रक्त क्यान्सरका सुरुवाती ६ लक्षण

– ब्लड क्यान्सरका सुरुवाती लक्षण निकै सामान्य हुन सक्छन्
– छालामा डाबर वा फोकाहरू तथा रङमा बदलाव ब्लड क्यान्सरका लक्षण हुन सक्छन्
– उपचारमा ढिलाइ हुँदा ब्लड क्यान्सर खतरनाक हुन्छ

ब्लड क्यान्सर एक खतरनाक रोग हो । हामी धेरैलाई थाहै छ, हाम्रो रगत दुईप्रकारका कोषिका (सेल) मिलेर बनेको हुन्छ, रातो रक्तकोषिका र सेतो रक्तकोषिका । हाम्रो शरीरमा पर्याप्त रगत हुनु अति आवश्यक छ, किनकि, शरीरका विभिन्न अंगसम्म अक्सिजन तथा अन्य पोषकतत्वहरू रगतको माध्यमले नै पुग्दछन् । ब्लड क्यान्सरको सुरुवात बोनम्यारोबाट हुन्छ, किनकि, रगत बोनम्यारोमै बन्छ । ब्लड क्यान्सर विभिन्नप्रकारका हुन्छन् । सुरुवाती अवस्थामा ब्लड क्यान्सरका लक्षण अति नै सामान्य हुन्छन्, जसलाई मानिसले बेवास्ता गरिदिन्छन् र पछि यसले घातक रूप धारण गर्छ । तसर्थ, ब्लड क्यान्सरबारे समयमै सचेत रही समयमै उपचार गराउनका लागि यसका सुरुवाती सामान्य लक्षणहरूबारे ज्ञान हुनु अति नै आवश्यक छ, जसलाई यहाँ प्रस्तुत गरिन्छ ।

१. बारम्बार इन्फेक्सन हुनु
ब्लड क्यान्सर हुँदा बिरामी बारम्बार इन्फेक्सनको सिकार हुन्छ । वास्तवमा, ब्लड क्यान्सरमा बिरामीको रगतमा यस्ता कोषिका (सेल) विकसित हुन्छन्, जसले स्वस्थ सेललाई नोक्सान पुर्याउन थाल्छन् । हाम्रो शरीरका प्रत्येक अंगमा रगत पुग्छ, यसैले ब्लड क्यान्सरको लक्षण पनि शरीरका कुनै पनि अंगमा देखिन सक्छ । सामान्यतया ब्लड क्यान्सर हुँदा बिरामीको छालाको इन्फेक्सन, जस्तै, छालाको रङ रातो, कालो वा खैरो हुनु, डाबर वा फोका हुनु), फोक्सोको इन्फेक्सन हुनु, घाँटी वा मुखको इन्फेक्सन हुनुजस्ता लक्षण देखापर्न सक्छन् । कुनै एक अंगको मात्र नभई एकैसाथ धरैकिसिमका इन्फेक्सन पनि हुन सक्छन् ।

२. घाउचोट लाग्दा रगत बन्द नहुनु
हाम्रो शरीरमा जब घाउचोट लाग्छ, सामान्यतया केही समयमै रगत आफैँ बन्द हुन्छ । यसको कारण यो छ कि, बाहिरी हावाको सम्पर्कमा आउँदा रगतको जम्ने प्रक्रिया सुरु हुन्छ । तर, ब्लड क्यान्सरको बिरामीमा यस्तो हुँदैन । यदि कुनै व्यक्तिमा घाउचोट लाग्दा केहीबेरमा रगत बग्न बन्द हुँदैन वा घाउ निको हुन वा पुरिन सामान्यभन्दा बढी समय लाग्छ भने यो ब्लड क्यान्सरको संकेत हुन सक्छ । यसका अलावा घाउचोट नलागेको अवस्थामा विनाकारण नाक वा गिजाबाट निस्कनु तथा महिनावारीको समयमा अत्यधिक रगत बग्नु पनि ब्लड क्यान्सरका संकेतमा पर्दछन् । त्यसैले यस्ता लक्षण देखिएमा समयमै चिकित्सकसित जाँच गराउनु आवश्यक हुन्छ ।

३. हर समय थकान र सुस्तता
थकान र सुस्तता निकै सामान्य लक्षण हुन्, जुन जुनसुकै अवस्थामा हामीमा देखिन सक्छ । तर, थकानका कारण हाम्रो नियमित काममा समस्या आउन थाल्यो र दिनभर नै सुस्त रहन पुगिन्छ भने एकपटक स्वास्थ्यजाँच गराउनुपर्ने हुन्छ । किनकि, यो ब्लड क्यान्सरको सुरुवाती लक्षण पनि हुन सक्छ ।

४. तीव्र गतिमा वजन कम हुनु
यदि हामीमध्ये कसैलाई अचानक आफ्नो वजनमा कमी आएको महसुस भइरहेको छ भने सबैभन्दा पहिले आफ्नो वजन तौलनु आवश्यक छ । यदि महिना दिनभित्रै विना कुनै प्रयास साढे २ किलोग्रामभन्दा बढी तौल घटेमा यो शरीरमा कुनै समस्याको संकेत हुन सक्छ । ब्लड क्यान्सर हुँदा पनि व्यक्तिको वजन विनाकारण कम हुन थाल्छ ।

५. जोर्नी तथा हड्डीमा पीडा हुनु
शरीरका जोर्नीहरूमा पीडा हुने समस्यालाई पनि हामी ज्यादै सामान्य मान्ने गर्छौं । सामान्यतया जोर्नीहरूमा पीडा हुनुका अनेक कारण हुन सक्छन्, जसमा बाथ, थकान, चोटपटक, हड्डीको कमजोरीलगायत पर्दछन् । तर, हाम्रो जोर्नी वा हड्डीमा हुने पीडाको कारण ब्लड क्यान्सर पनि हुन सक्छ ।

६. भोक कम लाग्नु तथा पेटको रोग हुनु
ब्लड क्यान्सरले हाम्रो पाजनतन्त्रलाई समेत नराम्ररी प्रभावित बनाउँछ । त्यसैकारण ब्लड क्यान्सर हुँदा मानिसमा भोक कम लाग्ने हुन्छ र कब्जियत तथा अपच हुने, दिसा तथा पिसाबमा रगत जानेजस्ता पेटका अनेककिसिमका लक्षण देखिन्छन् । हामीमा यदि यस्ता लक्षण देखिएमा तुरुन्त चिकित्सकसित यसको कारण जान्ने प्रयत्न गर्नुपर्छ ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय