उहानबाट लगिएका ४०६ भारतीयमा देखिएन कोरोना संक्रमण, सोमबारदेखि क्वारेन्टाइन छोड्ने अनुमति

कोरोना भाइरस (कोभिड–१९) प्रभावित चीनको उहानबाट उद्धार गरिएका ४०६ जना भारतीयमा संक्रमण नभएको पाइएको छ । नयाँदिल्लीको छावलास्थित आइटिबिपीको सेन्टरमा दुई साताको क्वारेन्टाइनका क्रममा गरिएको परीक्षणमा सबैको रिपोर्ट नेगेटिभ आएको भारतीय अधिकारीले बताएका छन् ।

दुई साताको क्वारेन्टाइनमा गरिएको परीक्षणको रिपोर्ट नेगेटिभ आएको भारत–तिब्बत सीमा प्रहरी (आइटिबिपी)का प्रवक्ताले जानकारी दिएका छन् । उनका अनुसार क्वारेन्टाइनमा रहेका सबैलाई सोमबारदेखि चरणबद्ध रूपमा घर जाने अनुमति दिइनेछ ।
‘सबै बिरामीको रगतको ताजा नमुना परीक्षणपश्चात् कसैमा पनि संक्रमण नभएको पुष्टि भएको छ,’ उनले भनेका छन्, ‘स्वास्थ्य मन्त्रालयको निर्देशनका आधारमा मेडिकल प्रोटोकल र प्रक्रियाअनुसार बिरामीलाई क्रमबद्ध रूपमा डिस्चार्ज गरिनेछ ।’
आइटिबिपीका अनुसार पछिल्लोपटक १४ फेब्रुअरीमा क्वारेन्टाइनमा रहेकाहरूको रगतको नमुना लिइएको थियो ।

चीनको हुबेई प्रान्तमा कोभिड–१९ को संक्रमण महामारीको रूपमा फैलिएपछि भारत सरकारले आफ्ना नागरिकलाई दुई चरणमा एयरलिफ्ट गरेको थियो । भारत लगेपछि उनीहरूलाई विश्व स्वास्थ्य संगठनको मापदण्डअनुसार दुई साताको क्वारेन्टाइनमा राखिएको थियो ।

चीनमा कोरोना भाइरस डिजिजको संक्रमणबाट मृत्यु हुनेको संख्या शनिबारसम्म १६६७ पुगिसकेको छ, जसमा हुबेई प्रान्तका मात्र १५९६ जना छन् । चीनबाहिर फिलिपिन्स, हङकङ, जापान र फ्रान्समा एक–एकजना संक्रमितको मृत्यु भएको छ । फ्रान्सले उहान घुमेर आएका ८० वर्षीय आफ्ना नागरिकको शुक्रबार कोरोना संक्रमणका कारण मृत्यु भएको पुष्टि गरेको छ ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय