उपत्यकालाई दृष्टिविहीनरहित बनाउन स्याटेलाइट उपचारकेन्द्र

हेल्थपोस्ट नेपाल

काठमाडौं उपत्यकालाई दृष्टिविहिनरहित बनाउन टोखा, खोकना, साँखु र थानकोटमा स्याटेलाइट उपचारकेन्द्रको सुरुवात गरिएको छ । नेपाल सरकारको लगानी तथा नेपाल आँखा अस्पतालको सहयोगमा सुरु गरिएको उपचारकेन्द्रबाट हालसम्म ३० हजारभन्दा बढी आँखाका बिरामीले सेवा लिइसकेका छन् ।
नेपाल सरकारको केही रकम, आँखा अस्पतालको आय, युनिभर्सल आइज साइड क्यानडाको सहयोगमा नेपाल आँखा अस्पतालले यो कार्यक्रम सञ्चालनमा ल्याएको हो । कुनै पनि ठाउँलाई दृष्टिविहीनरहित बनाउने कुरा निकै चुनौतीपूर्ण छ । किनभने, उमेर बढेसँगै मोतियाविन्दु देखिने गरेको छ । यद्यपि, आँखा अस्पतालले निकै चुनौतीपूर्ण र महत्वाकांक्षी लक्ष्य साकार गर्न केन्द्रहरूको सुरुवात गरिसकेको छ ।

आँखा उपचारको क्षेत्रमा नेपालले निकै ठूला उपलब्धि हासिल गरिसकेकाले यो महत्वाकांक्षी लक्ष्यमा पनि अधिकतम सफलता हासिल हुने कुरामा आशावादी भने बन्न सकिने अवस्था छ । खासगरी दुई प्रकारका अन्धोपन पाइएका छन्– उपचार गरेर निको हुने र निको नहुने । निको हुने आन्धोपनलाई उपचार गरी आँखा देखाउने र निको नहुनेको रोकथाममार्फत काठमाडौं उपत्यकालाई दृष्टिविहीनरहित बनाउने उद्देश्यले स्याटेलाइट उपचारकेन्द्र सुरु गरिएको नेपाल आँखा अस्पतालका मेडिकल डाइरेक्टर डा. कमल खड्का बताउँछन् ।

प्रत्येक केन्द्रमा दैनिक १५ देखि २५ जना बिरामी आउने गरेका छन्, जसमध्ये ९५ प्रतिशत मोतियाविन्दुका बिरामी रहेको खड्काले जनाएका छन् । उपचारकेन्द्रमा बिरामीले स्वास्थ्यकर्मीबाट चेकजाँच र सल्लाह–सुझाब पाउँदै आएका छन् ।
केन्द्रमा नेपाल आँखा अस्पतालका मेडिकल डाक्टरहरूको टिम प्रत्येक महिना जाने गरेको छ । मोतियाविन्दु भएका बिरामीलाई भने नेपाल आँखा अस्पताल त्रिपुरेश्वरमा ल्याएर शल्यक्रिया गरिने गरेको खड्का बताउँछन् । उपत्यकालाई दृष्टिविहीनरहित बनाउने उद्देश्यले स्याटेलाइट उपचारकेन्द्र सुरु गरिएको खड्काले बताएका छन् ।

कम्पनीबाट औषधि, तिलगंगाबाट लेन्स अनुदान
केन्द्रका लागि आवश्यक औषधि कम्पनीहरूसँग अनुदानमा माग्ने गरिएको छ । त्यसैगरी आवश्यक लेन्स सहयोग तिलगंगा आँखा केन्द्रबाट लिने गरिएको छ । यसका अतिरिक्त व्यक्तिगत रूपमा पनि सहयोग संकलन गरी कार्यक्रम सञ्चालनमा ल्याइएको खड्काले बताएका छन् । नेपाल सरकारले सातवटै प्रदेशमा एउटा केन्द्रीय आँखा अस्पताल र जिल्ला तथा स्थानीय तहमा एउटा आँखा अस्पताल खेल्नु अति नै आवश्यक रहेको खड्काले बताए ।

नेपाल आँखा अस्पतालले विगत ४४ वर्षदेखि उपत्यका तथा देशका विभिन्न ठाउँमा निःशुल्क आँखा शिविर सञ्चालन गर्दै आएको छ । विभिन्न जिल्लाका सरोकारवालासँग समन्वय गरेर ७ वर्षदेखि हरेक वर्ष १४ स्थानमा सेल अप्टिस सेवा, सिभिल क्याम्प सञ्चलन गर्दै आएको छ । शिविरमा प्रदान गरिने औषधिलगायत सबै प्रकारका सेवा निःशुल्क हुने गरेका छन् ।



Leave a Reply

Your email address will not be published.