विराट मेडिकल कलेजले स्वास्थ्य स्वयंसेविकालाई दियो स्तनक्यान्सरविरुद्ध तालिम

हेल्थपोस्ट
प्रकाशित
२०७६ कार्तिक २२ गते १७:४९

प्रत्येक वर्ष अक्टोबर महिनालाई विश्वभर स्तनक्यान्सरविरुद्धको जनचेतना महिनाका रूपमा मनाइँदै आएको छ । यसै सन्दर्भमा विराट मेडिकल कलेज शिक्षण अस्पतालले प्रदेश १ का मोरङ र सुनसरी जिल्लाका महिला स्वास्थ्य स्वयंसेविकालाई एकदिने निःशुल्क स्तनक्यान्सर परीक्षण तथा सीपअभिवृद्धि तालिम दिएको छ ।

तालिममा स्वयम् स्तनपरीक्षण विधिबारे ज्ञान दिइएको अस्पतालले जनाएको छ । तलिमबाट स्वयंसेविकाको सीपअभिवृद्धिमा समेत महत्त्वपूर्ण सहयोग पुगेको अस्पतालको भनाइ छ । तालिममा ३ सय महिला स्वास्थ्य स्वयंसेविका, चिकित्सक, नर्स, फ्याकल्टी, चिकित्साका विद्यार्थी तथा सञ्चारकर्मीको सहभागिता थियो ।

तालिममा विराट मेडिकल कलेज शिक्षण अस्पतालका कम्युनिटी फिजिसियन असिस्टेन्ट प्रा. डा. सूर्य पराजुलीले स्तनक्यान्सरको अहिलेको अवस्था, सम्भावित कारण, लक्षण तथा चिह्नहरू तथा सम्भावित जोखिमबारे सहजीकरण गरेका थिए । यसैगरी वरिष्ठ प्याथोलोजिस्ट असोसिएट प्रोफेसर डा. सन्तोष उपाध्याय काफ्लेले स्तनक्यान्सरको जाँच गर्ने विभिन्न विधिबारे प्रशिक्षण दिए । त्यस्तै, वरिष्ठ क्यान्सररोग विशेषज्ञ असिस्टेन्ट प्रोफेसर डा. सुलभ सापकोटाले क्यान्सरको उपचार विधि, स्वयम् स्तनपरीक्षण विधिबारे तालिम दिएका थिए ।

स्तनक्यान्सर समयमै पहिचान गर्न सके यसबाट हुने मृत्युलाई अत्यन्त न्यूनीकरण गर्न सकिने विशेषज्ञ चिकित्सकको भनाइ छ । उपचारपद्धतिमा नवीनतम उपलब्धि र सेवाको उपलब्धता भए पनि स्वास्थ्यपरीक्षणका लागि उपचार केन्द्रसम्म नआउनु स्तनक्यान्सर रोकथाम तथा उपचारको प्रमुख चुनौती भएको उनीहरूको ठम्याइ छ ।

‘कैयौँ स्तनक्यान्सर भएका बिरामी विभिन्न कारणले अझै पनि समुदायमा लुकेर रहनुभएको छ,’ डा. पराजुली भन्छन्, ‘यही चुनौतीलाई केही हदसम्म भए पनि कम गर्न तालिमको आयोजना गरिएको हो ।’ महिला स्वास्थ्य स्वयंसेविकाले नेपालको स्वास्थ्य जनचेतना अभिवृद्धिमा पुर्याउँदै आएको योगदानमा यस्ता कार्यक्रमले थप बल पुर्याउने विश्वास अस्पतालले लिएको उनले बताए ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय