चितवनको भरतपुरस्थित बिपी कोइराला मेमोरियल क्यान्सर अस्पतालले आफ्नै फार्मेसीसेवा सुरु गरेको छ । फार्मेसीका लागि कर्मचारी नियुक्त गरेको ८ महिनापछि अस्पतालले सेवा सुरु गरेको हो ।

बिहीबार बिहान ९ बजेदेखि सञ्चालनमा ल्याइएको फर्मेसीले बिरामीलाई निकै राहत दिने अस्पतालका कार्यकारी निर्देशक डा. विजयचन्द्र आचार्यले जानकारी दिए । यसअघि अस्पतालको बाहिरी भागमा साझाको फार्मेसी सञ्चालनमा थियो ।

अस्पतालका डा. आचार्यका अनुसार अन्य फार्मेसीमा भन्दा अस्पतालको फार्मेसीबाट बिरामीले सस्तो मूल्यमा गुणस्तरीय औषधि किन्न पाउनेछन् । उनले खरिद मूल्यमा २० प्रतिशत मात्र थपेर औषधि विक्री गरिने जानकारी दिए ।

विद्युतीय माध्यमबाट भुक्तानीसेवा, औषधिको खरिद प्रक्रियालगायत तयारी पूरा नभएका कारण तोकिएको समयभन्दा फार्मेसी सञ्चालन गर्न केही ढिला भएको अस्पतालको भनाइ छ । अस्पतालले फार्मेसी सञ्चालनका लागि गत कात्तिकमै १० जना कर्मचारी नियुक्त गरेर तयारी बढाएको थियो । गत चैत महिनासम्म फार्मेसी सञ्चालनमा ल्याउने योजना अस्पतालको थियो । तर, यति ठूलो संख्यामा कर्मचारी नियुक्तिको ८ महिनासम्म पनि फार्मेसी सञ्चालनमा आउन नसक्दा उद्देश्यअनुरूप सुलभ मूल्यमा गुणस्तरीय औषधि पाउनबाट बिरामी वञ्चित बनेका थिए । अस्पतालले फार्मेसी सञ्चालनका लागि अधिकृतस्तरका २ र अन्य ८ कर्मचारी नियुक्त गरेको छ ।

राष्ट्रिय नीति तथा अस्पताल फार्मेसी निर्देशिका २०७० अनुसार प्रत्येक अस्पतालले अनिवार्य रूपमा आफ्नै फार्मेसी सञ्चलन गर्नुपर्ने व्यवस्था छ । अस्पतालहरूले व्यापारिक रूपमा भाडामा फार्मेसी सञ्चालन गर्न दिँदा तथा अस्पतालआसपास भाडामा सञ्चालित फार्मेसीमा निर्भर रहँदा सर्वसाधारणले महँगो मूल्यमा औषधि किन्नुपरेको भन्दै स्वास्थ्य तथा जनसंख्या मन्त्रालयले २५ कात्तिक ०७० मा प्रत्येक अस्पतालमा आफ्नै फार्मेसी हुनुपर्ने निर्णय गरेको थियो ।
फार्मेसीका लागि कात्तिकदेखि नियुक्त कर्मचारीले विद्युतीय माध्यमबाट भुक्तानीसेवा, औषधिको खरिदप्रक्रिया, अन्य फार्मेसीको अवलोकन, औषधि विक्रीलगायत प्रक्रियाबारे जानकारी लिएको अस्पतालले जानाएको छ ।

स्वास्थ्य मन्त्रालयले फार्मेसी सञ्चालन गर्न निर्देशन दिएलगत्तै अस्पतालले औषधि खरिद गरेको थियो । करिब १३ करोडबराबरको औषधि खरिद गरिएको अस्पतालका निर्देशक डा. आचार्यले जानकारी दिए । उनका अनुसार फार्मेसीमा हाल एक हजार प्रकारका औषधि उपलब्ध छन् ।

३० देखि ४० प्रतिशतसम्म सस्तो, २४सै घण्टा सेवा
अस्पतालमा आउने बिरामीले महँगो केमोबाट आफू ठगिएको गुनासो गर्दै आएका छन् । क्यान्सरको उपचारमा प्रयोग हुने औषधि महँगो हुने भएकाले अस्पतालको आफ्नै फार्मेसी सञ्चालनमा आइसकेको अवस्थामा बिरामी निकै लाभान्वित हुने निर्देशक डा. आचार्यको भनाइ छ । अस्पतालको फार्मेसीमा ३० देखि ४० प्रतिशतसम्म सस्तोमा बिरामीले औषधि पाउने उनले जानकारी दिए । अस्पतालको फार्मेसी २४सै घण्टा सञ्चालनमा ल्याइने निर्देशक डा. आचार्यको भनाइ छ ।

भरतपुर क्यान्सर अस्पताललाई दक्षिण एसियाकै नमुना अस्पतालका रूपमा लिइन्छ । अस्पतालमा नेपालबाट मात्र नभई छिमेकी मुलुक भारतबाट समेत ठूलो संख्यामा बिरामी उपचारका लागि आउने गरेका छन् । हाल दैनिक ६ सय ५० देखि ८ सयसम्म बिरामीले अस्पतालबाट ओपिडीसेवा लिने गरेको अस्पतालले जनाएको छ । अस्पतालको साधन–स्रोतले धान्नै नसक्ने गरी बिरामीको चाप दिनहुँ थपिँदै जाँदा अस्पतालका सबै सेवामा ढिलासुस्तीलगायत समस्या झेल्नुपरिरहेको सेवाग्राहीको गुनासो रहँदै आएको छ । अस्पतालको गुणस्तरीय सेवा तथा पछिल्लो समय अस्वाभाविक रूपमा बढ्दै गएको क्यान्सररोगका कारण बिरामीको अत्यधिक चाप हुँदा समयमा उपचार दिन नसकिएको तथा बिरामीले चौतर्फी लाइन झेल्नुपरेको अस्पतालको भनाइ छ ।