औषधि पसल अनुगमनमा उपमेयरसहितको टोली, एकमा ताला

नेपालगन्ज उपमहानगरपालिकाको अनुगमन टोलीले बिहीबार उपमहानगरक्षेत्रभित्रका औषधि पसलहरूमा अनुगमन गरेको छ । अनुगमनका क्रममा कैफियत भेटिएको एक औषधि पसलमा टोलीले तालाबन्दी गरेको छ भने अन्यलाई नियमसंगत चल्न निर्देशन दिएको छ ।

नेपालगन्ज उपमहानगरपालिकाका उपमेयर उमा थापामगरको संयोजकत्वमा जिल्लाका सरोकारवाला निकाय सम्मिलित उपभोक्ता हक–हित सरंक्षण समितिअन्तर्गतको बजार अनुगमन टोलीले नेपालगन्ज मेडिकल कलेजवरपरका तीनवटा औषधि पसलमा अनुगमन गरेको हो ।

रामलीला मेडिकल हल, सिटी फार्मेसी र सिद्धिविनायक फर्मास्युटिकल्स प्रालि फर्मा डिभिजनमा अनुगमन गरिएको हो । अनुगमनपश्चात् टोलीले मेडिकलहरूलाई नियमसंगत काम गर्न निर्देशनसमेत दिएको अनुगमनमा सहभागी उपमहानगरपालिकाका वरिष्ठ कार्यक्रम अधिकृत शरदकुमार पौडेलले जानकारी दिए ।

औषधि व्यवस्था विभाग शाखा कार्यालय नेपालगन्जका प्रमुख निनु श्रेष्ठका अनुसार रामलीला मेडिकलमा अभिलेख राख्ने तरिका नियमअनुसार नमिलेकाले त्यसलाई भोलिसम्ममा मिलाएर पेस गर्न निर्देशन दिइएको छ ।

सिद्धिविनायक औषधिको थोक विक्रेता भएकाले औषधिको गुणस्तर जाँचका लागि दुईवटा औषधि नमुनाका रूपमा लिइएको र त्यसलाई औषधि व्यवस्था विभाग केन्द्रीय कार्यालयमा पठाइने श्रेष्ठले बताए ।

त्यस्तै, सिटी फार्मेसीमा सञ्चालक नभेटिएको र कमर्स पढेका व्यक्ति मेडिकलमा बसेकाले मेडिकल सञ्चालक स्वयम् औषधि व्यवस्था विभागको नेपालगन्ज कार्यालयमा उपस्थित नहुँदासम्मका लागि मेडिकल बन्द गराइएको श्रेष्ठले जानकारी दिए ।

सिद्धिविनायक औषधिको थोक विक्रेता भएकाले औषधिको गुणस्तर जाँचका लागि दुईवटा औषधि नमुनाका रूपमा लिइएको र त्यसलाई औषधि व्यवस्था विभाग केन्द्रीय कार्यालयमा पठाइने श्रेष्ठले बताए ।

अनुगमन टोलीमा उपमहानगरपालिकाका वरिष्ठ कार्यक्रम अधिकृत पौडेल, जिल्ला प्रशासन कार्यालयका नायब सुब्बा लक्ष्मीप्रसाद शर्मा, औषधि व्यवस्था विभाग शाखा कार्यालय नेपालगन्जका प्रमुख श्रेष्ठ, स्वास्थ्य कार्यालयका जनस्वास्थ्य अधिकृत रामबहादुर चन्द र जिल्ला प्रहरी कार्यालय बाँकेका प्रहरी सहायक निरीक्षक गणेश विष्टलगायत थिए ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय