स्वास्थ्यका ३१,६५० कर्मचारी :  कुन सरकारमातहत कति ? कुन प्रदेशमा कति ? कति दरबन्दी रिक्त ?

हेल्थपोस्ट नेपाल

मुलुकले नयाँ शासन व्यवस्थाका रुपमा संघीय शासन प्रणालीलाई अंगीकार गरेदेखि नै चर्चा सुरु भएको स्वास्थ्यका कर्मचारीको समायोजनको विषय अझै पनि टुंगोमा पुग्न सकेको छैन । समायोजनले पूर्णता नपाउँदा एकातिर स्वास्थ्यका रिक्त दरबन्दीमा पदपूर्ति तथा स्तरवृद्धिका काम हुन सकेका छैनन् भने अर्कोतर्फ आवश्यक ठाउँमा कर्मचारी खटिनपुग्दा सेवाप्रवाहमा समस्या भइरहेको छ । लामो सकसपूर्ण कसरतपछि संघीय मामिला तथा सामान्य प्रशासन मन्त्रालयले पठाएको समायोजन सूचीले थप जटिलता निम्त्याउने देखेपछि आफैँ समस्या सुल्झाउनतर्फ केन्द्रित भएको स्वास्थ्य मन्त्रालय गुनासो दर्ता गराएका करिब ७ हजार कर्मचारीको समायोजन तथा पदस्थापनमा आइपुग्दा भने थप अन्योलमा फसेको छ ।

तुलनात्मक रुपमा समस्या नभएका पदहरु तथा माथिल्लो तहका कर्मचारीको समायोजन सूची क्रमशः जारी गर्दै पदस्थापनसमेत गरिसकेको मन्त्रालयका लागि गुनासोका कर्मचारीले समायोजनको हलो अड्काएको अवस्था छ । अनवरत प्रयासका बाबजुद पनि समायोजनको गाँठो नखुलेपछि स्वास्थ्यले राय मागसहित ९ बुँदे पत्र सामान्यमा पठाएको छ । यद्यपि, स्वास्थ्यका ३१ हजार ६ सय ५० कर्मचारीमध्ये को कुन सरकारमातहत समायोजित हुने भन्ने विषय भने यकिन भइसकेको छ । यहाँ केन्द्र, प्रदेश र स्थानीय सरकारमा समायोजित हुने कर्मचारीको संख्या, तिनको प्रदेशगत विवरण र रिक्त दरबन्दीबारे जानकारी प्रस्तुत गरिएको छ ।

प्रदेश तहमा ३ हजार ५ सय ९३ कर्मचारी
प्रदेश तहमा स्वास्थ्यका ३ हजार ५ सय ९६ कर्मचारी समायोजित हुने भएका छन् । यसमध्ये सबैभन्दा बढी प्रदेश ५ मा ८ सय ७२ कर्मचारी र सबैभन्दा कम कर्णाली प्रदेशमा ३ सय ६७ कर्मचारीको समायोजन गरिने भएको हो । त्यस्तै, प्रदेश १ मा ५ सय ४८, प्रदेश २ मा ५ सय ६, प्रदेश ३ मा ४ सय ६९, गण्डकी प्रदेशमा ४ सय ४४ र सुदूरपश्चिम प्रदेशमा ३ सय ६७ कर्मचारी समायोजित हुँदै छन् ।
प्रदेशमा समायोजित हुने कर्मचारीको संख्यागत विवरण
प्रदेश १ : ५ सय ४८
प्रदेश २ : ५ सय ६
प्रदेश ३ : ४ सय ६९
गण्डकी प्रदेश : ४ सय ४४
प्रदेश ५ : ८ सय ७२
कर्णाली प्रदेश ६ : ३ सय ६७
सुदूरपश्चिम प्रदेश ७ : ३ सय ८७

संघमा २ हजार ६ सय ६१ र स्थानीयमा २५ हजार ३ सय ९६

स्वास्थ्यका सबैभन्दा बढी कर्मचारीको समायोजन मुलुकका ७ सय ५३ स्थानीय तहमा समायोजन हुँदै छ । स्थानीय तहमा कुल २५ हजार ३ सय ९६ जना कर्मचारी समायोजित हुने मन्त्रालयले जनाएको छ ।
त्यसैगरी, सबैभन्दा कर्म कर्मचरी केन्द्र सरकारमातहत रहनेछन् । संघअन्तर्गत जम्मा २ हजार ६ सय ६१ कर्मचारीको समायोजन हुने मन्त्रालयको भनाइ छ ।

५ हजार पद रिक्त, अब फाजिल दरबन्दी नहुने

स्वास्थ्य कर्मचारीको साबिककै दरबन्दीमा पनि ५ हजार पद रिक्त रहेको मन्त्रालयको तथ्यांक छ । समायोजन प्रक्रिया सकिएलगत्तै रिक्त दरबन्दीमा पदपूर्तिको प्रक्रिया अघि बढ्ने मन्त्रालयको भनाइ छ । आवश्यकताअनुसार नयाँ दरबन्दीसमेत थप्नुपर्ने र त्यसका लागि समायोजनलगत्तै अध्ययनमा ध्यान केन्द्रित गर्ने स्वास्थ्यमन्त्री उपेन्द्र यादवले पटक–पटक बताउँदै आएका छन् ।

त्यसैगरी, अबका दिनमा कर्मचारीलाई फाजिलमा नराखिने दाबी मन्त्रालयको छ । ‘हिजोका दिनमा कर्मचारीले चोरबाटो निकालेर पदलाई फाजिलमा राखेर खटाएको ठाउँमा जानुनपर्ने र तलब खान सकिने गरी काम गर्ने गरेको पाइन्छ । तर, अब फाजिल दरबन्दी रहँदैन,’ सचिव थपलिया भन्छन्, ‘जहाँ तोकिएको हुन्छ, कर्मचारीले त्यहीँ गएर काम गर्नुपर्छ । अब स्थानीय तह वा प्रदेशमा कर्मचारी चाहिएको अवस्थामा सम्बन्धित तहले नै माग गरी कर्मचारीको पदपूर्ति गर्छन् ।’



One thought on “स्वास्थ्यका ३१,६५० कर्मचारी :  कुन सरकारमातहत कति ? कुन प्रदेशमा कति ? कति दरबन्दी रिक्त ?

  1. सरकारले निति बनाउन बनाउछ तर नातावाद ले जरो गाडेको छ।सुबिधासम्पन्न ठाउंमा बसेको कर्मचारीले गाउँको दुरदराजमा जानै मान्दैन्न।दुर्गम गाउँ को कुनामा बसेर सेवा गर्ने ले सुबिधासम्पन्न ठाउँमा पाइला टेक्नै पाउदैनन् ।तर सुबिधा उहि।निति र सेवा सुबिधामा फरक रणनीति आए पो हुन्छ ?शहर र सुबिधा युक्ता ठाउँमा बस्ने र गाउँमा बसेर सेवा दिने कमर्चारीलाई समय अवधि तोकेर सरुवा गराउने।अवसर र सुबिधा मा फरक निति ल्याउने अनि पो हुन्थ्यो ।

Leave a Reply

Your email address will not be published. Required fields are marked *