अस्पतालको ड्युटी अवधिमा निजी अभ्यास गर्ने सरकारी डाक्टरलाई कारबाही गर्छु : मन्त्री ढकाल

स्वास्थ्य तथा जनसंख्यामन्त्री भानुभुक्त ढकालले सरकारी अस्पतालमा जागिर खाएर ड्युटी समयमा निजी क्लिनिकमा काम गर्ने डाक्टरलाई कारबाही गर्ने बताएका छन् । विश्व अपांगता दिवसको अवसरमा मध्यपुरथिमि नगरपालिकाले सञ्चालन गरेको नेपाल–कोरिया मैत्री नगरपालिका अस्पतालले मंगलबार आयोजना गरेको कार्यक्रममा मन्त्री ढकालले अनियमितता संलग्न चिकित्सक तथा स्वास्थ्यकर्मीलाई वेलैमा नसुध्रिए कारबाही गर्ने चेतावनी दिएका हुन् । मन्त्री यादवले स्वास्थ्य क्षेत्रका यस्ता बेथिति सबै हट्ने दाबीसमेत गरे ।

अस्पतालहरूको बेथिति अन्त्य गर्न तथा सर्वसुलभ स्वास्थ्यसेवा प्रदान गर्न आफूले विशेषज्ञ डाक्टरसँग छलफल चलाएकोमा उनीहरूबाट १० : ०० देखि ५ : ०० बजेसम्मको ड्युटी परिपाटी हटाउन सुझाब आएको मन्त्री यादवले बताए । सरकारी अस्पतालमा जागिर खाएपछि ड्युटी अवधिभर सम्पूर्ण रूपमा अस्पतालमै सेवा दिनुपर्ने मन्त्री ढकालको भनाइ थियो ।  ‘सेवाको जिम्मा लिएर यस्ता काम गर्नेलाई अब कारबाही गरिन्छ,’ मन्त्री ढकालले भने, ‘सरकारी अस्पतालमा १० बजे हाजिर गरेर नाफाका लागि खोलिएका आफ्ना निजी क्लिनिक चलाउने बेथितिको अब अन्त्य हुन्छ ।’

मन्त्री ढकालले बजारमा औषधि महँगो भएका कारण किन्न नसकेर बिरामी रोग बोक्न बाध्य भइरहेको आफूले सुनेको उल्लेख गर्दै अब त्यस्तो अवस्था नआउने दाबी गरे । ‘औषधोपचार सेवा नपाएर, आर्थिक अभावका कारण कोही पनि मर्न नपरोस् र स्वास्थ्यसेवाबाट कोही पनि वञ्चित हुन नपरोस् भनेर सरकारले काम गरिरहेको छ,’ मन्त्री ढकालले भने ।

मन्त्री तथा कर्मचारीहरू सरकारी पैसामा विदेश भ्रमणमै रमाउने विद्यमान प्रवृत्तिप्रति पनि मन्त्री ढकाल असन्तुष्ट देखिए । विदेशी दाताले दिएको रकम सेवाका नाममा विदेशमै भ्रमण गरेर र गोष्ठी गरेर सक्नेखालको परिपाटीलाई अब पूर्ण रूपमा नियन्त्रण गरिने दाबी उनको छ । मन्त्री ढकालले स्वास्थ्यको नेतृत्व सम्हालेको २ साता पनि पुगेको छैन । यस्तोमा उनको पर्फर्मेन्स भने हेर्न बाँकी नै छ । स्वास्थ्यका लागि नयाँ अनुहार भए पनि २ वर्षदेखि मन्त्रिमण्डलको महत्त्वपूर्ण सदस्य रहेर सरकार पुनर्गठनमा समेत जनतासँग प्रत्यक्ष सरोकार राख्ने स्वास्थ्यको महत्त्वपूर्ण जिम्मेवारीमा ल्याइएका कारण मन्त्री ढकालबाट ठूलै आशा भने गरिएको छ ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय