काउन्सिलले मनाएन वार्षिकोत्सव, गोदानले रोक्यो आन्दोलन, स्वास्थ्यका अन्य कार्यक्रम पनि स्थगित

बुधबार ताप्लेजुङमा भएको हेलिकोप्टर दुर्घटनामा परी संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सातजनाको ज्यान गएको घटनापछि सरकारले बिहीबार राष्ट्रिय शोक घाषणा गरेसँगै स्वास्थ्य क्षेत्रका घोषित सबै कार्यक्रम स्थगित भएका छन् ।

नेपाल मेडिकल काउन्सिलले बिहीबार होटेल हिमालयमा वार्षिकोत्सव समारोहको कार्यक्रम राखेको थियो । बुधबारै विज्ञाप्ति जारी गरी काउन्सिलले वार्षिकोत्सवको कार्यक्रमको पूर्ण तयारी गरिरहेकै सन्दर्भमा दुःखद घटनापछि शोकाकुल समयमा अर्को सूचना जारी नभएसम्मका लागि कार्यक्रम स्थगित भएको जनाएको छ । काउन्सिलले अधिकारीप्रति श्रद्धाञ्जलिसहित परिवारप्रति समवेदनासमेत प्रकट गरेको छ ।

५६ वर्षअघि ०२० सालमा स्थापना भएको नेपाल मेडिकल काउन्सिलले १६ फागुनमा ऐनमा लालमोहर लागेको दिनलाई स्थापना दिवसका रूपमा मनाउने गरेको छ ।

यसअघि सरकारी चिकित्सक संघ, नेपाल (गोदान)ले बुधबारैदेखि घोषित स्वास्थ्यसेवा बहिष्कार गर्ने कार्यक्रम तीन दिनका लागि स्थगनको घोषणा गरेको थियो ।

अर्कोतर्फ स्वास्थ्यसेवा विभागमा बिहीबारका लागि घोषित रक्तसञ्चार सेवामा हेमोभिजिलेन्ससम्बन्धी कार्यान्वयन निर्देशिका २०७३ अनुसार अस्पतालबाट प्राप्त प्रतिवेदन सार्वजनिकीकरण कार्यक्रम पनि स्थगित भएको छ ।

पाथीभरा दर्शन गरेर फर्किनेक्रममा मन्त्री अधिकारीसहित सातजना चढेको हेलिकोप्टर तारेभिरमा दुर्घटना भएको थियो । मृतकको शव खराब मौसमका कारण अझै काठमाडौं ल्याउन सकिएको छैन ।

काठमाडौंको त्रिवि शिक्षण अस्पतालमा शवको पोस्टमार्टमपछि दाहसंस्कारका लागि परिवारलाई बुझाइनेछ । सरकारले अधिकारीको राष्ट्रिय सम्मानका साथ अन्त्येष्टि गर्ने र बिहीबारका लागि राष्ट्रिय शोक घोषणा गरिसकेको छ ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय