स्वास्थ्यका समायोजित कर्मचारीलाई पुनः एकपटक गुनासो दर्ता गर्ने अवसर, १७ असोजसम्म निवेदन दिन मन्त्रालयको आह्वान

हेल्थपोस्ट
प्रकाशित
२०७६ असोज ९ गते १९:०७

स्वास्थ्य तथा जनसंख्या मन्त्रालयले स्वास्थ्यसेवाअन्तर्गतका समायोजित भइसकेका कर्मचारीलाई समायोजनबारे कुनै गुनासो भए मन्त्रालयमा निवेदन दिन समय दिएको छ । समायोजन सूची सार्वजनिक भइसकी पदस्थापनका लागि पत्राचार भइसकेका विभिन्न समूह/उपसमूहका विभिन्न तह र पदका कर्मचारी पर्याप्त कारण, आधार र प्रमाणसहित समायोजनप्रतिको गुनासो १७ आसोजभित्र निवेदनका रुपमा दर्ता गराउन सक्ने मन्त्रालयले जनाएको छ । कर्मचारीबाट आउने गुनासो सम्बोधनका लागि सिफारिस गर्न मन्त्रालयले यसअघि नै समिति गठन गरिसकेको छ ।

मन्त्रालयले ३१ भदौमा समायोजित कर्मचारीमा आफ्नो समायोजनप्रति कुनै गुनासो भए त्यसको सम्बोधनका लागि सिफारिस गर्न ‘गुनासो व्यवस्थापन र सहजीकरण समिति’ गठन गर्ने निर्णय गरेको थियो । सोहीअनुसार मन्त्रालयले बिहीबार सूचना जारी गर्दै समायोजित कर्मचारीलाई पर्याप्त आधारसहित गुनासोको निवेदन दर्ता गराउन समय तोकेर आह्वान गरेको हो ।

यसअघि गुनासो निवेदन दिनेले पुनः निवेदन दिनुपर्ने
मन्त्रालयले ३१ भदौसम्म मन्त्रालय वा अन्य निकायमा गुनासो निवेदन दिएका कर्मचारीलाई १७ असोजभित्र पुनः निवेदन दिन समेत भनेको छ । यसअघि समायोजित केही कर्मचारीले समायोजनमा आफूमाथि अन्याय भएकोलगायत विभिन्न समस्या देखाउँदै मन्त्रालयलगायत निकायमा निवेदन दिएका थिए । मन्त्रालयको सूचनाअनुसार उनीहरुले उक्त निवेदन मान्य हुने छैन । अब उनीहरुले अर्को साताको शुक्रबारभित्र पुनः मन्त्रालयको दर्ता शाखामा समायोजनमा गुनासो रहनुको उपयुक्त कारण, आफूसित भएको प्रमाण र आधारसहित निवेदन दिनुपर्नेछ ।

मन्त्रालयले समायोजनको काम अन्तिम चरणमा पुगेको जनाएको छ । कर्मचारीलाई केन्द्र, प्रदेश र स्थानीय तहमा समायोजन गरी पत्राचार गर्ने काम लगभग टुंगिने अवस्थामा पुगेको मन्त्रालयको भनाइ छ । यससँगै निकै सकसपूर्ण बनेको स्वास्थ्यको समायोजन झन्डै वर्षदिनको स्वास्थ्य र सामान्य प्रशासन मन्त्रालयको अभ्यासपछि निष्कर्षमा पुग्न लागेको छ ।

यसअघि लामो कसरतपछि सामान्यले दिएको स्वास्थ्यको समायोजन सूचीमा व्यापक त्रुटि भेटिएपछि स्वास्थ्यले कर्मचारीलाई गुनासो दर्ता गर्ने समय दिएको थियो । त्यतिवेला १० हजारभन्दा बढीले गुनासो दर्ता गराएका थिए । त्यसमध्ये ७ हजार ७ सय ४० गुनासालाई जायज ठहर गर्दै तिनमा समायोजन सच्याउन गुनासो सम्बोधन प्राविधिक उपसमितिले सिफारिस गरेको थियो । सोही आधारमा मन्त्रालयले चरणबद्ध रुपमा समायोजन सूची सार्वजनिक गर्दै आएको छ ।

 

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय