतिआवश्यक काम बाहेक भारत नजान आम नागरिकमा आग्रह समेत गरेको छ ।

मास्क तथा स्यानीटाइजर निःशुल्क दिन अदालतको आदेश
यसैबीच नागरिकको स्वास्थ्य र सुरक्षाको व्यवस्थापनको कार्यन्वयनका लागि सरोकारवाला निकायलाई उच्च अदालत नेपालगन्जले १५ दिनभित्र लिखित जवाफ पेश गर्न आदेश गरेको गरेको छ ।

बाँके बर्दिया जिल्ला छिमेकी मुलुक भारतसंग जोडिएको र नजिकै लखनउ र दिल्ली रहेकोले त्यहाको यसको संक्रमण फैलिएपछि यहाँका नागरिकमा सन्त्रास बढ्दै जाँदा सार्वजनिक सरोकारको विषय भन्दै यहाँका दुई जिल्लाका १५ वटा कार्यालयलाई विपक्षी बनाइ मुद्दा दायर गरिएको हो ।

अदालतमा परेको रिटमाथी सोमबार भएको सुनवाईमा १५ दिनभित्र प्रदेश नंं ५ का मन्त्रालय, र बाँके बर्दिया जिल्लाका विभिन्न कार्यालयका नाममा रिटमा उल्लेख गरिएका विषयबस्तुमा गम्भीर हुन र आवश्यक पहलका बारेमा लिखित जवाफ माग गरिएको छ ।

सरकारले आफ्नो स्रोतको परिचालन गरी जनतालाई स्वास्थ्य अधिकारको प्रत्याभुति दिन कर्तव्य भएको हुदा निवेदकले उठाएको विषयमा सर्वसाधारण नागरिकलाई कोरोना भाइरस रोगको निशुल्क औषधी उपचार, रोकथाम, परिक्षण, निशुल्क मास्क, सेनेटाइजर उपलब्ध गराउनु र सबै विद्यालय, कार्यालय, संघसंस्था, अस्पतालमा समेत हात धुने साबुन, हेण्ड वाशको व्यवस्था तत्काल गर्न गराउन पनि अदालतले आदेश दिएको छ।

सूचना र मानवअधिकार अनुसन्धान केन्द्र नेपालगन्जका तर्फबाट अध्यक्ष विश्वजित तिवारी, नेपालगन्ज १३ का कृष्णमुरारी प्रसाद भट्ट र बर्दिया बढैयातालका प्रतापसिंह थारुले आईतवार अदालतमा रिट दायर गरेका थिए

संक्रमणकाल घोषणा गर्न वाणिज्य संघको आग्रह

नेपालगन्ज उद्योग वाणिज्य संघले कोरोना भाइरस प्रभावित अर्थतन्त्रलाई जोगाउन व्यवसायिक संक्रमणकाल घोषणा गर्न माग गरेको छ ।

उद्योगधन्दा, कलकारखाना, व्यापार व्यवसाय र सर्वसाधारणको दैनिक जीवनमा समेत प्रतिकुल असर पार्ने कोरोना भाइरस प्रभावित समयसम्मका लागि व्यवसायिक संक्रमणकालको घोषणा गरी सहुलियत प्रदान गर्न संघले सरकारको गम्भीर ध्यानार्कषण गराएको हो ।

संघका अध्यक्ष अब्दुल वाहिद मन्सुरी र महासचिव चिरञ्जीवी ओलीले बिज्ञप्ती जारी गर्दै बिश्वभर फैलिएको कोरोना भाइरसका कारण सम्पूर्ण जनमानसमा त्रास उत्पन्न भएको र अर्थतन्त्रमा गम्भीर धक्का पुग्ने अवस्था सिर्जना भएको जनाएका छन् ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय