मानव अंग प्रत्यारोपण केन्द्रका नर्सहरु न्यायको लडाईँमा, नर्सिङ संघले गरेन वास्ता

मध्यान्ह १२ बजेको तालु पोल्ने रापिलो घाम । भक्तपुरस्थित मानव अंग प्रत्यारोपण केन्द्र प्रशासनको कोपभाजनमा परेका नर्सहरू पेशागत संस्थाको सहारा खोज्दै नर्सिङ संघ केन्द्रीय कार्यालयमा जम्मा भए ।

तर, नर्सहरुको साझा संस्था भनिएको नर्सिङ संघ तिनै नर्समाथि शोषण गर्ने अस्पताल व्यवस्थापनको बचाऊको साधन बनेको छ । लाजिम्पाटस्थित संघ कार्यालयको परिसरमा धर्नामा रहेका भक्तपुरका नर्सहरुमाथि अस्पताल प्रशासनले प्रहरी, सरकार सबै लगाएपनि आफ्नै संघसमेत पीडक प्रशासनको पक्षमा उभिएको उनीहरुको मन निकै दुखेको छ ।

लामो समयदेखि भिन्न रुपका संघर्ष जारी राखेर र संघर्षकै कारण विभिन्न दुःख भोगिरहेका अस्पतालका नर्सहरुलाई केही दिनअघि मन्त्रालयमा वार्ताका लागि बोलाएर पक्राउ गराइएको थियो । एक रात प्रहरी हिरासतमा समेत काटेका नर्सहरुका प्रमुख माग विल्कुल पेशागत हितसँग सम्बन्धित छ ।

उनीहरुले नर्सको वाक स्वतन्त्रता माथिको हस्तक्षेप बन्द गर्नुपर्ने, जोखिम भत्ता लागू गर्नुपर्ने माग गरेका छन् । शान्तिपूर्ण आन्दोलनमाथि भएको प्रहरी दमनप्रति उनीहरु आक्रोशित छन् ।

संघका पदाधिकारी राजनीतिक विचारधारा र मानव अंग प्रत्यारोपण केन्द्रका निर्देशकको प्रलोभनमा संघको आन्दोलन दमनमा लागेको भनाइ उनीहरुको छ ।

केही दिनअघि मे १ विश्व श्रमिक दिवस थियो । केही दिनपछि मे १२ मा नर्सिङ दिवस आउँदैछ । यसपटकको नर्सिङ दिवसको नारा ‘नर्सेस अ भ्वाइस टु लिड हेल्थ फर अल’ छ । ‘हामी श्रमजीवि नर्सको नाममा राजनीति गर्नेहरु, हामीमाथि अन्याय गर्ने अस्पतालका निर्देशकको इशारामा हाम्रो पेटमा लात हान्दैछन्’ सोमबारको धर्नामा भेटिएकी एक नर्सले भनिन् ।

प्रत्यारोपण केन्द्रका नर्सहरुले आन्दोलन सुरु गरेको मंगलबार १५ दिन भएको छ । उनीहरुले अस्पतालको सेवा अवरुद्द नगरी आन्दोलन गरिरहेका छन् । माग पूरा नभएसम्म पछाडी नहट्ने उनीहरुको भनाई छ ।

४ महिनासम्म भेट दिएनन् निर्देशकले, धम्क्याइरहे, तर्साइरहे

सबै कर्मचारीलाई समयमै तलब प्रदान गर्नुपर्ने, केन्द्रमा कार्यरत सबै कर्मचारीले सरकारी सेवा सुविधा पाउनु पर्ने, पुराना कर्मचारीलाई कार्यसम्पादनका आधारमा पद ग्रेडिङ गर्नुपर्ने जस्ता माग नर्सहरुले अगाडि सार्दै आएका छन् ।

सरकार अन्तर्गतको यो अस्पतालमा काम गर्ने नर्सहरुले असन्तुष्टि जनाएको यो पहिलोपटक होइन् । ‘नर्सहरुले त आवाजको प्रतिनिधित्व मात्रै गरेका हुन्, धेरै डाक्टर र कर्मचारी सहन नसकेर छोडेर हिँडिसके ।’ अर्की एक नर्सले दुःखेसो पोखिन् ।

आन्दोलनरत नर्सका अनुसार उनीहरुले यी सामान्य समस्यालाई लिएर ४ महिनादेखि प्रत्यारोपण केन्द्रका निर्देशक डा. पुकारचन्द्र श्रेष्ठसँग भेट्ने प्रयास गरे पनि उनीले भेटको सट्टा व्यक्तिगत रुपमा धम्की दिएर आन्दोलन दबाउन लागेको आरोप उनीहरुको छ ।
नर्सहरुले पछिल्लो समयमा आन्दोलनलाई चकाउँदै लगेर ३ दिन अस्पतालको आकस्मिक र आइसिइयुबाहेको सेवा बन्द गरेर धर्ना दिएका थिए।

तर अस्पतालका निर्देशकले थर्काउने, तसाउने गरेको उनीहरुको सामूहिक गुनासो छ । नर्सले आन्दोलन गरिरहँदा अस्पताल प्रशासनले अर्को अस्पतलाका नर्सहरु लिएर आएर सेवा सुचारु ग¥यो । ‘विरामीलाई सेवा दिँदासमेत विभेद गरियो जसको पहुँच छ, अस्पतालमा डायलसिस सेवा पाए,’ एक नर्सले भनिन् ।

करार नर्सलाई बेवास्ता गर्दै लोक सेवा आयोग

बैशाख ११ गते नर्सहरुले धर्ना सुरु गरे । त्यसको दोस्रो दिनमै लोकसेवा आयोग खुलाइयो । ९६ नर्सका लागि लोकसेवा खुलाइएको छ, निर्देशकको चाहना खुल्ला प्रतिस्पर्धाको नाममा आफू अनुकुलका मान्छे भर्ना गर्न यो चाल चलिएको आरोप नर्सको छ ।
अस्पताल प्रशासनले खुल्लामा पास नभएका नर्सलाई आवश्यकताका आधारमा राख्दै जाने आश्वासन दिएको छ । बिरामीको लागि रात–दिन खटेकाहरुलाई स्वार्थ नमिलेकै आधारमा निस्कासन गर्न खोजिएको आरोप नर्सहरुको छ । करार नर्सको लागि अस्पतालमा काम गरेको अनुभवको समेत कदर हुनेगरी लोकसेवा खुलाउनुपर्ने उनीहरुको माग छ ।

वार्ता भन्दा दमनको पक्षमा प्रशासन

२० गते मन्त्रालयमा भएको वार्ता निष्कर्षविहीन भयो । उनीहरुले आफ्ना मागमा लिखित जवाफ दिनभन्दै अस्पताल निर्देशकलाई घेरा हालेका थिए । सो क्रममा प्रहरी लगाएर गिरफ्तार गरियो । शुक्रबार अपरान्ह ४ बजेतिर गिरफ्तार भएका नर्सहरुलाई राति ११ बजेसम्म प्रहरी प्रभागमा राखियो ।

संघ नै निरीह, नर्सहरु रातभरि चिसो सिढींमा

संघ नर्सहरुको हकहितको रक्षाभन्दा संघ प्रशासनको पक्षमा उभिएको आरोप पीडित नर्सहरुको छ । आइतबार विज्ञप्ती निकाल्दै नर्सिङ संघले नर्सका समस्या समधानका लागि स्वास्थ्य तथा जनसंख्या मन्त्रालयकमा छलफल गराएको दावी ग¥यो ।

विज्ञप्ती भनिएको छ,‘छलफलको क्रममा स्थायी प्रकियाको विज्ञापनमा देखिएको त्रुटिपुर्ण बुँदाहरु स्वास्थ्य तथा जनसंख्या मन्त्रालयका जिम्मेवार पदाधिकारी, प्रत्यारोपण केन्द्रका पदाधिकारी र नर्सिङ संघ अध्यक्षको सहभागितामा त्रुटिपूर्ण केही बुँदा सच्याएको र केही सञ्चाएर सुचना प्रकाशन गरिने छ ।’

नर्समाथि भएको प्रहरी दमनबारे भने संघले हालसम्म पनि कुनै आधिकारिक प्रतिक्रिया दिएको छैन् । यतिसम्मकी पक्राउ परेका नर्सहरुले नर्सिङ संघकी अध्यक्ष तारा पोखरेललाई गुनासो गरेका थिए ।

तर पोखरेलले उनीहरुलाई छुटाउनसमेत पहल गरिनन् । यतिका दिन आन्दोलन गर्दा पनि संघबाट सकारात्मक नपाएपछि संघकै कार्यालयमा आएको धर्ना दिनुपरेको पीडित नर्सहरुको भनाई छ । उनीहरु संघ नर्सका मागप्रति वेवास्ता गर्ने संघ नेतृत्वप्रति आक्रोशित बनेका छन् । र, रातभरी चिसो सिढींमा धर्ना दिइरहेका छन् ।

मागहरुलाई गम्भीरता पूर्वक नलिएको भन्दै पीडित नर्सहरुले सोमबार विहान ६ बजे संघमा ताला लगाएका थिए । तर, संघले प्रहरी लगाएर १० बजे ताला खोलेको थियो ।

यस्ता छन् नर्सका माग

१.सबै कर्मचारीहरुलाई समयमै तलब दिनुपर्ने ।
२.ठेकदार प्रक्रिया हटाई कार्यरत सम्पूर्ण कर्मचारीहरुलाई अस्पतालले नै तलबको व्यवस्था गर्नुपर्ने ।
३.सरकारी अस्पतालमा पाइने सेवा सुविधा उपलब्ध गराउनु पर्ने ।
४.पुरानो कर्मचारीको कार्यसम्पादन मुल्यांकनका आधारमा ग्रेडिङ गरिनु पर्ने
५.पुराना कर्मचारीलाई स्थायी गरिनुपर्ने ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय