उपत्यकामा पहिलो दिन खस्यो ३२६ मत, अध्यक्षका दुवै प्रत्याशीले गरे मतदान (फोटोफिचर)

हेल्थपोस्ट नेपाल

नेपाल चिकित्सक संघ (एनएमए) को २८औँ कार्यकारिणी समितिका लागि जारी निर्वाचनमा उपत्यकामा शुक्रबार पहिलो दिन ३२६ मत खसेको छ । मंगलबार (२१ माघ) सम्म मतदान जारी रहने निर्वाचन कार्यतालिका छ । उपत्यकाका लागि प्रदर्शनीमार्गस्थित संघको केन्द्रीय कार्यालयमा एक मात्र निर्वाचन केन्द्र तोकिएको छ ।

उपत्यकाभित्र एनएमएका कुल ६ हजार ३ सय ५१ मतदाता छन् । शुक्रबार ५.१५ प्रतिशत मात्र मतदान भएको हो । अध्यक्षका दुवै प्रत्याशीले पहिलो दिन नै मतदान गरेका छन् ।

यसअघि उपत्यकाबाहिरका १६ वटा शाखामा मतदान सम्पन्न भइसकेको छ । ४ र ५ माघमा १८ वटा मतदान केन्द्रमार्फत मोफसलका चिकित्सकले मतदान गरेका थिए । उपत्यकाबाहिर कुल २ हजार ८ सय ५० मत खसेको थियो, जुन कुल मतदाताको ८० प्रतिशत हो ।

नेपालको पहिलो पेसागत संगठनको आगामी नेतृत्वका लागि चिकित्सकका दुई प्यानल मैदानमा छन् । कुल १३ पदका लागि दुई प्यानलका २६ र ४ स्वतन्त्र उम्मेदवारबीच प्रतिस्पर्धा भइरहेको छ । निवर्तमान कार्यकारिणी समितिका महासचिव डा. लोचन कार्कीको नेतृत्वमा लोकतान्त्रिक तथा पेसागत समूह मैदानमा छ । सत्तारुढ नेकपानिकट मानिने पेसागत तथा समावेशी समूहको नेतृत्व डा. पुष्पमणि खरालले गरिरहेका छन् । महासचिवमा २ र सदस्यमा २ चिकित्सकले कुनै प्यानलमा आबद्ध नभई उम्मेदवारी दिएका छन् ।

मतदानस्थलमै भड्किलो प्रचार
देशको बौद्धिक वर्ग चिकित्सकको पेसागत छाता संगठनको निर्वाचनमा निर्वाचन आचारसंहिताको पालना शून्यप्रायः देखिएको छ । मतदानस्थलमै चिकित्सकहरू ठूला–ठूला ब्यानर, पर्चा–पम्प्लेटसहित मत मागिरहेका देखिए ।

विशेषगरी डा. खराल नेतृत्वको समावेशी समूहले मतदानस्थलमा भड्किलो र खर्चिलो व्यवहार देखाएको छ । समावेशी समूहको प्रचारमा उम्मेदवार र मतदाता मात्र नभई गैरमतदाता र गैरचिकित्सकसमेत देखिए । नेकपानिकट केही नेता–कार्यकर्ताले समेत मतदानस्थलमै पुगेर डा. खराल नेतृत्वको समूहलाई भोट मागेका थिए । उनीहरू प्रगतिशील समूहको पहिचान झल्किने निलो रङको टोपीमा प्रस्तुत भएका थिए ।

तत्कालीन नेकपा एमालेकी स्वास्थ्य विभाग प्रमुख नेकपा नेत्री सुजिता शाक्य मतदानस्थलभित्रै प्रवेश गरेपछि चिकित्सकहरूले आपत्तिसमेत जनाएका थिए । दुवै पक्षको प्रचारशैली निर्वाचन आचारसंहिताविपरीत देखिन्थ्यो ।

 

 

 

 

 

 



Leave a Reply

Your email address will not be published.